ກະຊວງສຶກສາທິການ ແລະ ກິລາ ແລະ ລັດຖະບານອົດສະຕຣາລີ ສະເຫຼີມສະຫຼອງຜົນສຳເລັດການປັບປຸງຫຼັກສູດຊັ້ນປະຖົມສຶກສາ

ໃນວັນທີ 14 ເດືອນ ທັນວາ ທີ່ຜ່ານມາ, ພະນະທ່ານ ຮສ. ປອ. ພຸດ ສິມມາລາວົງ, ລັດຖະມົນຕີກະຊວງສຶກສາທິການ ແລະ ກິລາ ພ້ອມດ້ວຍ ພະນະທ່ານ ໂພລ ແຄລີ, ເອກອັກຄະລັດຖະທູດອົດສະຕຣາລີ ປະຈຳ ສປປ ລາວ ໄດ້ເປັນປະທານຮ່ວມກັນໃນພິທີສະເຫຼີມສະຫຼອງຜົນສຳເລັດການປັບປຸງຫຼັກສູດຊັ້ນປະຖົມສຶກສາ. ພິທີດັ່ງກ່າວໄດ້ສະແດງໃຫ້ເຫັນເຖິງຄວາມພະຍາຍາມ ແລະ ຄວາມມຸ່ງໝັ້ນຂອງທຸກພາກສ່ວນຈາກກະຊວງສຶກສາທິການ ແລະ ກິລາ ໃນຂັ້ນສູນກາງ ແລະ ທ້ອງຖິ່ນ ພ້ອມດ້ວຍ ບັນດາຄູ່ຮ່ວມພັດທະນາ ທີ່ໄດ້ປະກອບສ່ວນໃນການປັບປຸງຫຼັກສູດ ແລະ ການຈັດຕັ້ງປະຕິບັດຫຼັກສູດດັ່ງກ່າວ.

ໃນພິທີດັ່ງກ່າວ ມີແຂກເຂົ້າຮ່ວມຫຼາຍກວ່າ 110 ທ່ານ, ໃນນັ້ນ ລວມມີການເຂົ້າຮ່ວມຂອງ ທ່ານ ນາງ ມິແຊວ ເອົ້າລໍ, ອຸປະທູດ ຈາກສະຖານທູດສະຫະລັດອາເມລິກາ ປະຈໍາ ສປປ ລາວ , ພະນະທ່ານ ອີນາ ມາຈູລໍນີແຕ, ເອກອັກຄະລັດຖະທູດ ສະຫະພາບເອີຣົບ ປະຈໍາ ສປປ ລາວ, ທ່ານ ໂຕຊິໂອ ນາກາເຊ, ຫົວໜ້າຫ້ອງການຜູ້ຕ່າງໜ້າອົງການ JICA. ພ້ອມດ້ວຍຜູ້ຕາງໜ້າຈາກກະຊວງສຶກສາທິການ ແລະ ກິລາ, ຜູ້ຕາງ ໜ້າຈາກພະແນກສຶກສາທິການ ແລະ ກິລາ ຈາກ 18 ແຂວງ. ຜູ້ຕາງໜ້າຈາກວິທະຍາໄລຄູ 8 ແຫ່ງ,ຜູ້ຕາງໜ້າຈາກບັນດາກະຊວງ, ຄູ່ຮ່ວມພັດທະນາ ແລະ ສື່ມວນຊົນຈາກຫຼາຍພາກສ່ວນ.

ລັດຖະບານແຫ່ງ ສປປ ລາວ ຮັບຮູ້ວ່າຄຸນນະພາບຂອງການສຶກສາເປັນພື້ນຖານຂອງປະເທດຊາດທີ່ຈະເລີນຮຸ່ງເຮືອງ ແລະ ສະຫງົບສຸກ. ການຮັບປະກັນໃຫ້ໄວໜຸ່ມໄດ້ຮັບການສະໜັບສະໜູນໃນໂຮງຮຽນເພື່ອໃຫ້ເຂົາເຈົ້າພັດທະນາສັກກາຍະພາບອັນເຕັມທີ່ຂອງເຂົາເຈົ້າແມ່ນການລົງທຶນອັນສຳຄັນໃນອະນາຄົດ. ໂດຍໄດ້ຮັບການສະໜັບສະໜູນຈາກລັດຖະບານອົດສະຕຣາລີ, ລັດຖະບານສະຫະລັດອາເມລິກາ ໂດຍຜ່ານອົງການພັດທະນາສາກົນຂອງປະເທດສະຫະລັດອາເມລິກາ, ສະຫະພາບເອີຣົບ ແລະ ລັດຖະບານຍີ່ປຸ່ນ ກະຊວງສຶກສາທິການ ແລະ ກິລາ ແຫ່ງ ສປປ ລາວ ໄດ້ລິເລີ່ມການປັບປຸງຫຼັກສູດຊັ້ນປະຖົມແຫ່ງຊາດ ໃນປີ 2017 ເຊິ່ງເປັນຍຸດທະສາດທີ່ສຳຄັນເພື່ອບັນລຸເປົ້າໝາຍດັ່ງກ່າວ. ຫຼັກສູດໃໝ່ ພ້ອມດ້ວຍສື່ການຮຽນການສອນທີ່ໄດ້ຮັບການປັບປຸງໃຫ້ດີຂຶ້ນ ໄດ້ຮັບການພັດທະນາ ຄຽງຄູ່ໄປກັບການຝຶກອົບຮົມໃຫ້ແກ່ຄູປະຈຳການຢ່າງຮອບດ້ານ. ຫຼັກສູດທີ່ທັນກັບສະພາບຕົວຈິງ ແລະ ສື່ການຮຽນການສອນໃໝ່ຈະປະກອບສ່ວນສຳຄັນເຂົ້າໃນການປັບປຸງຜົນການຮຽນຂອງເດັກນ້ອຍທຸກຄົນ ແລະ ຈະສ້າງກຳລັງແຮງງານທີ່ມີທັກສະ ແລະ ສາມາດແຂ່ງຂັນໃນຕະຫຼາດແຮງງານໄດ້.

