ກະຊວງສຶກສາທິການ ແລະ ກິລາ (ສປປ ລາວ) ແລະ ລັດຖະບານອົດສະຕຣາລີ ຮ່ວມກັນຈັດງານລະນຶກວັນຄົນພິການສາກົນ ປີ 2023 ແລະ ກອງປະຊຸມສໍາມະນາເພື່ອເສີມສ້າງຄວາມຮັບຮູ້ ແລະ ຄວາມເຂົ້າໃຈກ່ຽວກັບວຽກງານຄົນພິການ, ການປົກປ້ອງ ແລະ ການປະຕິບັດທີ່ດີທີ່ສຸດສຳລັບການຮັກສາຄວາມປອດໄພສຳລັບເດັກ

ວັນຄົນພິການສາກົນ (IDPwD) ເປັນວັນລະນຶກງານໜື່ງທີ່ມີຄວາມສໍາຄັນຂອງສະຫະປະຊາຊາດ, ເຊີ່ງໄດ້ຈັດຂຶ້ນໃນວັນທີ 3 ທັນວາ ຂອງທຸກໆປີ. ງານລະນຶກວັນຄົນພິການສາກົນນີ້ ມີຈຸດປະສົງເພື່ອສ້າງຄວາມເຂົ້າໃຈໃຫ້ກັບສັງຄົມ ແລະ ສົ່ງເສີມການຮັບຮູ້ ແລະ ຍອມຮັບຄົນພິການ. ພ້ອມດຽວກັນນີ້, ກໍ່ຍັງເປັນການເຊີດຊູຜົນສໍາເລັດ ແລະ ການປະກອບສ່ວນເຂົ້າໃນຂະບວນການພັດທະນາປະເທດຊາດຂອງເຂົາເຈົ້າ.

ສໍາລັບຄໍາຂັວນໃນວັນຄົນພິການສາກົນປະຈໍາ ປີ 2023 ນີ້ ແມ່ນ: ‘ຮ່ວມກັນປະຕິບັດເພື່ອຊ່ວຍເຫຼືອ ແລະ ບັນລຸເປົ້າໝາຍ SDGs ຮ່ວມກັນກັບ ແລະ ໂດຍຄົນພິການເອງ’.

ອີງຕາມການສໍາຫຼວດຕົວຊີ້ບອກສັງຄົມຂອງລາວ ປີ 2017, ຊີ້ໃຫ້ເຫັນວ່າ 2% ຂອງເດັກອາຍຸ 2 ຫາ 4 ປີ ມີຄວາມຫຍຸ້ງຍາກດ້ານໜ້າທີ່ການທາງຮ່າງກາຍ ຢ່າງໜ້ອຍໜຶ່ງໜ້າທີ່ການຄື: ການເບິ່ງເຫັນ, ການໄດ້ຍິນ, ການຍ່າງ, ການເຄື່ອນຍ້າຍ, ການສື່ສານ, ການຮຽນຮູ້, ການຫຼິ້ນ, ການຄວບຄຸມພຶດຕິກໍາ. ອັດຕາໃນສ່ວນນີ້ ເພີ່ມຂຶ້ນເນື່ອງຈາກຄວາມຫ່າງໄກສອກຫຼີກ ແລະ ຄວາມທຸກຍາກ. ເດັກນ້ອຍທີ່ມີຄວາມພິການຮ້າຍແຮງມັກຈະຖືກຮັກສາໄວ້ຢູ່ເຮືອນ ແລະ ມັກຈະຖືກຕັດຂາດຈາກໂລກພາຍນອກ, ຖືກຈໍາແນກ, ແລະ ບໍ່ໄດ້ຮັບການເຄົາລົບເທົ່າທີ່ຄວນ. ນອກຈາກນີ້, ບັນດາປັດໄຈຕ່າງໆ ເຊັ່ນ: ເພດ, ຊົນເຜົ່າ, ຄວາມທຸກຍາກ, ໄລຍະທາງໄປໂຮງຮຽນ, ລວມທັງການເຂົ້າເຖິງຫ້ອງຮຽນ ແລະ ຫ້ອງນ້ຳ ກໍ່ຍັງຖືວ່າເປັນອຸປະສັກຕໍ່ກັບການສຶກສາຂອງເດັກພິການ.

