English
Dr Anoulom Vilayphone, MoES and Ms Vanessa Hegarty, Australian Embassy observing the filming of the video on Spoken Lao activities
2 ວິດີໂອໃໝ່ ຫົວຂໍ້ “ວິທີການຄຸ້ມຄອງຫ້ອງຮຽນ” ແລະ “ວິທີການສອນບົດຮຽນຝຶກເວົ້າພາສາລາວ” ໄດ້ອອກອາກາດໃນເດືອນນີ້
ກະຊວງສຶກສາທິການ ແລະ ກິລາ (ສສກ) ສປປ ລາວ ໂດຍໄດ້ຮັບການສະໜັບສະໜູນຈາກລັດຖະບານອົດສະຕຣາລີ ໂດຍຜ່ານແຜນງານປັບປຸງຄຸນນະພາບ ແລະ ຂະຫຍາຍໂອກາດເຂົ້າຮຽນສຳລັບການສຶກສາຂັ້ນພື້ນຖານ ໃນ ສປປ ລາວ (ແຜນງານບີຄວາ) ໄດ້ຜະລິດວິດີໂອສຳລັບການພັດທະນາຄູໃໝ່ 2 ຕອນ ກ່ຽວກັບການຄຸ້ມຄອງຫ້ອງຮຽນ ແລະ ເຕັກນິກການສອນບົດຮຽນຝຶກເວົ້າພາສາລາວ ສຳລັບນັກຮຽນຊົນເຜົ່າທີ່ບໍ່ເວົ້າພາສາລາວລຸ່ມເປັນພາສາຫຼັກໃນຄອບຄົວ. ວິດີໂອແມ່ນຜະລິດໂດຍສະຖາບັນຄົ້ນຄວ້າວິທະຍາສາດການສຶກສາ (ສວສ) ແລະ ສອດຄ່ອງກັບສື່ການຝຶກອົບຮົມທີ່ພັດທະນາໂດຍກົມສ້າງຄູ ເພື່ອສະໜັບສະໜູນການພັດທະນາວິຊາຊີບຄູແບບຕໍ່ເນື່ອງ.
ທ່ານ ຮສ.ປອ ອານຸລົມ ວິໄລພອນ ຜູ້ອໍານວຍການ ສວສ ໄດ້ກ່າວວ່າ: “ຍັງມີຄູໃນ ສປປ ລາວ ຫຼາຍທ່ານ ທີ່ສອນຢູ່ເຂດຫ່າງໄກ ແລະ ພົບຄວາມຫຍຸ້ງຍາກໃນການສອນ. ເຂົາເຈົ້າພົບກັບສິ່ງທ້າທາຍຫຼາຍຢ່າງ ເຊັ່ນ: ນັກຮຽນຍັງບໍ່ສາມາດເວົ້າພາສາລາວໄດ້ດີເທື່ອເມື່ອເຂົາເຈົ້າເລີ່ມເຂົ້າໂຮງຮຽນ, ຫ້ອງຮຽນທີ່ແອອັດ ແລະ ຫ້ອງຮຽນທີ່ເປັນຫ້ອງຄວບ. ນັບຕັ້ງແຕ່ປີ 2019 ເປັນຕົ້ນມາ, ສວສ ໂດຍໄດ້ຮັບການສະໜັບສະໜູນຈາກລັດຖະບານອົດສະຕຣາລີ ໄດ້ຜະລິດວິດີໂອຫຼາກຫຼາຍຫົວຂໍ້ ເພື່ອຊ່ວຍໃຫ້ຄູໄດ້ຮັບຄຳແນະນຳ ແລະ ໄດ້ສາທິດວິທີການສິດສອນທີ່ມີປະສິດທິພາບ ຊຶ່ງສາມາດຕອບສິ່ງທ້າທາຍຂອງເຂົາເຈົ້າທີ່ພົບຫຼາຍທີ່ສຸດ. 2 ວິດີໂອໃໝ່ນີ້ ໄດ້ຖ່າຍທຳຢູ່ໃນຫ້ອງຮຽນຢູ່ເຂດຫ່າງໄກ ໃນເມືອງຄໍາ, ແຂວງຊຽງຂວາງ ແລະ ເມືອງໄຊທານີ, ນະຄອນຫຼວງວຽງຈັນ ເພື່ອສະແດງຕົວຢ່າງຕົວຈິງຂອງເຕັກນິກໃນການສອນ. ວິດີໂອຍັງຖືກແປພາສາມື ເພື່ອໃຫ້ສາມາດເຂົ້າເຖິງໄດ້ໂດຍຄູທຸກຄົນ”.
