ໄລຍະທີ 2 ຂອງແຜນງານການປັບປຸງຄຸນນະພາບ ແລະ ຂະຫຍາຍໂອກາດເຂົ້າຮຽນສຳລັບການສຶກສາຂັ້ນພື້ນຖານໃນ ສປປ ລາວ (ແຜນງານບີຄວາ) ສືບຕໍ່ຜົນສໍາເລັດຂອງສາຍພົວພັນການຮ່ວມມື ລະຫວ່າງລັດຖະບານອົດສະຕຣາລີ ແລະ ລັດຖະບານ ສປປ ລາວ ໃນໄລຍະທີ 1 ຂອງແຜນງານ ເຊິ່ງມີເປົ້າໝາຍເພື່ອ “ສົ່ງເສີມໃຫ້ເດັກນ້ອຍໃນເກນອາຍຸເຂົ້າຮຽນຊັ້ນປະຖົມໃນ ສປປ ລາວ, ໂດຍສະເພາະຜູ້ທີ່ດ້ອຍໂອກາດ, ມີຄວາມຫ້າວຫັນປະກອບສ່ວນໃນການຮຽນຫຼາຍຂຶ້ນ ແລະ ມີຜົນການຮຽນທີ່ດີຂຶ້ນ”.

ແຜນງານບີຄວາ ໄລຍະ 2 ຈະສືບຕໍ່ໃຫ້ການສະໜັບສະໜູນໂດຍກົງຕໍ່ບັນດາບຸລິມະສິດທາງດ້ານການສຶກສາຂອງລັດຖະບານລາວ ທີ່ລະບຸໄວ້ໃນແຜນພັດທະນາຂະແໜງການສຶກສາ, ວິທະຍາສາດ ແລະ ກິລາ ທີ່ວາງອອກໂດຍທາງກະຊວງສຶກສາທິການ ແລະ ກິລາ ແລະ ມີຄວາມສອດຄ່ອງກັບທິດທາງຍຸດທະສາດ ທີ່ກຳນົດໄວ້ຢູ່ໃນ ນະໂຍບາຍການພັດທະນາສາກົນຂອງປະເທດອົດສະຕຣາລີ ປີ 2023, ຍຸດທະສາດຄວາມສະເໝີພາບລະຫວ່າງຍິງ-ຊາຍສາກົນຂອງປະເທດອົດສະຕຣາລີ, ຍຸດທະສາດດ້ານສິດທິ ແລະ ຄວາມສະເໝີພາບສາກົນຂອງຜູ້ທີ່ມີຄວາມພິການ ແລະ ແຜນການຮ່ວມມືການພັດທະນາລະຫວ່າງປະເທດອົດສະຕຣາລີ ແລະ ສປປ ລາວ ປີ 2024-2029.

ແຜນງານບີຄວາ ໄລຍະທີ 1 (2015-2022) ໄດ້ສຸມໃສ່ການສະໜັບສະໜູນກະຊວງສຶກສາທິການ ແລະ ກິລາ ໃນການປັບປຸງຫຼັກສູດຊັ້ນປະຖົມສຶກສາແຫ່ງຊາດ ເພື່ອເຊື່ອມສານເອົາວິທີການສອນທີ່ຖືເອົານັກຮຽນເປັນໃຈກາງ ເຊິ່ງໃນນັ້ນ ການປະກອບສ່ວນໃນການຮຽນຢ່າງຫ້າວຫັນ ແລະ ການຮຽນຮູ້ຂອງນັກຮຽນ ໄດ້ຖືກສົ່ງເສີມ ໂດຍຜ່ານກິດຈະກຳການຮຽນ, ລົງມືປະຕິບັດຕົວຈິງ ແລະ ນຳໄປໃຊ້ໄດ້ໃນຊີວິດຈິງ. ດ້ວຍການສະໜັບສະໜູນຈາກແຜນງານບີຄວາ, ກະຊວງສຶກສາທິການ ແລະ ກິລາ ໄດ້ພັດທະນາສື່ການຮຽນການສອນ ສຳລັບຄູ ແລະ ນັກຮຽນ ແລະ ໄດ້ສະໜອງການຝຶກອົບຮົມກ່ຽວກັບຫຼັກສູດໃໝ່ໃຫ້ແກ່ຄູປະຈຳການໃນທົ່ວປະເທດ.