ນອກຈາກນັ້ນ, ການແຜ່ລະບາດຂອງພະຍາດໂຄວິດ 19 (COVID-19) ໄດ້ທຳລາຍຜົນປະໂຫຍດດ້ານການສຶກສາ ແລະ ການພັດທະນາໃນທົ່ວພາກພື້ນ. ໃນສະຖານະການເຫຼົ່ານີ້, ຜູ້ທີ່ໄດ້ຮັບຜົນກະທົບຫຼາຍທີ່ສຸດ ແມ່ນກຸ່ມທີ່ມີຄວາມສ່ຽງສູງ ໂດຍສະເພາະແມ່ຍິງ ແລະ ເດັກຍິງ, ຄົນພິການ ຜູ້ທີ່ຢູ່ໃນເຂດຊົນນະບົດ ແລະ ຫ່າງໄກສອກຫຼີກ.

ໂດຍການຮັບຮູ້ສິ່ງທ້າທາຍເຫຼົ່ານີ້ ແລະ ເຫັນໄດ້ເຖິງຄວາມສຳຄັນຂອງການສົ່ງເສີມການສຶກສາທີ່ມີຄຸນນະພາບ, ກະຊວງສຶກສາທິການ ແລະ ກິລາ ແຫ່ງ ສປປ ລາວ ແລະ ລັດຖະບານອົດສະຕຣາລີ, ໂດຍຜ່ານໂຄງການ BEQUAL ໄດ້ຈັດກອງປະຊຸມສໍາມະນາຂື້ນ ເປັນເວລາ 2 ວັນ ໃນວັນທີ 5-6 ທັນວາ 2023 ທີ່ຫ້ອງປະຊຸມສະຖາບັນຄົ້ນຄວ້າວິທະຍາສາດການສຶກສາ, ກະຊວງສຶກສາທິການ ແລະ ກິລາ ໂດຍການເປັນກຽດເຂົ້າຮ່ວມຂອງ ພະນະທ່ານ ຮສ.ປອ. ພຸດ ສິມມາລາວົງ , ລັດຖະມົນຕີກະຊວງສຶກສາທິການ ແລະ ກິລາ ແລະ ພະນະທ່ານ ໂພລ ເເຄລລີ, ເອກອັກຄະລັດຖະທູດອົດສະຕຣາລີປະຈຳ ສປປ ລາວ.

“ງານນີ້ໄດ້ຈັດຂື້ນເພື່ອລະນຶກວັນຄົນພິການສາກົນ ແລະ ສະແດງຄວາມມຸ່ງໝັ້ນ ແລະ ການຮ່ວມມືກັນ ລະຫວ່າງ ກະຊວງສຶກສາທິການ ແລະ ກິລາ ແລະ ລັດຖະບານ ອົດສະຕາລີ ເພື່ອສືບຕໍ່ແກ້ໄຂ ແລະ ປັບປຸງການເຂົ້າເຖິງການສຶກສາທີ່ມີຄຸນນະພາບຂອງເດັກພິການ” ພະນະທ່ານ ຮສ.ປອ. ພຸດ ສິມມາລາວົງ, ລັດຖະມົນຕີກະຊວງສຶກສາທິການ ແລະ ກິລາ ໄດ້ກ່າວໄວ້ ໃນພິທີເປີດກອງປະຊຸມ.

ພະນະທ່ານ ໂພລ ເເຄລລີ ກ່າວຕື່ມວ່າ “ການສຶກສາຮຽນຮ່ວມທີ່ລວມເອົາຄົນພິການແມ່ນບູລິມະສິດຫຼັກສໍາລັບລັດຖະບານອົດສະຕຣາລີ ແລະ ບັນຫາຂ້າມຜ່ານໃນໂຄງການຊ່ວຍເຫຼືອຂອງພວກເຮົາ. ອົດສະຕຣາລີ ໃຫ້ຄຳໝັ້ນສັນຍາຈະສະໜັບສະໜູນ ກະຊວງສຶກສາ ແລະ ກິລາ ໂດຍຜ່ານແຜນງານບີຄວາ (BEQUAL), ເພື່ອສະໜອງການສຶກສາຊັ້ນປະຖົມທີ່ມີຄຸນນະພາບໃຫ້ແກ່ເດັກນ້ອຍທຸກຄົນໃນລາວ, ໂດຍບໍ່ຈຳກັດດ້ານຄວາມສາມາດ ຫຼື ທາງດ້ານເພດຂອງເຂົາເຈົ້າ.”

