ທ່ານ ເອກອັກຄະລັດຖະທູດອົດສະຕຣາລີ ຢ້ຽມຢາມໂຮງຮຽນປະຖົມແຫ່ງໜຶ່ງໃນແຂວງຊຽງຂວາງ ແລະ ຢືນຢັນຄືນຄວາມມຸ່ງໝັ້ນຂອງລັດຖະບານອົດສະຕຣາລີ ໃນການຊ່ວຍເຫຼືອການສຶກສາຊັ້ນປະຖົມທີ່ມີຄຸນນະພາບໃຫ້ແກ່ເດັກນ້ອຍທຸກຄົນໃນ ສປປ ລາວ

ໃນວັນທີ 22 ມີນາ ປີ 2024, ທ່ານ ຮສ. ປອ. ພຸດ ສິມມາລາວົງ, ລັດຖະມົນຕີກະຊວງສຶກສາທິການ ແລະ ກິລາ ແຫ່ງ ສປປ ລາວ ແລະ ທ່ານ ນາງ ເມແກນ ຈອນສ, ເອກອັກຄະລັດຖະທູດອົດສະຕຣາລີ ປະຈຳ ສປປ ລາວ ໄດ້ລົງຢ້ຽມຢາມໂຮງຮຽນປະຖົມແຫ່ງໜຶ່ງຢູ່ເມືອງຄຳ ແຂວງຊຽງຂວາງ ເພື່ອສັງເກດການສອນຫຼັກສູດຊັ້ນປະຖົມສຶກສາແຫ່ງຊາດສະບັບປັບປຸງໃໝ່. ໃນວັນດຽວກັນນີ້, ທ່ານທູດຈອນສ ຍັງໄດ້ເຂົ້າຮ່ວມເປັນເຈົ້າພາບການຈັດສຳມະນາເພື່ອໃຫ້ຂໍ້ມູນກ່ຽວກັບທຶນການສຶກສາຂອງລັດຖະບານອົດສະຕຣາລີ ໃຫ້ແກ່ຜູ້ທີ່ສົນໃຈຢາກຍື່ນສະໝັກເອົາທຶນໄປສຶກສາຕໍ່ທີ່ປະເທດອົດສະຕຣາລີ.

ໃນລະຫວ່າງການຢ້ຽມຢາມໂຮງຮຽນ, ທ່ານ ຮສ. ປອ. ພຸດ ໄດ້ກ່າວວ່າ “ລັດຖະບານ ສປປ ລາວ ຮັບຮູ້ວ່າ ການສຶກສາຂັ້ນພື້ນຖານທີ່ມີຄຸນນະພາບ ເປັນພື້ນຖານຂອງປະເທດຊາດທີ່ຈະເລີນຮຸ່ງເຮືອງ ແລະ ສະຫງົບສຸກ. ດ້ວຍການສະໜັບສະໜູນຂອງລັດຖະບານອົດສະຕຣາລີ, ພວກເຮົາໄດ້ປັບປຸງຫຼັກສູດຊັ້ນປະຖົມສຶກສາແຫ່ງຊາດ ເພື່ອປະສົມປະສານວິທີການສິດສອນແບບໃໝ່ ເຊິ່ງສົ່ງເສີມການມີສ່ວນຮ່ວມ ແລະ ການຮຽນຮູ້ຂອງນັກຮຽນຜ່ານກິດຈະກຳການຮຽນການສອນ, ການປະຕິບັດຕົວຈິງ ແລະ ການນຳໃຊ້ໃນຊີວິດຕົວຈິງ. ຂ້າພະເຈົ້າດີໃຈທີ່ໄດ້ມາຮ່ວມກັບທ່ານເອກອັກຄະລັດຖະທູດ ຈອນສ ໃນມື້ນີ້ ເພື່ອສັງເກດວິທີການສອນ ແລະ ການຮຽນແບບໃໝ່ທີ່ເປັນທິດທາງໃນການພັດທະນາຊັບພະຍາກອນມະນຸດຢູ່ ສປປ ລາວ ໃນອະນາຄົດ.”