ຫົວຂໍ້ວິດີໂອສຳລັບການພັດທະນາຄູໄດ້ຖືກເລືອກເພື່ອຕອບສະໜອງກັບສິ່ງທ້າທາຍທີ່ຄູປະເຊີນໜ້າຫຼາຍທີ່ສຸດ ໂດຍອີງໃສ່ຄໍາຄິດເຫັນຈາກຄູ. ຄູສາມາດນໍາໃຊ້ວິດີໂອດັ່ງກ່າວເພື່ອກະກຽມບົດຮຽນ, ປັບປຸງວິທີການສອນຂອງເຂົາເຈົ້າ ແລະ ຮຽນຮູ້ ຫຼື ທົບທວນເຕັກນິກສະເພາະຕາມປື້ມຄູ່ມືຄູຂອງຫຼັກສູດສະບັບປັບປຸງໃໝ່. ຜູ້ເຮັດວຽກສຶກສານິເທດຂັ້ນເມືອງ ແລະ ຂັ້ນໂຮງຮຽນຍັງສາມາດນຳໃຊ້ວິດີໂອເຫຼົ່ານີ້ໃນເວລາໃຫ້ການຊ່ວຍເຫຼືອຄູ.
ທ່ານ ນາງ ວາເນັດຊ້າ ເຮັກກາທີ້ ເລຂາເອກ, ສະຖານທູດອົດສະຕຣາລີ ປະຈຳ ສປປ ລາວ ໄດ້ກ່າວວ່າ: “ລັດຖະບານອົດສະຕຣາລີ ແລະ ກະຊວງສຶກສາທິການ ແລະ ກິລາ ກຳລັງຮ່ວມມືກັນເພື່ອຮັບປະກັນໃຫ້ຄູໄດ້ຮັບການສະໜອງດ້ານຊັບພະຍາກອນ ແລະ ໄດ້ຮັບການສະໜັບສະໜູນໃຫ້ນຳໃຊ້ເຕັກນິກການສອນແບບໃໝ່. ລັດຖະບານອົດສະຕຣາລີ ເຊື່ອໝັ້ນເປັນຢ່າງຍິ່ງວ່າ ດ້ວຍສະຖານະການທີ່ຍັງຂາດແຄນຄູສອນໃນປະຈຸບັນ, ມັນເປັນສິ່ງສຳຄັນທີ່ຄູຄວນໄດ້ປະກອບຄຳເຫັນ, ບອກຄວາມຮູ້ສຶກ, ໄດ້ຮັບຄວາມເຂົ້າໃຈ ແລະ ທີ່ສຳຄັນທີ່ສຸດແມ່ນການໄດ້ຮັບການສະໜັບສະໜູນ. ນີ້ແມ່ນກຸນແຈເພື່ອແກ້ໄຂສິ່ງທ້າທາຍທີ່ເຂົາເຈົ້າປະເຊີນໃນເວລາສອນ ໂດຍສະເພາະແມ່ນຜູ້ທີ່ຢູ່ເຂດຫ່າງໄກ. ພວກເຮົາຢາກໃຫ້ຄູມີແຮງບັນດານໃຈ ແລະ ສ້າງຄວາມເຂັ້ມແຂງເພື່ອໃຫ້ເຂົາເຈົ້າຍຶດໝັ້ນຕໍ່ບົດບາດອັນສຳຄັນຂອງເຂົາເຈົ້າໃນການສິດສອນຄົນຮຸ່ນໃໝ່, ຜູ້ທີ່ຈະເປັນຜູ້ນຳ ແລະ ນັກຄົ້ນຄວ້າໃນອະນາຄົດ. ລັດຖະບານອົດສະຕຣາລີ ໄດ້ສະໜັບສະໜູນການພັດທະນາວິຊາຊີບຄູແບບຕໍ່ເນື່ອງ ເພື່ອໃຫ້ເຂົາເຈົ້າສາມາດປັບປຸງຄຸນນະພາບຂອງການສອນຂອງຕົນ”.