ກອງປະຊຸມສໍາມະນາ ເປັນເວລາ 2 ວັນນີ້ ແມ່ນເພື່ອຍົກລະດັບຄວາມເຂົ້າໃຈ, ຄວາມຮູ້ ແລະ ຄວາມສາມາດ ທາງດ້ານການສຶກສາຮຽນຮ່ວມໃຫ້ແກ່ທີມງານຄູຝຶກບົດບາດຍິງຊາຍຂອງກະຊວງສຶກສາທິການ ແລະ ກິລາ ຈຳນວນ 35 ທ່ານທີ່ມາຈາກ 16 ກົມ ແລະ 2 ສູນ ພາຍໃນກະຊວງສຶກສາທິການ ແລະ ກີລາ. ນອກຈາກນັ້ນ, ຍັງມີບັນດາຄູ່ຮ່ວມງານຈາກອົງການຈັດຕັ້ງທາງສັງຄົມ, ອົງການຈັດຕັ້ງສາກົນບັນດາພະແນກການຂອງກະຊວງ ກໍ່ຄືບັນດາຄູ່ຮ່ວມພັດທະນາທີ່ກ່ຽວຂ້ອງ ແລະ ຜູ້ຕາງໜ້າຈາກອົງການຈັດຕັ້ງຄົນພິການ ກໍ່ໄດ້ເຂົ້າຮ່ວມງານດັ່ງກ່າວເພື່ອແລກປ່ຽນປະສົບການໃນການໃຫ້ການສະໜັບສະໜຸນເດັກທີ່ມີຂໍ້ຫຍຸ້ງຍາກໃນການຮຽນ ກໍ່ຄືເດັກທີ່ມີຄວາມບົກຜ່ອງທາງດ້ານຮ່າງກາຍ ເພື່ອຮັບຮູ້ວິທີທີ່ເດັກພິການສາມາດໄດ້ຮັບການສະຫນັບສະຫນຸນໃຫ້ຈະເລີນເຕີບໂຕໃນລະບົບການສຶກສາ.

ພາຍຫຼັງການກ່າວຄໍາປາໄສຂອງ ພະນະທ່ານ ຮສ.ປອ. ພຸດ ສິມມາລາວົງ ແລະ ພະນະທ່ານ ໂພລ ເເຄລລີ ແລ້ວ, ຜູ້ເຂົ້າຮ່ວມໃນງານ ກໍ່ໄດ້ທ່ຽວຊົມການວາງສະແດງສື່ການຮຽນ-ການສອນທີ່ຜະລິດໂດຍການຊ່ວຍເຫຼືອຂອງແຜນງານບີຄວາ, ຄູ່ຮ່ວມພັດທະນາ ແລະ ອົງການຈັດຕັ້ງຂອງຄົນພິການ. ຫຼັງຈາກຊົມການວາງສະແດງແລ້ວ ກໍ່ໄດ້ສືບຕໍ່ວາລະທາງວິຊາການ ເພື່ອຊຸກຍູ້ໃຫ້ທີມງານຄູຝຶກບົດບາດຍິງຊາຍ ສາມາດຜັນຂະຫຍາຍນະໂຍບາຍສູ່ພາກປະຕິບັດຕົວຈິງ. ກິດຈະກຳສຸດທ້າຍຂອງງານແມ່ນ ການສົນທະນາວິຊາການ ໂດຍນັກສຳມະນາກອນທີ່ມີປະສົບການໃນການຊ່ວຍເຫຼືອນັກຮຽນພິການ.

ອີກໜຶ່ງຈຸດປະສົງຂອງກອງປະຊຸມສໍາມະນາແມ່ນເພື່ອຮັບປະກັນໃຫ້ພະນັກງານທີ່ກ່ຽວຂ້ອງຈາກຂັ້ນກະຊວງມີຄວາມເຂົ້າໃຈຢ່າງເລິກເຊິ່ງກ່ຽວກັບສິ່ງທ້າທາຍຂອງເດັກພິການໃນລະບົບການສຶກສາ, ແລະ ການຮັບປະກັນການປົກປ້ອງເດັກ ແລະ ຮັກສາຄວາມປອດໄພສຳລັບເດັກທຸກຄົນໃນໂຮງຮຽນ.

ກອງປະຊຸມດັ່ງກ່າວ ຍັງສະໜັບສະໜູນໃຫ້ທີມຄູຝຶກບົດບາດຍິງຊາຍຂອງກະຊວງ ສ້າງເຄືອຂ່າຍຜູ້ຊ່ຽວຊານ ແລະ ຮ່ວມມືກັບອົງການຈັດຕັ້ງທີ່ເຂົາເຈົ້າສາມາດຮັບເອົາຄຳປຶກສາຫາລືກ່ຽວກັບວຽກງານຄົນພິການ.