ຫຼັກສູດສະບັບປັບປຸງໃໝ່ສຳລັບຂັ້ນ ປ.1 ໄດ້ເລີ່ມນຳໃຊ້ໃນເດືອນກັນຍາ ປີ 2019 ແລະ ມາຮອດປັດຈຸບັນການປັບປຸງຫຼັກສູດໃໝ່ໄດ້ສໍາເລັດແລ້ວ. ວິທີການຮຽນການສອນຂອງຂັ້ນ ປ.5 ໄດ້ຖືກນໍາໃຊ້ໃນຫ້ອງຮຽນນັບແຕ່ເດືອນ ກັນຍາ ປີ 2023 ເປັນຕົ້ນມາ.

ພະນະທ່ານ ຮສ. ປອ. ພຸດ ສິມມາລາວົງ ໄດ້ກ່າວວ່າ: “ການປັບປຸງຫຼັກສູດເປັນໜ້າວຽກໃຫຍ່ ແລະ ບໍ່ໄດ້ສາມາດຢຸດພັກໄດ້ເຖິງແມ່ນວ່າຈະຢູ່ໃນໄລຍະການແຜ່ລະບາດຂອງພະຍາດໂຄວິດ 19 ແລະ ການຈຳກັດການເດີນທາງສອງຄັ້ງກໍ່ຕາມ. ການປະຕິບັດຫຼັກສູດສະບັບປັບປຸງໃໝ່ໃນທົ່ວປະເທດແມ່ນຜົນສຳເລັດອັນສຳຄັນ ເພື່ອແນໃສ່ຍົກສູງຄຸນນະພາບການສຶກສາ ຢູ່ໃນ ສປປ ລາວ ແລະ ເປັນບຸລິມະສິດຂອງແຜນພັດທະນາຂະແໜງການສຶກສາທິການ ແລະ ກິລາ ຄັ້ງທີ 8 ແລະ ຄັ້ງທີ 9. ການປັບປຸງຫຼັກສູດຊັ້ນປະຖົມສຶກສາຂອງ ສປປ ລາວ ໃຫ້ທັນກັບສະພາບການ ເປັນສິ່ງຈຳເປັນຂັ້ນພື້ນຖານໃນການປັບປຸງຄຸນນະພາບການສຶກສາ, ເຊິ່ງໄດ້ສົ່ງຜົນກະທົບອັນດີຕໍ່ການປັບປຸງຫຼັກສູດສ້າງຄູປະຖົມ ແລະ ມາດຕະຖານການສອນແຫ່ງຊາດ. ການສະໜັບສະໜູນທີ່ແທດເໝາະກັບບົດບາດໜ້າທີ່ຂອງຄູແມ່ນບາດກ້າວສຳຄັນໃນການສ້າງກຳລັງແຮງງານທີ່ມີຄວາມສາມາດ ໂດຍຜ່ານລະບົບການສຶກສາທີ່ມີປະສິດທິພາບ. ປະຊາກອນທີ່ມີຄວາມຮູ້ຄວາມສາມາດແມ່ນມີຄວາມສໍາຄັນໃນການປະກອບສ່ວນເພື່ອບັນລຸເປົ້າໝາຍໃນການຫຼຸດພົ້ນອອກຈາກການເປັນປະເທດດ້ອຍພັດທະນາ ຂອງ ສປປ ລາວ ແລະ ບັນລຸເປົ້າໝາຍໃນການພັດທະນາເສດຖະກິດໃຫ້ຮຸ່ງເຮືອງໃນໄລຍະຍາວ.”

ທ່ານ ໂພລ ແຄລີ ໄດ້ກ່າວວ່າ “ການສຶກສາແມ່ນບຸລິມະສິດສູງສຸດຂອງລັດຖະບານອົດສະຕຣາລີ ໃນ ສປປ ລາວ ແລະ ເປັນການລົງທຶນອັນສຳຄັນໃນການພັດທະນາຊັບພະຍາກອນມະນຸດຂອງ ສປປ ລາວ ໄປສູ່ການເຕີບໂຕທາງດ້ານເສດຖະກິດຢ່າງເທົ່າທຽມ. ເປົ້າໝາຍຂອງພວກເຮົາແມ່ນເພື່ອໃຫ້ເດັກນ້ອຍໃນເກນອາຍຸເຂົ້າຮຽນຊັ້ນປະຖົມ ໃນ ສປປ ລາວ, ໂດຍສະເພາະແມ່ນຜູ້ທີ່ດ້ອຍໂອກາດ, ມີຄວາມຫ້າວຫັນປະກອບສ່ວນໃນການຮຽນຫຼາຍຂຶ້ນ ແລະ ມີຜົນການຮຽນທີ່ດີຂຶ້ນ ໂດຍການຮ່ວມມືກັບລັດຖະບານ ແຫ່ງ ສປປ ລາວ ແລະ ຄູ່ຮ່ວມພັດທະນາອື່ນໆ.”