ແຜນງານບີຄວາ ໄລຍະທີ 2 ໄດ້ເລີ່ມຈັດຕັ້ງປະຕິບັດໃນວັນທີ 1 ກໍລະກົດ ປີ 2022, ໄລຍະເວລາຂອງແຜນງານໃນເບື້ອງຕົ້ນແມ່ນຈະສິ້ນສຸດໃນເດືອນມິຖຸນາ ປີ 2026, ຈຸດສຸມເບື້ອງຕົ້ນຂອງແຜນງານບີຄວາ ໄລຍະທີ 2  ແມ່ນການສ້າງລະບົບການພັດທະນາວິຊາຊີບຄູແບບຕໍ່ເນື່ອງ (CPD) ທີ່ເອົາໂຮງຮຽນເປັນຫຼັກ ແລະ ຕອບສະໜອງຄວາມຕ້ອງການຂອງທ້ອງຖິ່ນ. ວິທະຍາໄລຄູ 3 ແຫ່ງ ແລະ 30 ເມືອງເປົ້າໝາຍໃນເຂດບໍລິການຂອງວິທະຍາໄລຄູ ໄດ້ຮັບການສະໜັບສະໜູນໃນການອອກແບບ ແລະ ຈັດຕັ້ງປະຕິບັດລະບົບ CPD ໃໝ່ ທີ່ສອດຄ່ອງກັບດຳລັດຂອງກະຊວງສຶກສາທິການ ແລະ ກິລາ ເລກທີ 3342.

ໄລຍະທີ 2 ຂອງແຜນງານບີຄວາ ໄດ້ຮັບການຂະຫຍາຍເວລາສືບຕໍ່ຈົນເຖິງເດືອນມິຖຸນາ ປີ 2028. ໃນໄລຍະເວລາສືບຕໍ່ນີ້ ແຜນງານຈະສຸມໃສ່ການລວມລະບົບ CPD, ເສີມສ້າງຄວາມເປັນເຈົ້າການຂອງລັດຖະບານລາວ ແລະ ສະໜັບສະໜູນການນຳພາຂອງລັດຖະບານລາວ ເພື່ອຊຸກຍູ້ການປະຕິຮູບໃນຂັ້ນສູນກາງ ແລະ ຂັ້ນທ້ອງຖິ່ນ. ນອກຈາກນີ້ ຍັງຈະຊ່ວຍເສີມສ້າງບົດຄົ້ນຄວ້າ ແລະ ການຮຽນຮູ້ ເພື່ອສະໜັບສະໜູນການພັດທະນາດ້ານການຮູ້ໜັງສື ໂດຍອີງໃສ່ຫຼັກຖານທີ່ເຫັນໄດ້ປະຈັກຕາ, ການປົກປ້ອງເດັກ ແລະ ວິທີການສອນທີ່ຕອບສະໜອງຕໍ່ບົດບາດຍິງຊາຍ ພ້ອມທັງຂະຫຍາຍຈຸດສຸມໃສ່ການປະເມີນຜົນແບບມີສ່ວນຮ່ວມ, ການພັດທະນາດ້ານພາສາ ແລະ ຄວາມຢືດຢຸ່ນຕໍ່ການປ່ຽນແປງຂອງສະພາບອາກາດ. ນອກຈາກນັ້ນ ແຜນງານບີຄວາ ຈະສືບຕໍ່ສົ່ງເສີມຜົນໄດ້ຮັບຂອງວຽກງານຄວາມສະເໝີພາບຍິງ-ຊາຍ, ການມີສ່ວນຮ່ວມຂອງຄົນທີ່ມີຄວາມພິການ ແລະ ລວມທຸກຄົນໃນສັງຄົມ (GEDSI) ຜ່ານການສະໜັບສະໜູນ ແບບເຊື່ອມສານ ແລະ ແບບຈຸດສຸມ ດ້ານຄວາມສະເໝີພາບຍິງ-ຊາຍ ແລະ ສົ່ງເສີມຄວາມກ້າວໜ້າຂອງແມ່ຍິງ, ການປ້ອງກັນຄວາມຮຸນແຮງບົນພື້ນຖານດ້ານເພດພາຍໃນໂຮງຮຽນ ແລະ ການຮຽນການສອນທີ່ຄຳນຶງເຖິງຄວາມພິການ ແລະ ການຮຽນຮ່ວມ.

ການປະກອບສ່ວນທັງໝົດຂອງລັດຖະບານອົດສະຕຣາລີ ເຂົ້າໃນແຜນງານບີຄວາ ໄລຍະທີ 2 ແມ່ນ 49.4 ລ້ານໂດລາອົດສະຕຣາລີ ສຳລັບໄລຍະເວລານັບແຕ່ວັນທີ 1 ກໍລະກົດ ປີ 2022 ເຖິງວັນທີ 30 ມິຖຸນາ ປີ 2028, ອົງການພັດທະນາສາກົນຂອງປະເທດສະຫະລັດອາເມລິກາ (USAID) ປະກອບສ່ວນ 3,4 ລ້ານໂດລາສະຫະລັດ ເພີ່ມສໍາລັບໄລຍະເວລາ ນັບແຕ່ ວັນທີ 9 ມິຖຸນາ ປີ 2023 ຫາ 30 ມິຖຸນາ ປີ 2026.