ຈຸດປະສົງ ຈຸດປະສົງຂອງຍຸດທະສາດກ່ຽວກັບພະຍາດໂຄວິດ-19 ຂອງແຜນງານບີຄວາ ໄລຍະທີ 2 ແມ່ນເພື່ອ:

1. ປະກອບສ່ວນເຂົ້າໃນຜົນສຳເລັດຂອງ ແຜນຕອບໂຕ້ພະຍາດໂຄວິດ-19 ໃນ ສປປ ລາວ ຂອງລັດຖະບານອົດສະຕຣາລີ ແລະ ຈຸດປະສົງແມ່ນເພື່ອຮັບປະກັນໃຫ້ນັກຮຽນ, ໂດຍສະເພາະເດັກຍິງ ແລະ ເດັກທີ່ດ້ອຍໂອກາດ ຮູ້ໜັງສື ແລະ ສາມາດນັບເລກພື້ນຖານໄດ້ ແລະ ມີທັກສະຊີວິດ ເພື່ອປະກອບສ່ວນເຂົ້າໃນກຳລັງແຮງງານ ທີ່ມີປະສິດທິຜົນສູງຂຶ້ນ, ແລະ
2. ນຳໃຊ້ມາດຕະການປ້ອງກັນ ແລະ ຄວບຄຸມການລະບາດຂອງພະຍາດໂຄວິດ-19 ຢ່າງມີປະສິດທິພາບ ຕະຫຼອດໄລຍະເວລາຂອງການຈັດຕັ້ງປະຕິບັດແຜນງານໃນໄລຍະທີ 2:

• ຮັບປະກັນສະຫວັດດີການຂອງທີມງານແຜນງານບີຄວາ, ຜູ້ມີສ່ວນຮ່ວມຂອງແຜນງານ ແລະ ຄູ່ຮ່ວມຈັດຕັ້ງປະຕິບັດ,
• ສືບຕໍ່ການຈັດຕັ້ງປະຕິບັດແຜນງານຢ່າງປອດໄພ ເພື່ອໃຫ້ບັນລຸໄດ້ຕາມຜົນໄດ້ຮັບໄລຍະຍາວທີ່ຕັ້ງເປົ້າໄວ້,
• ມີຄວາມສອດຄ່ອງກັບບັນດານະໂຍບາຍ, ນິຕິກຳ ແລະ ບຸລິມະສິດດ້ານການພັດທະນາຂະແໜງການສຶກສາ ຂອງລັດຖະບານອົດສະຕຣາລີ ແລະ ລັດຖະບານແຫ່ງ ສປປ ລາວ.

ບັນດາຫຼັກການຊີ້ນຳ ຫ້າຫຼັກການທີ່ສອດຄ່ອງກັບ ແຜນຕອບໂຕ້ພະຍາດໂຄວິດ-19 ໃນ ສປປ ລາວ ຂອງລັດຖະບານອົດສະຕຣາລີ ຈະເປັນຫຼັກການຊີ້ນຳຕະຫຼອດໄລຍະການຈັດຕັ້ງປະຕິບັດແຜນງານບີຄວາ ໄລຍະທີ 2 ທີ່ກ່ຽວພັນກັບການປ້ອງກັນການລະບາດພະຍາດໂຄວິດ-19, ການຫຼຸດຜ່ອນ ແລະ ການປັບຕົວຂອງແຜນງານໃນການວາງແຜນ ແລະ ການຕັດສິນໃຈຕ່າງໆ.

