ກະຊວງສຶກສາທິການ ແລະ ກິລາ ຮ່ວມກັບລັດຖະບານອົດສະຕຣາລີໄດ້ຈັດກອງປະຊຸມຝຶກອົບຮົມຜູ້ອຳນວຍການໂຮງຮຽນຊັ້ນປະຖົມສຶກສາໃນບັນດາແຂວງເປົ້າໝາຍ

ໃນຄວາມພະຍາຍາມເພື່ອຍົກສູງຄຸນນະພາບການສິດສອນ ແລະ ຜົນການຮຽນຂອງນັກຮຽນ, ກົມສ້າງຄູ ໂດຍການສະໜັບສະໜູນຈາກລັດຖະບານອົດສະຕາລີ ແລະ ອົງການສາກົນເພື່ອການພັດທະນາສະຫະລັດອາເມລີກາ (ອົງການ USAID) ຜ່ານແຜນງານບີຄວາ ໄດ້ຈັດກອງປະຊຸມຝຶກອົບຮົມເປັນເວລາ 5 ວັນໃຫ້ຜູ້ອຳນວຍການໂຮງຮຽນ. ກອງປະຊຸມແມ່ນແນໃສ່ສ້າງຄວາມເຂັ້ມແຂງໃຫ້ແກ່ຜູ້ອຳນວຍການໂຮງຮຽນໃຫ້ກາຍເປັນຜູ້ນໍາທີ່ມີປະສິດທິພາບ ໃນການສະຫນັບສະຫນູນການພັດທະນາອາຊີບຄູແບບຕໍ່ເນື່ອງໃຫ້ແກ່ຄູໃນໂຮງຮຽນ.

ການຝຶກອົບຮົມຈະຈັດຂຶ້ນໃນທ້າຍເດືອນ ມັງກອນ ຫາ ຕົ້ນເດືອນ ກຸມພາ 2024 ເຊິ່ງມີຄະນະຜູ້ອຳນວຍການໂຮງຮຽນເຂົ້າຮ່ວມທັງໝົດ 2.700 ຈາກ 30 ເມືອງເປົ້າໝາຍຂອງແຜນງານບິຄວາ. ທ່ານ ໄຊຍະພອນ ຈັນດາວົງ, ຄູຝຶກຂັ້ນແຂວງປະຈຳ ວິທະຍາໄລຄູຄັງໄຂ, ແຂວງ ຊຽງຂວາງ ໄດ້ກ່າວວ່າ: “ເມື່ອພວກເຮົາໄດ້ຝຶກໃຫ້ຄະນະຜູ້ອຳນວຍການໂຮງຮຽນ ໃຫ້ມີຄວາມເຂົ້າໃຈດີຂຶ້ນກ່ຽວກັບລະບົບການພັດທະນາວິຊາຊີບຄູແບບຕໍ່ເນື່ອງ ແລະ ສະໜອງເຄື່ອງມືທີ່ຈໍາເປັນໃຫ້ແກ່ເຂົາເຈົ້າ, ນັ້ນຖືວ່າພວກເຮົາໄດ້ສົ່ງເສີມ ແລະ ສ້າງຄວາມເຂັ້ມແຂງດ້ານການເປັນຜູ້ນຳໃຫ້ແກ່ເຂົາເຈົ້າ ເພື່ອສ້າງສະພາບແວດລ້ອມທີ່ຈະຊຸກຍູ້ການພັດທະນາວິຊາຊີບຄູແບບຕໍ່ເນື່ອງ ໃຫ້ເຕີບໃຫຍ່ຂະຫຍາຍຕົວໄປພ້ອມກັບທັກສະຂອງຄູ. ປັດໄຈເຫຼົ່ານີ້ຈະມີຜົນກະທົບໂດຍກົງຕໍ່ການພັດທະນາຄຸນນະພາບການສອນ ແລະ ຜົນການຮຽນຂອງນັກຮຽນ”.

