ຮອງລັດຖະມົນຕີ ສສກ ໂດຍການສະໜັບສະໜູນຈາກ ລັດຖະບານອົດສະຕຣາລິ ລົງມອບອຸປະກອນຮັບໃຊ້ການຮຽນການສອນ ແລະ ເຄື່ອງອຸປະໂພກ ແລະ ບໍລິໂພກ ໃຫ້ໂຮງຮຽນເຂດຫ່າງໄກສອກຫຼີກ ຢູ່ ເມືອງພີນ ແຂວງສະຫວັນນະເຂດ

ໃນລະຫວ່າງວັນທີ 10-12 ພະຈິກ 2024 ທ່ານ ປອ. ສໍາລານ ພັນຄະວົງ ຮອງລັດຖະມົນຕີກະຊວງສຶກສາທິການ ແລະ ກິລາ, ພ້ອມດ້ວຍຄະນະນໍາຈາກກົມແຜນການ ແລະ ຫ້ອງການກະຊວງ ໄດ້ນຳພາຄະນະຊາວໜຸ່ມກົມແຜນການ ກະຊວງສຶກສາທິການ ແລະ ກິລາ, ຊາວໜຸ່ມພະແນກສຶກສາທິການ ແລະ ກິລານະຄອນຫຼວງ ແລະ ວິທະຍາໄລຄູດົງຄໍາຊ້າງ ລົງພົບປະ ແລະ ມອບເຄື່ອງອຸປະກອນການຮຽນ, ປື້ມແບບຮຽນ, ອຸປະກອນກິລາ, ເຄື່ອງນຸ່ງຫົ່ມ, ເຄື່ອງອຸປະໂພກ ແລະ ເຄື່ອງບໍລິໂພກ ໃຫ້ແກ່ໂຮງຮຽນທີ່ຂາດເຂີນ ຢູ່ເຂດຫ່າງໄກສອກຫຼີກ ຂອງເມືອງພີນ ແຂວງສະຫວັນນະເຂດ.

ໃນການລົງມອບເຄື່ອງດັ່ງກ່າວ, ໄດ້ຈັດຂຶ້ນໃນວັນທີ 11 ພະຈິກ 2024 ພາຍໃຕ້ການນໍາພາຂອງທ່ານ ປອ. ສຳລານ ພັນຄະວົງ, ຮອງລັດຖະມົນຕີ ກະຊວງສຶກສາທິການ ແລະ ກິລາ, ທ່ານ ສີທອງ ສີຂາວ, ວ່າການແທນຫົວໜ້າກົມແຜນການ ກະຊວງສຶກສາທິການ ແລະ ກິລາ, ທ່ານຮອງຫົວໜ້າຫ້ອງການກະຊວງ ສສກ, ຫົວໜ້າພະແນກສຶກສາທິການ ແລະ ກິລາແຂວງ, ຜູ້ອຳນວຍການ-ຮອງຜູ້ອຳນວຍການວິທະຍາໄລດົງຄຳຊ້າງ, ຮອງເຈົ້າເມືອງ ເມືອງພີນ, ຫົວໜ້າຫ້ອງການສຶກສາທິການ ແລະ ກິລາເມືອງ ພີນ, ຄະນະຊາວໜຸ່ມກົມແຜນການ ຕະຫຼອດຮອດພະນັກງານ ແລະ ພາກສ່ວນທີ່ກ່ຽວຂ້ອງຂອງເມືອງພີນເຂົ້າຮ່ວມ.

ເຄື່ອງທີ່ນໍາມາມອບໃນຄັ້ງນີ້ ແມ່ນໄດ້ມາຈາກການບໍລິຈາກຂອງກະຊວງສຶກສາທິການ ແລະ ກິລາ, ລັດຖະບານອົດສະຕຣາລີ ໂດຍຜ່ານແຜນງານບີຄວາ, ວິທະຍາໄລດົງຄຳຊ້າງ, ສະຖານການສຶກສາທັງພາກລັດ ແລະ ເອກະຊົນ ໃນນະຄອນຫຼວງວຽງຈັນເຊັ່ນ: ໂຮງຮຽນ ມສ ວຽງຈັນ, ມສ ບໍ່ນາງົວ, ອະນຸບານ ດາຣາ ແລະ ໂຮງຮຽນອະນຸບານທະນາຄານ ຊຶ່ງປະກອບມີເຄື່ອງຄອມພິວເຕີ, ເຄື່ອງສາຍ LCD, ປຶ້ມແບບຮຽນ, ຄູ່ມືຄູ, ປຶ້ມຂຽນ, ບິກ, ສໍດໍາ, ເຄື່ອງນຸ່ງ ແລະ ອຸປະກອນກິລາຈໍານວນໜຶ່ງ. ນອກນັ້ນ, ການລົງເຄື່ອນໄຫວກິດຈະກໍາໃນຄັ້ງນີ້ ຍັງໄດ້ຮັບການສະໜັບສະໜູນທາງດ້ານງົບປະມານຈາກຜູ້ປະກອບການຈໍານວນໜຶ່ງ ເພື່ອເປັນຄ່າໃຊ້ຈ່າຍເຂົ້າໃນການຊື້ອຸປະກອນກິລາ ແລະ ຄ່າເດີນທາງ.

ທ່ານ ປອ. ສໍາລານ ພັນຄະວົງ ໄດ້ກ່າວວ່າ: “ລັດຖະບານລາວຮັບຮູ້ວ່າ ເດັກທຸກຄົນມີສິດໄດ້ຮັບການສຶກສາທີ່ມີຄຸນນະພາບ. ການສຶກສາຂັ້ນພື້ນຖານທີ່ມີຄຸນນະພາບແມ່ນຄວາມຕ້ອງການພື້ນຖານຂອງປະເທດທີ່ຈະເລີນຮຸ່ງເຮືອງ ແລະ ມີສັນຕິພາບ. ຂໍສະແດງຄວາມຂອບໃຈມາຍັງຄະນະຊາວໜຸ່ມກົມແຜນການ, ພະແນກສຶກສາທິການ ແລະ ກິລາ ນະຄອນຫຼວງວຽງຈັນ ແລະ ບັນດາໂຮງຮຽນຕ່າງໆໃນນະຄອນຫຼວງວຽງຈັນ ພ້ອມດ້ວຍທຸກພາກສ່ວນ ທີ່ໄດ້ໃຫ້ການສະໜັບສະໜູນຊ່ວຍເຫຼືອທາງດ້ານການເງິນ ແລະ ວັດຖຸອຸປະກອນຕ່າງໆໃນການມອບເຄື່ອງຊ່ວຍເຫຼືອໃນຄັ້ງນີ້. ແລະ ຂ້າພະເຈົ້າກໍຂໍສະແດງຄວາມຂອບໃຈມາຍັງ ລັດຖະບານອົດສະຕຣາລີ ໂດຍຜ່ານແຜນງານບີຄວາ ທີ່ໄດ້ປະກອບສ່ວນມອບເຄື່ອງອຸປະກອນ ແລະ ສື່ການຮຽນການສອນຈໍານວນໜຶ່ງ ເພື່ອຊ່ວຍສົ່ງເສີມວຽກງານການພັດທະນາການສຶກສາຢູ່ເຂດຫ່າງໄກສອກຫຼີກ.”

ທ່ານ ປອ. ສໍາລານ ພັນຄະວົງ ແລະ ຄະນະຜູ້ແທນ ໄດ້ມອບປຶ້ມແບບຮຽນ, ຄູ່ມືຄູ, ປຶ້ມ, ບິກ, ສໍ, ປຶ້ມນິທານ, ອຸປະກອນກິລາ ແລະ ເຄື່ອງນຸ່ງຫົ່ມ ໃຫ້ແກ່ໂຮງຮຽນທີ່ໄດ້ໄປຢ້ຽມຢາມ ແລະ ຍັງໄດ້ພົບປະກັບບັນດາຄູອາຈານທີ່ສອນຢູ່ໃນເຂດຫ່າງໄກສອກຫຼີກ ເພື່ອປຸກລະດົມຈິດໃຈ ໃຫ້ສິດສອນນ້ອງນັກຮຽນຢ່າງເປັນປົກກະຕິ ແລະ ສືບຕໍ່ປັບປຸງວຽກງານພັດທະນາການສຶກສາໃນທ້ອງຖິ່ນຕົນໃຫ້ໄດ້ດີຂຶ້ນເລື້ອຍໆ. ນອກຈາກນີ້, ຄະນະຜູ້ແທນຍັງໄດ້ໂອ້ລົມພົບປະກັບບັນດາຜູ້ບໍລິຫານການສຶກສາຢູ່ຂັ້ນເມືອງ ໂດຍໄດ້ແລກປ່ຽນ ແລະ ປຶກສາກ່ຽວກັບການຝຶກອົບຮົມຫຼັກສູດຊັ້ນປະຖົມສະບັບປັບປຸງ ໃໝ່ ທີ່ໄດ້ຮັບການສະໜັບສະໜູນຈາກລັດຖະບານອົດສະຕຣາລີ.

ໃນໂອກາດໄດ້ລົງຊຸກຍູ້-ມອບເຄື່ອງໃນໂຮງຮຽນມັດທະຍົມຕອນຕົ້ນ ຊົນເຜົ່າ ໃນຄັ້ງນີ້ ທ່ານວ່າການແທນຫົວໜ້າກົມແຜນການ ກະຊວງສຶກສາທິການ ແລະ ກິລາ ໄດ້ມອບເງິນຈຳນວນ 10,000,000 ກີບ ເພື່ອປະກອບສ່ວນເຂົ້າໃນການສະໜອງນໍ້າສະອາດໃຫ້ແກ່ໂຮງຮຽນ. ເງິນປະກອບສ່ວນດັ່ງກ່າວນີ້ ແມ່ນໄດ້ມາຈາກການປະກອບສ່ວນຂອງຜູ້ປະກອບການຕ່າງໆ. ການຊຸກຍູ້ຊ່ວຍເຫຼືອໃນຄັ້ງນີ້, ກໍແມ່ນເປັນບາດກ້າວທີ່ສຳຄັນໃນຄວາມມຸ່ງມາດປາດຖະໜາ ໃນການສະໜອງນ້ຳສະອາດໃຫ້ແກ່ໂຮງຮຽນຕາມການສະເໜີຂອງຄະນະອຳນວຍການໂຮງຮຽນ ເພື່ອໃຫ້ນັກຮຽນໄດ້ມີນໍ້າສະອາດໃຊ້ຖືກຕາມລັກສຸຂະອະນາໄມ. ເຊິ່ງໂຮງຮຽນ ມຕ ຊົນເຜົ່າ ແຫ່ງນີ້ ຖືວ່າເປັນໂຮງຮຽນທີ່ຂາດເຂີນ ຢູ່ເຂດຫ່າງໄກສອກຫຼີກ, ເປັນໂຮງຮຽນກິນນອນທີ່ມີນັກຮຽນອາໃສ່ຢູ່ໃຊ້ຊີວິດຮ່ວມກັນ.