ຫົວຂໍ້ວິດີໂອສຳລັບການພັດທະນາຄູ ຕອນໃໝ່ທີ 24 ແມ່ນກ່ຽວກັບ “ການຄຸ້ມຄອງຫ້ອງຮຽນ”. ການຈັດການຫ້ອງຮຽນເປັນຍຸດທະສາດຫຼັກ ເພື່ອຮັບປະກັນໃຫ້ນັກຮຽນສາມາດເຮັດວຽກເປັນຢ່າງເອກະລາດ ແລະ ມີສ່ວນຮ່ວມຢ່າງຫ້າວຫັນໃນການຮຽນຮູ້. ນີ້ແມ່ນສິ່ງຈຳເປັນໃນ ສປປ ລາວ ຊຶ່ງຫຼາຍກວ່າໜຶ່ງສ່ວນສາມຂອງຂັ້ນຮຽນຊັ້ນປະຖົມສຶກສາແມ່ນເປັນຫ້ອງຄວບ. ທັກສະການຄຸ້ມຄອງຫ້ອງຮຽນຍັງມີຄວາມຈໍາເປັນເພື່ອສິດສອນວິທີການສອນທີ່ຖືເອົານັກຮຽນເປັນໃຈກາງຕາມຫຼັກສູດໃໝ່ຢ່າງມີປະສິດທິພາບ ຊຶ່ງຫຼັກສູດໄດ້ລວມມີ ເກມ, ກິດຈະກຳທີ່ປະຕິບັດຕົວຈິງ ແລະ ການເຮັດວຽກເປັນກຸ່ມ. ການຄຸ້ມຄອງຫ້ອງຮຽນທີ່ດີບໍ່ພຽງແຕ່ເຮັດໃຫ້ການສອນຂອງຄູງ່າຍຂຶ້ນເທົ່ານັ້ນ, ແຕ່ຍັງສາມາດມີຜົນສະທ້ອນທີ່ດີຕໍ່ການມີສ່ວນຮ່ວມທາງການຮຽນຂອງນັກຮຽນ ແລະ ຜົນການຮຽນຂອງນັກຮຽນ. ການຈັດສັນຫ້ອງຮຽນທີ່ດີໄດ້ສ້າງສະພາບແວດລ້ອມທີ່ກະຕຸ້ນການຮຽນຮູ້. ວິດີໂອໄດ້ສະແດງໃຫ້ເຫັນວິທີການຄຸ້ມຄອງຫ້ອງຮຽນຕາມ 6 ຄຳແນະນຳທີ່ສາມາດນຳໃຊ້ໄດ້ຢ່າງງ່າຍດາຍໂດຍຄູໃນທຸກຂັ້ນຮຽນຊັ້ນປະຖົມສຶກສາ ແລະ ໃນທຸກວິຊາ.
Production team getting ready in Xiangkhouang province for filming of the video on classroom management
How to manage outside activities is one of the techniques explained in TDV 24
ວິດີໂອສຳລັບການພັດທະນາຄູ ຕອນໃໝ່ທີ 25 ສະແດງໃຫ້ເຫັນວິທີການສອນ 3 ກິດຈະກຳຫຼັກຂອງບົດຮຽນຝຶກເວົ້າພາສາລາວ. ບົດຮຽນນີ້ຖືກພັດທະນາໂດຍ ສສກ ໂດຍການສະໜັບສະໜູນຈາກລັດຖະບານອົດສະຕຣາລີ ແລະ ໄດ້ນຳໃຊ້ໃນທົ່ວປະເທດໃນເດືອນກັນຍາ 2024 ນີ້. ວິດີໂອໄດ້ສະແດງໃຫ້ເຫັນເຕັກນິກທີ່ຄູສາມາດໃຊ້ ເພື່ອຊ່ວຍນັກຮຽນຂັ້ນ ປ.1 ທີ່ຍັງບໍ່ທັນເວົ້າພາສາລາວໄດ້ດີເທື່ອເມື່ອເລີ່ມເຂົ້າໂຮງຮຽນຊັ້ນປະຖົມສຶກສາ ເພື່ອພັດທະນາທັກສະພາສາລາວຂອງເຂົາເຈົ້າ. ວິດີໂອປະກອບມີ ພາກການສະທ້ອນຄືນໃຫ້ຄູຄິດເຖິງການປະຕິບັດຂອງຕົນເອງ ແລະ ວິທີການທີ່ເຂົາເຈົ້າຈະປັບປຸງການສອນຂອງເຂົາເຈົ້າ ເພື່ອຮັບປະກັນໃຫ້ນັກຮຽນເຂົ້າໃຈ ແລະ ພ້ອມກັນຮຽນຮູ້.
ທ່ານ ຮສ.ປອ ອານຸລົມ ວິໄລພອນ ໄດ້ກ່າວວ່າ: “ການສອນຫຼັກສູດໃໝ່ແມ່ນຍັງມີຄວາມທ້າທາຍສຳລັບຄູ. ບົດຮຽນຝຶກເວົ້າພາສາລາວ ຈະຊ່ວຍໃຫ້ເຂົາເຈົ້າເຂົ້າໃຈວິທີການຈັດຕັ້ງປະຕິບັດກິດຈະກຳຫຼັກໃນແຕ່ລະບົດຮຽນຢ່າງມີປະສິດທິພາບ”.