ທ່ານ ເອກອັກຄະລັດຖະທູດ ຈອນສ ແລະ ທ່ານ ຮສ. ປອ. ພຸດ ໄດ້ຮ່ວມສັງເກດການຮຽນການສອນວິຊາພາສາລາວ, ວິຊາວິທະຍາສາດ ແລະ ສິ່ງແວດລ້ອມ ແລະ ວິຊາພາສາອັງກິດ ໂດຍໄດ້ນຳໃຊ້ຫຼັກສູດສະບັບປັບປຸງໃໝ່ ພ້ອມດ້ວຍສື່ການຮຽນການສອນ ທີ່ພັດທະນາໂດຍການສະໜັບສະໜູນຈາກລັດຖະບານອົດສະຕຣາລີ. ທັງສອງທ່ານດີໃຈທີ່ໄດ້ເຫັນນັກຮຽນຮ່ວມມືຊ່ວຍເຫຼືອກັນໃນການຮຽນ, ມີສ່ວນຮ່ວມກັບສື່ການຮຽນການສອນ, ຮຽນຮູ້ໂດຍຜ່ານການທົດລອງ ແລະ ການທົບທວນຄືນໃນສິ່ງທີ່ເຂົາເຈົ້າກໍາລັງເຮັດ. ທັງສອງທ່ານຍັງໄດ້ຊົມເຊີຍທ່ານຜູ້ອໍານວຍການໂຮງຮຽນ ແລະ ຄູທຸກທ່ານ ພ້ອມທັງເນັ້ນໜັກເຖິງບົດບາດສໍາຄັນຂອງຄູທີ່ຈະນໍາເອົາຫຼັກສູດສະບັບປັບປຸງໃໝ່ໄປຈັດຕັ້ງປະຕິບັດໃຫ້ປະກົດຜົນເປັນຈິງ.

ທ່ານ ເອກອັກຄະລັດຖະທູດ ຈອນສ ຍັງໄດ້ກ່າວຕື່ມອີກວ່າ: ກະຊວງສຶກສາທິການ ແລະ ກິລາ, ໂດຍການສະໜັບສະໜູນຂອງລັດຖະບານອົດສະຕາລີ, ໄດ້ປະຕິຮູບການສຶກສາຊັ້ນປະຖົມຜ່ານການປັບປຸງຫຼັກສູດຊັ້ນປະຖົມສຶກສາ. ການປ່ຽນແປງອັນສຳຄັນ ແມ່ນການເລີ່ມນຳໃຊ້ວິທີການຮຽນທີ່ເນັ້ນໃສ່ນັກຮຽນເປັນໃຈກາງ ແລະ ເນັ້ນການປະຕິບັດຕົວຈິງ, ໄດ້ຫັນຈາກການຮຽນຮູ້ແບບເກົ່າ ໄປສູ່ການຊ່ວຍໃຫ້ນັກຮຽນໄດ້ຮຽນຮູ້ທັກສະທີ່ຈຳເປັນສຳລັບສັດຕະວັດທີ 21. ພວກເຮົາຮັບຮູ້ວ່າຄູຈະຕ້ອງໄດ້ສືບຕໍ່ຝຶກອົບຮົມ ແລະ ສ້າງຄວາມເຂັ້ມແຂງຢ່າງຕໍ່ເນື່ອງເພື່ອຮັບປະກັນວ່າເຂົາເຈົ້າສາມາດປະຕິບັດການຮຽນການສອນແບບໃໝ່ຢ່າງຄົບຖ້ວນ. ລັດຖະບານອົດສະຕຣາລີ ຈະສືບຕໍ່ຮ່ວມມືກັບກະຊວງສຶກສາທິການ ແລະ ກິລາ ໂດຍຜ່ານແຜນງານບີຄວາ ແລະ ຈະສຸມໃສ່ການພັດທະນາວິຊາຊີບຄູໃຫ້ເຂັ້ມແຂງຂຶ້ນກວ່າເກົ່າ”.

ແຜນງານບີຄວາ ແມ່ນແຜນງານທີ່ນຳພາໂດຍ ລັດຖະບານແຫ່ງ ສປປ ລາວ, ໂດຍການສະໜັບສະໜູນຈາກລັດຖະບານອົດສະຕຣາລີ ແລະ ອົງການ USAID. ແຜນງານບີຄວາເນັ້ນໃສ່ການປັບປຸງຜົນການຮຽນສຳລັບໄວໜຸ່ມ ແລະ ຜູ້ທີ່ດ້ອຍໂອກາດ ໃນ ສປປ ລາວ. ນອກນັ້ນ, ແຜນງານບີຄວາ ຍັງຈະສືບຕໍ່ເອົາໃຈໃສ່ການຮັບປະກັນດ້ານຄວາມສະເໝີພາບລະຫວ່າງຍິງ-ຊາຍ ແລະ ສົ່ງເສີມການສຶກສາຮຽນຮ່ວມສຳລັບທຸກຄົນໃນທຸກກິດຈະກໍາຂອງແຜນງານ.