ການສ້າງໂຮງຮຽນທີ່ປອດໄພ: ກະຊວງສຶກສາທິການ ແລະ ກິລາ ຮ່ວມກັບລັດຖະບານອົດສະຕຣາລີ ສືບຕໍ່ຮ່ວມມືເພື່ອສ້າງຄວາມເຂັ້ມແຂງດ້ານການປົກປ້ອງ ແລະ ຮັກສາຄວາມປອດໄພສຳລັບເດັກໃນຊັ້ນປະຖົມສຶກສາ

ກະຊວງສຶກສາທິການ ແລະ ກິລາ ແຫ່ງ ສປປ ລາວ ໂດຍການສະໜັບສະໜູນຈາກລັດຖະບານອົດສະຕຣາລີ ໂດຍຜ່ານແຜນງານບີຄວາ, ກຳລັງຈັດການຝຶກອົບຮົມຫົວຂໍ້ໃໝ່ກ່ຽວກັບການປົກປ້ອງ ແລະ ຮັກສາຄວາມປອດໄພສຳລັບເດັກ ໃນ 3 ວິທະຍາໄລຄູ (ວຄ). ກິດຈະກຳນີ້ສະທ້ອນໃຫ້ເຫັນເຖິງຄວາມມຸ່ງໝັ້ນຢ່າງຕໍ່ເນື່ອງຂອງກະຊວງສຶກສາທິການ ແລະ ກິລາ ແລະ ລັດຖະບານອົດສະຕຣາລີ ໃນການຮັບປະກັນຄວາມປອດໄພ ແລະ ສະຫວັດດີພາບຂອງນັກຮຽນທຸກຄົນໃນລະບົບການສຶກສາ. 

ການຝຶກອົບຮົມຮອບໃໝ່ນີ້, ໄດ້ຈັດຂຶ້ນໃນເດືອນກໍລະກົດ ແລະ ສິງຫາ 2025, ເປົ້າໝາຍແມ່ນແນໃສ່ຝຶກອົບຮົມໃຫ້ແກ່ນັກສຶກສາຕໍ່ເນື່ອງພາກພັກແລ້ງຈຳນວນ 737 ຄົນ ທີ່ກຳລັງຮຽນໃນວິທະຍາໄລຄູຄັງໄຂ, ວິທະຍາໄລຄູສະຫວັນນະເຂດ ແລະ ວິທະຍາໄລຄູຫຼວງນໍ້າທາ. ນັກຮຽນທີ່ມາຮ່ວມນີ້ແມ່ນຄູສອນຊັ້ນປະຖົມສຶກສາທີ່ເຂົ້າຮ່ວມຫຼັກສູດເພື່ອຍົກລະດັບວິຊາຊີບຂອງເຂົາເຈົ້າ. ເຂົາເຈົ້າຈະໄດ້ນຳເອົາຄວາມຮູ້ ແລະ ທັກສະໃໝ່ໆ ໄປໃຊ້ໃນໂຮງຮຽນຂອງຕົນ. 

ບົນພື້ນຖານຄວາມສຳເລັດຈາກການສ້າງເອກະສານ ແລະ ເນັ້ນໜັກໃຫ້ເຫັນເຖິງຂໍ້ຄວາມໃນເອກະສານ “ຄູ່ມືການປົກປ້ອງ ແລະ ຮັກສາຄວາມປອດໄພຂອງເດັກສຳລັບຄູ”, ທີ່ໄດ້ຮັບການພັດທະນາໂດຍ ພະແນກຄວາມກ້າວໜ້າແມ່ຍິງ, ແມ່ ແລະ ເດັກ, ຫ້ອງການກະຊວງສຶກສາທິການ ແລະ ກິລາ ແລະ ໄດ້ຮັບການສະໜັບສະໜູນຈາກລັດຖະບານອົດສະຕຣາລີ. ເອກະສານແນະນຳນີ້ໄດ້ຖືກແຈກຢາຍຢ່າງກວ້າງຂວາງ ແລະ ຍັງເປັນເຄື່ອງມືສຳຄັນໃນການຊ່ວຍຄູສ້າງສະພາບແວດລ້ອມການຮຽນຮູ້ທີ່ປອດໄພ.