ທ່ານ ນາງ ວາເນັດຊ້າ ເຮັກກາທີ້ ໄດ້ກ່າວຕື່ມວ່າ: “ບົດຮຽນຝຶກເວົ້າພາສາລາວ ເປັນຕົວຢ່າງອັນດີທີ່ສະແດງໃຫ້ເຫັນວ່າບົດຮຽນທົດລອງຂະໜາດນ້ອຍ ແຕ່ປະສົບຜົນສຳເລັດ ກາຍເປັນບົດຮຽນທີ່ໄດ້ຮັບການອະນຸມັດໃຫ້ສິດສອນທົ່ວປະເທດ. ລັດຖະບານອົດສະຕຣາລີ ມີຄວາມພູມໃຈໃນການສົ່ງເສີມວິທີການສິດສອນທີ່ຈະຮັບປະກັນການສຶກສາຮຽນຮ່ວມ ແລະ ຜົນການຮຽນທີ່ດີຂຶ້ນສໍາລັບນັກຮຽນທຸກຄົນ ໂດຍສະເພາະນັກຮຽນທີ່ຕ້ອງການ ການສະໜັບສະໜູນເພີ່ມຕື່ມ ເພື່ອເສີມສ້າງທັກສະການສື່ສານພາສາລາວ. ພວກເຮົາຕ້ອງການໃຫ້ນັກສຶກສາທຸກຄົນຮູ້ວ່າ ເຂົາເຈົ້າສາມາດເຕີບໃຫຍ່ ແລະ ຮຽນຮູ້ຢູ່ໃນໂຮງຮຽນ. ການແກ້ໄຂຊ່ອງຫວ່າງທາງດ້ານພາສາ ແມ່ນກຸນແຈເພື່ອຊຸກຍູ້ໃຫ້ນັກຮຽນທີ່ບໍ່ເວົ້າພາສາລາວລຸ່ມເປັນພາສາຫຼັກໃນຄອບຄົວເຂົ້າໂຮງຮຽນ”.
ເພື່ອຮັບປະກັນວ່າຄູທຸກຄົນສາມາດເຂົ້າເຖິງສື່ການຮຽນການສອນໃໝ່ເຫຼົ່ານີ້ໄດ້, ທັງ 2 ວິດີໂອໄດ້ອອກອາກາດໃນຫຼາຍຊ່ອງທາງ ເຊັ່ນ: ຊ່ອງໂທລະພາບສຶກສາ ແລະ ກິລາ (Lao ESTV) ທາງໂທລະພາບດາວທຽມລາວແຊັດ ຊ່ອງ 8, ຄັງປັນຍາ ລາວ, ຊ່ອງ YouTube: ວິດີໂອສຳລັບການພັດທະນາຄູ (Teachers Development Videos) ແລະ ຈະມີໃນແທັບເລັດທີ່ໃຊ້ໂດຍຜູ້ເຮັດວຽກສຶກສານິເທດ.
One of the key activity demonstrated in TDV 25 is role play
Production team and students from the filming of TDV 25 in Vientiane
ແຜນງານບີຄວາ ແມ່ນແຜນງານທີ່ນຳພາໂດຍກະຊວງສຶກສາທິການ ແລະ ກິລາ ໂດຍການສະໜັບສະໜູນຈາກລັດຖະບານອົດສະຕຣາລີ ແລະ ອົງການພັດທະນາສາກົນຂອງປະເທດສະຫະລັດອາເມຣິກາ(USAID). ແຜນງານໄດ້ສຸມໃສ່ການເສີມຂະຫຍາຍຜົນການຮຽນຂອງໄວໜຸ່ມຂອງປະເທດ ໂດຍສະເພາະແມ່ນຜູ້ທີ່ຕ້ອງການຄວາມຊ່ວຍເຫຼືອ ແລະ ຜູ້ທີ່ດ້ອຍໂອກາດ. ແຜນງານບີຄວາ ຍັງຈະສືບຕໍ່ສຸມໃສ່ການຮັບປະກັນຄວາມສະເໝີພາບລະຫວ່າງຍິງ-ຊາຍ ແລະ ການສົ່ງເສີມການສຶກສາຮຽນຮ່ວມເຂົ້າໃນທຸກໆກິດຈະກໍາ.
ລິ້ງເພື່ອຮັບຊົມວິດີ: