ລັດຖະບານອົດສະຕຣາລີ ແລະ ອົງການ USAID ສະໜັບສະໜູນກະຊວງສຶກສາທິການ ແລະ ກິລາ ດ້ວຍການນຳໃຊ້ອຸປະກອນເຕັກໂນໂລຊີທີ່ທັນສະໄໝເພື່ອການສື່ສານເຂົ້າໃນລະບົບການພັດທະນາວິຊາຊີບຄູ

ທ່ານ ເກດ ພັນລັກ, ຫົວໜ້າກົມສ້າງຄູ ໄດ້ກ່າວວ່າ: “ຍັງມີຄວາມຫຍຸ້ງຍາກຫຼາຍຢ່າງຕໍ່ການເຂົ້າເຖິງສື່ການຮຽນການສອນແບບດີຈີຕອນ ເຊັ່ນ: ຄອມພິວເຕີ ແລະ ອິນເຕີເນັດ ເຊັ່ນດຽວກັບການພັດທະນາຄວາມສາມາດດ້ານວິຊາການໃນການນຳໃຊ້ເຄື່ອງມືດັ່ງກ່າວ. ການສະໜັບສະໜູນຈາກລັດຖະບານອົດສະຕຣາລີ ແລະ ອົງການ USAID ໂດຍຜ່ານແຜນງານບີຄວາ ແມ່ນເປັນສິ່ງທີ່ດີ ເພື່ອຊ່ວຍເຫຼືອທີມງານດ້ານວິຊາການຈາກວິທະຍາໄລຄູ ແລະ ທີມງານຜູ້ເຮັດວຽກສຶກສານິເທດ ດ້ານອຸປະກອນ ແລະ ການຈັດການຝຶກອົບຮົມ ຈະຊ່ວຍພັດທະນາບັນດາທັກສະພຶ້ນຖານດ້ານເຕັກນິກ ເພື່ອຮູ້ນຳໃຊ້ສື່ການການຮຽນການສອນທີ່ເປັນດີຈີຕອນ”.

ພະນັກງານຫ້ອງການສຶກສາທິການ ແລະ ກິລາເມືອງ ຈະໃຊ້ແທັບແລັດໃນລະຫວ່າງການລົງຕິດຕາມໂຮງຮຽນເພື່ອເກັບກໍາຂໍ້ມູນກ່ຽວກັບການຈັດຕັ້ງປະຕິບັດລະບົບການພັດທະນາວິຊາຊີບຄູແບບຕໍ່ເນື່ອງ. ທີມງານດ້ານວິຊາການວິທະຍາໄລຄູ ຈະໃຊ້ແທັບເລັດເພື່ອສະຫນອງການສະຫນັບສະຫນູນຢ່າງຕໍ່ເນື່ອງໃຫ້ແກ່ຜູ້ເຮັດວຽກສຶກສານິເທດພາຍໃນຈາກທາງໄກ ໂດຍໃຊ້ຊ່ອງທາງ ຜ່ານຊູມ (Zoom) ແລະ ວອັດແອັບ (WhatsApp). ແທັບເລັດຍັງຈະຊ່ວຍໃຫ້ພວກເຂົາສາມາດສົ່ງຕໍ່ສື່ການຮຽນການສອນໃຫ້ແກ່ທີມງານຜູ້ເຮັດວຽກສຶກສານິເທດພາຍໃນ ແລະ ຮ່ວມມືກັບພະນັກງານຫ້ອງການສຶກສາທິການ ແລະ ກິລາເມືອງ ເພື່ອໃຫ້ການຊ່ວຍເຫຼືອຢ່າງຫຼາກຫຼາຍ ແລະ ເອົາໃຈໃສ່ໃຫ້ແກ່ທີມເຮັດວຽກສຶກສານິເທດພາຍໃນ. ນອກຈາກນັ້ນ, ທີມງານວິຊາການຍັງສາມາດໃຊ້ແທັບເລັດເຂົ້າໃນການຝຶກການພັດທະນາວິຊາຊີບຄູແບບຕໍ່ເນື່ອງຂອງດ້ວຍການຮຽນຮູ້ແບບດິຈິຕອນ.

ພາກສ່ວນອື່ນໆຂອງການຝຶກອົບຮົມປະກອບດ້ວຍການລົງເລິກລາຍລະອຽດໃນປຶ້ມຄູ່ມືຄູ ແລະ ການຮຽນຮູ້ດ້ວຍການປະຕິບັດຕົວຈິງ ໂດຍສະເພາະວິຊາພາສາລາວ, ຄະນິດສາດ ແລະ ວິທະຍາສາດ ແລະ ສິ່ງແວດລ້ອມ ແລະ ການແນະນຳວິທີການນຳໃຊ້ຄູ່ມືຄູສຳລັບການວາງແຜນ ແລະ ການສອນ. ການຝຶກອົບຮົມຍັງເນັ້ນໃສ່ທັກສະດ້ານວິຊາຊີບ ແລະ ທັດສະນະຄະຕິທີ່ດີ ລວມທັງການປົກປ້ອງ ເດັກ ແລະ ສະພາບແວດລ້ອມທີ່ມີຄວາມປອດໄພ.

ທ່ານ ເກດ ພັນລັກ ໄດ້ກ່າວສະຫຼຸບໃນຕອນທ້າຍວ່າ: “ທີມງານຜູ້ເຮັດວຽກສຶກສານິເທດພາຍໃນ ຈະເລີ່ມຕົ້ນໃຫ້ການຊ່ວຍເຫຼືອຄູຊັ້ນປະຖົມສຶກສາໃນທ້ອງຖິ່ນຂອງຕົນໃນໄລຍະເປີດສົກຮຽນໃໝ່ໃນເດືອນກັນຍານີ້. ເຂົາເຈົ້າຈະລົງໄປຕິດຕາມເພື່ອນທີ່ເປັນຄູດ້ວຍກັນໃນໂຮງຮຽນປະຖົມແຫ່ງອື່ນ ແລະ ໃຫ້ຄຳແນະນຳລາຍບຸກຄົນ ເພື່ອຊ່ວຍເຂົາເຈົ້າປັບປຸງທັກສະ ແລະ ຄວາມຮູ້ກ່ຽວກັບການສອນຂອງເຂົາເຈົ້າ. ຂອບໃຈທີ່ໄດ້ມີແທັບເລັດຊ່ວຍ, ພວກເຂົາເຈົ້າຈະສາມາດເຂົ້າເຖິງການສິດສອນ ແລະ ການຮຽນຮູ້ໄດ້ສະດວກຂຶ້ນເພື່ອສົ່ງຕໍ່ຄວາມຮູ້ດັ່ງກ່າວແກ່ບັນດາຄູ, ເປັນເຄື່ອງມືນຳໃຊ້ເຂົ້າໃນວຽກງານການພັດທະນາວິຊາຊີບຄູແບບຕໍ່ເນື່ອງ ແລະ ເຕັກນິກເພື່ອແກ້ໄຂສິ່ງທ້າທາຍທີ່ຄູອາດຈະພົບ.”