ທ່ານ ນາງ ວົງເດືອນ ໂອໃສ, ຫົວໜ້າກົມສ້າງຄູ ໄດ້ໃຫ້ຄຳເຫັນວ່າ: “ຄູມີບົດບາດສຳຄັນໃນການປົກປ້ອງເດັກ ໂດຍການເປັນຜູ້ນຳ, ໃຫ້ການສະໜັບສະໜູນ ແລະ ເຂົ້າໃຈພາລະບົດບາດຂອງຕົນ. ສະພາບແວດລ້ອມການຮຽນຮູ້ທີ່ພວກເຂົາສ້າງຂຶ້ນ ມີຜົນກະທົບໂດຍກົງຕໍ່ຄວາມປອດໄພ ແລະ ສະຫວັດດີພາບຂອງນັກຮຽນ. ເມື່ອເດັກຮູ້ສຶກປອດໄພ, ພວກເຂົາຈະມີໂອກາດສຳເລັດຫຼາຍຂຶ້ນໃນການຮຽນ.” 

ທ່ານ ນາງ ວາເນັດຊາ ເຮັກກາທີ, ເລຂາເອກ, ສະຖານທູດອົດສະຕຣາລີ ປະຈຳ ສປປ ລາວ ໄດ້ເນັ້ນ ໜັກກ່ຽວກັບການຮ່ວມມືຢ່າງຕໍ່ເນື່ອງວ່າ: “ເມື່ອເຮັດວຽກກັບເດັກນ້ອຍ, ພວກເຮົາມີພາລະບົດບາດຮ່ວມກັນໃນການປົກປ້ອງສຸຂະພາບທາງດ້ານຮ່າງກາຍ ແລະ ຈິດໃຈຂອງເຂົາເຈົ້າ. ພວກເຮົາພູມໃຈທີ່ໄດ້ຮ່ວມມືກັບກະຊວງສຶກສາທິການ ແລະ ກິລາ ໂດຍຜ່ານແຜນງານບີຄວາ ເພື່ອສະໜັບສະໜູນການພັດທະນາ ‘ເອກະສານແນະນຳ ການປົກປ້ອງ ແລະ ຮັກສາຄວາມປອດໄພຂອງເດັກສຳລັບ’ ຢ່າງເປັນທາງການ, ພ້ອມທັງຝຶກອົບຮົມຄູໃນຫົວຂໍ້ສຳຄັນນີ້.” 

ການຝຶກອົບຮົມໃນປີ 2025 ນີ້ ໄດ້ຮັບການນຳພາໂດຍທີມຄູຝຶກ 17 ທ່ານ ຈາກທີມສະເພາະກິດດ້ານຄວາມສະເໝີພາບລະຫວ່າງຍິງ-ຊາຍ ແລະ ການສຶກສາຮຽນຮ່ວມ ຂອງ 3 ວິທະຍາໄລຄູ. ນອກຈາກການຍົກສູງຄວາມຮັບຮູ້ໃຫ້ແກ່ນັກຮຽນຕໍ່ເນື່ອງພາກພັກແລ້ງ, ການຝຶກອົບຮົມນີ້ຍັງເປັນໂອກາດອັນດີໃນການທົດລອງໃຊ້ “ຄູ່ມືຝຶກອົບຮົມການປົກປ້ອງ ແລະ ຮັກສາຄວາມປອດໄພຂອງເດັກ”  ແລະ ສ້າງທັກສະການຝືກອົບຮົມຂອງທີມຄວາມສະເໝີພາບລະຫວ່າງຍິງ-ຊາຍ ແລະ ການສຶກສາຮຽນຮ່ວມ. 

ທ່ານ ນາງ ວົງເດືອນ ໂອໃສ ໄດ້ກ່າວຍ້ຳອີກວ່າ: “ການຝຶກອົບຮົມນີ້ຊ່ວຍໃຫ້ຄູເຂົ້າໃຈຢ່າງຊັດເຈນກ່ຽວກັບບົດບາດຂອງຕົນໃນການຮັບປະກັນຄວາມປອດໄພ ແລະ ໃຫ້ຂໍ້ມູນຈຳເປັນກ່ຽວກັບວິທີລາຍງານຂໍ້ກັງວົນ ແລະ ເຂົ້າເຖິງການຂໍຄວາມຊ່ວຍເຫຼືອ. ນອກຈາກນີ້, ຍັງເປັນໂອກາດທີ່ດີໃນການທົດລອງໃຊ້ຄູ່ມືຄູຝຶກ. ພວກເຮົາຈະນຳເອົາຄຳເຫັນທີ່ໄດ້ຮັບມາປັບປຸງເອກະສານຕາມຄວາມຈຳເປັນກ່ອນຈະຂະຫຍາຍການຝຶກອົບຮົມໃຫ້ກວ້າງຂວາງຕື່ມ.”