ທ່ານ ນາງ ໄໝມາລີ, ຜູ້ອຳນວຍການໂຮງຮຽນປະຖົມສົມບູນ ບ້ານ ນໍ້າຈາງ, ເມືອງຫຼວງນໍ້າທາ ໄດ້ສະແດງຄວາມຍິນດີໃນການເຂົ້າຮ່ວມການຝຶກອົບຮົມຄັ້ງນີ້ ໂດຍທ່ານໄດ້ກ່າວວ່າ: “ໃນຖານະທີ່ເປັນຜູ້ອໍານວຍການໂຮງຮຽນ, ຂ້າພະເຈົ້າເຂົ້າໃຈບົດບາດສໍາຄັນຂອງຕົນໃນການສະຫນັບສະຫນູນ ການພັດທະນາວິຊາຊີບຄູແບບຕໍ່ເນື່ອງໃຫ້ແກ່ຄູຢູ່ໂຮງຮຽນຂອງຂ້າພະເຈົ້າ, ກອງປະຊຸມນີ້ ຈະເຮັດໃຫ້ພວກເຮົາໄດ້ຮັບຄວາມຮູ້ ແລະ ທັກສະທີ່ພວກເຮົາຕ້ອງການເພື່ອສ້າງສະພາບແວດລ້ອມທີ່ເອື້ອອໍານວຍສໍາລັບການພັດທະນາວິຊາຊີບຄູແບບຕໍ່ເນື່ອງ, ເຊິ່ງໃນນັ້ນຈະມີຜົນກະທົບດ້ານດີຕໍ່ປະສົບການການຮຽນຮູ້ຂອງນັກຮຽນໃນໂຮງຮຽນພວກເຮົາ.”

ກອງປະຊຸມແມ່ນຈະນຳສະເໜີຫົວຂໍ້ຕ່າງໆທີ່ມີຄວາມສຳຄັນເຊັ່ນ: ຄວາມເຂົ້າໃຈກ່ຽວກັບການພັດທະນາວິຊາຊີບຄູແບບຕໍ່ເນື່ອງ, ຫຼັກສູດຊັ້ນປະຖົມສຶກສາ, ພາລະບົດບາດຂອງຜູ້ອຳນວຍການ ແລະ ຄວາມຮັບຜິດຊອບຂອງຄູທີ່ກ່ຽວຂ້ອງກັບການພັດທະນາວິຊາຊີບຄູແບບຕໍ່ເນື່ອງ, ຍຸດທະສາດເພື່ອສ້າງສະພາບແວດລ້ອມທີ່ເອື້ອອຳນວຍຕໍ່ການພັດທະນາວິຊາຊີບຄູແບບຕໍ່ເນື່ອງ. ພ້ອມທັງ ເນັ້ນໃສ່ການສ້າງຄວາມເຂົ້າໃຈລະຫວ່າງຜູ້ອຳນວຍການ ແລະ ຄູສອນ, ຊຸກຍູ້ການເຮັດວຽກເປັນທີມໃຫ້ມີປະສິດທິຜົນ, ນຳໃຊ້ເຕັກນິກການຮຽນຮູ້ດ້ວຍການປະຕິບັດຕົວຈິງ ແລະ ຄົ້ນຄວ້າຍຸດທະສາດການປະເມີນຜົນ.

ສະທ້ອນໃຫ້ເຫັນເຖິງຜົນໄດ້ຮັບທີ່ຄາດໄວ້ຂອງກອງປະຊຸມ, ທ່ານ ນາງ ສົມວິໄລ ອຸພະໄຊ ຄູຝຶກຂັ້ນແຂວງປະຈຳ ພະແນກສຶກສາທິການ ແລະ ກິລາແຂວງສະຫວັນນະເຂດໄດ້ປະກອບຄຳເຫັນວ່າ: “ໃນຕອນທ້າຍຂອງກອງປະຊຸມນີ້, ຜູ້ອໍານວຍການຈະໄດ້ຮັບຊຸດອຸປະກອນເພື່ອຊ່ວຍໃຫ້ມີຄວາມເຂົ້າໃຈຢ່າງເລິກເຊິງກ່ຽວກັບການພັດທະນາວິຊາຊີບຄູແບບຕໍ່ເນື່ອງ ເພື່ອໃຫ້ເຂົາເຈົ້າສາມາດກໍານົດວິທີໃຫ້ການຊ່ວຍເຫຼືອຄູໃນຕົວຈິງ ແລະ ບັນດາສື່ຕ່າງໆທີ່ມີຢູ່ເພື່ອນຳໃຊ້ໃນການຝຶກຄູດ້ານການພັດທະນາວິຊາຊີບຄູແບບຕໍ່ເນື່ອງ.”