1. ໃຫ້ບຸລິມະສິດກຸ່ມທີ່ດ້ອຍໂອກາດກ່ອນ. ການໂຕ້ຕອບການລະບາດຂອງພະຍາດໂຄວິດ-19 ຂອງແຜນງານບີຄວາ ໄລຍະທີ 2 ແມ່ນຈະພິຈາລະນາການຈັດບຸລິມະສິດໃຫ້ແກ່ຄວາມຕ້ອງການ, ຂີດຄວາມສາມາດ ແລະ ສະພາບການຂອງກຸ່ມທີ່ດ້ອຍໂອກາດທີ່ສຸດ. ບັນດານະໂຍບາຍ ແລະ ຂັ້ນຕອນດຳເນີນງານ ກ່ຽວພັນກັບບັນດາກິດຈະກຳຂອງແຜນງານບີຄວາ ຈະຮັບປະກັນວ່າ ກຸ່ມຜູ້ມີສ່ວນຮ່ວມທີ່ດ້ອຍໂອກາດ ຈະໄດ້ຮັບການປົກປ້ອງ. ການວາງແຜນ ແລະ ການຈັດສັນງົບປະມານ ຈະແກ້ໄຂຄວາມຕ້ອງການດ້ານການຊ່ວຍເຫຼືອເພີ່ມເຕີມທີ່ຈຳເປັນ ເພື່ອຫຼຸດຜ່ອນຄວາມແຕກໂຕນລະຫວ່າງກຸ່ມຜູ້ດ້ອຍໂອກາດ ແລະ ກຸ່ມຜູ້ທີ່ມີໂອກາດດີກວ່າ. ການອອກແບບ ແລະ ການຈັດຕັ້ງປະຕິບັດກິດຈະກຳຂອງແຜນງານ ຈະອີງຕາມຄວາມເໝາະສົມທາງດ້ານສະພາບການ ແລະ ຄວາມສາມາດຂອງຜູ້ທີ່ມີສ່ວນຮ່ວມ ແລະ ຈະບໍ່ປະປ່ອຍໃຜໄວ້ທາງຫຼັງ.
2. ໃຫ້ບຸລິມະສິດແກ່ວິທີການແກ້ໄຂທີ່ມີຄວາມເໝາະສົມ ແລະ ຍືນຍົງ. ດັ່ງທີ່ກ່າວໄວ້ຂ້າງເທິງ, ແຜນງານບີຄວາ ຈະນຳໃຊ້ບັນດາມາດຕະການຕອບໂຕ້ການລະບາດຂອງພະຍາດໂຄວິດ-19 ທີ່ສາມາດໃຊ້ໄດ້ໃນໄລຍະຍາວ ເທົ່ານັ້ນ. ກິດຈະກຳຂອງແຜນງານຈະມີຄວາມເໝາະສົມກັບຈຸດປະສົງເປົ້າໝາຍຂອງແຜນງານ ແລະ ການອອກແບບແມ່ນອີງໃສ່ສະພາບຕົວຈິງຂອງການຈັດຕັ້ງປະຕິບັດວຽກງານຢູ່ໃນທ້ອງຖິ່ນ.
3. ປະສານສົມທົບກັນ ເພື່ອກໍ່ໃຫ້ເກີດຜົນໄດ້ຮັບສູງສຸດ. ແຜນງານບີຄວາ ຈະປະສານງານກັບບັນດາກົມຂອງກະຊວງສຶກສາທິການ ແລະ ກິລາ, ລະຫວ່າງຜູ້ທີ່ມີສ່ວນຮ່ວມໃນຂັ້ນສູນກາງ ແລະ ຂັ້ນທ້ອງຖິ່ນ ແລະ ກັບຄູ່ຮ່ວມພັດທະນາ ເພື່ອແບ່ງປັນວິທີການທີ່ປະສົບຜົນສຳເລັດ ແລະ ບົດຮຽນທີ່ຖອດຖອນໄດ້, ຂະຫຍາຍການເຂົ້າເຖິງກຸ່ມເປົ້າໝາຍ ແລະ ຜົນກະທົບຂອງການຊ່ວຍເຫຼືອທີ່ໄດ້ຮັບຜົນດີ ແລະ ບັນລຸການໃຊ້ງົບປະມານຢ່າງກຸ້ມຄ່າ ໂດຍຜ່ານການໃຊ້ຊັບພະຍາກອນຮ່ວມກັນ.
4. ນຳໃຊ້ບົດຮຽນໃນອະດີດ ເພື່ອພັດທະນາວິທີການແກ້ໄຂໃນອະນາຄົດ. ມາດຕະການຄວບຄຸມ ແລະ ປ້ອງກັນການລະບາດຂອງພະຍາດໂຄວິດ-19 ຂອງແຜນງານ ໃນໄລຍະທີ 2 ແມ່ນຈະນຳໃຊ້ບົດຮຽນ ແລະ ປະສົບການຈາກແຜນງານ ໃນໄລຍະທີ 1 ລວມທັງປະສົບການ ແລະ ບົດຮຽນທີ່ຖອດຖອນໄດ້ຂອງາພາກສ່ວນອື່ນ.
5. ຕົວແບບການດຳເນີນງານທີ່ດີ. ບັນດານະໂຍບາຍ, ສະຖານທີ່ເຮັດວຽກ, ແຜນຈັດຕັ້ງປະຕິບັດ ແລະ ການປະຕິບັດງານຂອງພະນັກງານແຜນງານບີຄວາ ຈະຮັກສາມາດຕະຖານສູງກ່ຽວກັບຄວາມປອດໄພ ແລະ ຄວາມພ້ອມໃນການຕອບໂຕ້ພະຍາດ.