ກອງປະຊຸມສຳມະນາແບບມີສ່ວນຮ່ວມ 2 ວັນ ທີ່ຈັດຂຶ້ນໂດຍແຕ່ລະວິທະຍາໄລຄູ ໄດ້ນຳໃຊ້ເກມ, ການສະແດງບົດບາດສົມມຸດ, ກໍລະນີສຶກສາ ແລະ ການສົນທະນາກຸ່ມ ເພື່ອສ້າງຄວາມຕື່ນເຕັ້ນໃຫ້ແກ່ຜູ້ເຂົ້າຮ່ວມ. ຜູ້ເຂົ້າຮ່ວມໄດ້ຄົ້ນຫາແນວຄວາມຄິດຫຼັກກ່ຽວກັບການປົກປ້ອງເດັກ ເຊັ່ນ: ການສື່ສານຢ່າງເຄົາລົບ, ການປະຕິບັດທີ່ປອດໄພ ແລະ ການຮຽນຮ່ວມຫ້ອງຮຽນ, ການໃຊ້ສື່ອີເລັກໂທຣນິກຢ່າງມີຄວາມຮັບຜິດຊອບ ແລະ ການຈຳແນກ ແລະ ປ້ອງກັນການລ່ວງລະເມີດ, ການຂູດຮີດ, ແລະ ການລົບກວນ. ຫົວຂໍ້ທີ່ລະອຽດອ່ອນ ເຊັ່ນ: ການໃຊ້ເຫຼົ້າ ແລະ ສານເສບຕິດ, ການຖ່າຍວິດີໂອ ແລະ ຮູບພາບເດັກ ແລະ ຄວາມຮັບຮູ້ກ່ຽວກັບທີ່ສົ່ງເສີມການຮຽນຮ່ວມ ໄດ້ຖືກນຳສະເໜີໃນລັກສະນະທີ່ເຄົາລົບວັດທະນະທຳ. 

ໃນຂະນະທີ່ຂະແໜງການສຶກສາຂອງ ສປປ ລາວ ຍັງຄົງພັດທະນາຢ່າງຕໍ່ເນື່ອງ, ຄວາມມຸ່ງໝັ້ນໃນການປົກປ້ອງ ແລະ ສະໜັບສະໜູນເດັກ ຍັງເປັນສິ່ງສຳຄັນທີ່ທຸກພາກສ່ວນຕ້ອງຮ່ວມມືກັນ. ການຝຶກອົບຮົມຄັ້ງລ່າສຸດນີ້ ໄດ້ເນັ້ນໜັກຄວາມສຳຄັນຂອງການສອນໃຫ້ເດັກຮູ້ຈັກຄວາມປອດໄພໃນທຸກຫ້ອງຮຽນ ແລະ ຮັບປະກັນວ່າຄູທຸກຄົນ, ບໍ່ວ່າຈະເປັນຄູໃໝ່ ຫຼື ມີປະສົບການ, ຈະມີຄວາມພ້ອມໃນການສ້າງສະພາບແວດລ້ອມການຮຽນຮູ້ທີ່ປອດໄພ ແລະ ເຄົາລົບກັນ. 

ທ່ານ ນາງ ວາເນັດຊາ ເຮັກກາທີ ກ່າວສະຫຼຸບໃນຕອນທ້າຍວ່າ: “ການປົກປ້ອງເດັກແມ່ນພັນທະຂອງທຸກຄົນ. ພວກເຮົາຫວັງວ່າ ‘ເອກະສານແນະນຳການປົກປ້ອງ ແລະ ຮັກສາຄວາມປອດໄພສຳລັບເດັກ’ ຈະຍັງເປັນແຫຼ່ງຂໍ້ມູນສຳຄັນສຳລັບຄູ ແລະ ນັກສຶກສາທຸກຄົນທີ່ເຮັດວຽກກັບເດັກ, ເພື່ອຊ່ວຍສ້າງສະພາບແວດລ້ອມການຮຽນຮູ້ທີ່ປອດໄພ ແລະ ສ້າງພື້ນທີ່ສຳລັບເດັກທຸກຄົນ. ການຮ່ວມມືກັບກະຊວງສຶກສາທິການ ແລະ ກິລາ ແລະ ແຜນງານບີຄວາ ຂອງພວກເຮົາຈະສືບຕໍ່ສຸມໃສ່ການຮັບປະກັນວ່າຫຼັກການເຫຼົ່ານີ້ຈະຖືກບູລະນະໃສ່ໃນລະບົບການສຶກສາ.”