ພະນະທ່ານ ຮສ.ປອ. ພຸດ ສິມມາລາວົງ ກ່າວວ່າ “ຄູອາຈານ ແມ່ນມີບົດບາດສຳຄັນຢ່າງຍິ່ງໃນການສົ່ງເສີມແນວຄວາມຄິດ “ບໍ່ປະໃຜ້ໄວ້ທາງຫຼັງ”. ໜ້າທີ່ຂອງພວກເຮົາ ແມ່ນເພື່ອຮັບປະກັນການຜັກດັນການນໍາເອົານະໂຍບາຍໄປປະຕິບັດຕົວຈິງ ແລະ ເນັ້ນໃຫ້ຄູໄດ້ຮັບການສະຫນັບສະຫນູນຢ່າງພຽງພໍສໍາລັບການພັດທະນາທັກສະ ແລະ ສະໜອງຄວາມຕ້ອງການທີ່ຫຼາກຫຼາຍຂອງຜູ້ຮຽນຢ່າງເໝາະສົມ ໂດຍບໍ່ຈຳແນກບົດບາດຍິງຊາຍ, ຊົນເຜົ່າ, ແລະ ຄວາມສາມາດ.”

ພະນະທ່ານ ພໍລ ເຄວລີ (Paul Kelly) ກ່າວວ່າ “ຄວາມພິການຖືວ່າເປັນບັນຫາຫຼັກໃນທົ່ວໂລກທີ່ກີດກັນການເຂົ້າເຖີງການສຶກສາ. ການສຶກສາຮຽນຮ່ວມຖືວ່າເປັນອີກທິດທາງໜຶ່ງທີ່ສຳຄັນຢ່າງຍິ່ງ ເພື່ອປ່ຽນແປງສັງຄົມ. ພວກເຮົາເຊື່ອວ່າອຳນວຍການ ແລະ ຄູອາຈານທີ່ມີປະສິດທິຜົນແລະການມີສ່ວນຮ່ວມຂອງຊຸມຊົນເປັນກະແຈເພື່ອຮັບປະກັນບົດຮຽນ ແລະ ໂຮງຮຽນແມ່ນແທດເໝາະສໍາລັບເດັກທຸກຄົນ, ໂດຍບໍ່ຈຳແນກຄວາມສາມາດ , ເພດ ຫຼື ຊົນເຜົ່າຂອງເຂົາເຈົ້າ.”

ນັກຮຽນໃນແຕ່ລະຫ້ອງຮຽນ ລ້ວນແລ້ວແຕ່ມີເອກະລັກຂອງໃຜລາວ, ເຊີ່ງຄູສອນຈະໄດ້ພົບກັບນັກຮຽນທີ່ມີ ພື້ນຖານດ້ານທັກສະ ທີ່ແຕກຕ່າງກັນ, ແລະ ມີເປົ້າໝາຍທີ່ຕ່າງກັນ. ການເປັນຄູທີ່ດີ ແມ່ນໝາຍເຖີງຄວາມອາດສາມາດໃນການປັບວິທີການສອນ ໃຫ້ສອດຄ່ອງກັບຄວາມຕ້ອງການທີ່ຫຼາກຫຼາຍຂອງຜູ້ຮຽນ. ຄວາມພິການ ແມ່ນເປັນພຽງອີກໜ້າວຽກໜຶ່ງ ທີ່ຄູ-ອາຈານຈະຕ້ອງໄດ້ເຂົ້າໃຈ ແລະ ສາມາດປັບວິທີການສອນ ເພື່ອຮັບປະກັນວ່ານັກຮຽນທຸກຄົນ ຈະໄດ້ມີສ່ວນຮ່ວມໃນການຮຽນຢ່າງເຕັມທີ່ ແລະ ຮູ້ສຶກຖືກຕ້ອນຮັບໃນຫ້ອງຮຽນ.

ພະນະທ່ານ ຮສ.ປອ. ພຸດ ສິມມາລາວົງ ຍັງໄດ້ກ່າວຕື່ມວ່າ: “ຂ້າພະເຈົ້າຫວັງຢ່າງຍິ່ງວ່າ ຈະມີຫ້ອງຮຽນຮ່ວມຫຼາຍຂຶ້ນ ເພື່ອຮອງຮັບກຸ່ມຜູ້ຮຽນຜູ້ທີ່ມີຂໍ້ຫຍຸ້ງຍາກ ຫຼື ບົກຜ່ອງດ້ານໜ້າທີ່ການໃດໜຶ່ງ ແລະ ເພື່ອສົ່ງເສີມໃຫ້ເຂົາເຈົ້າໄດ້ສະແດງສັກກະຍາພາບ ຫຼື ທ່າແຮງຂອງເຂົາເຈົ້າອອກມາ, ລວມເຖິງການໄດ້ຮັບໂອກາດໃນການເຂົ້າເຖິງການສຶກສາທີ່ມີຄຸນນະພາບ ໂດຍຜ່ານຄູສອນທີ່ມີທັກສະທີ່ຫຼາກຫຼາຍ”.