ກະຊວງສຶກສາທິການ ແລະ ກິລາ ຮ່ວມກັບລັດຖະບານອົດສະຕຣາລີ ໄດ້ທົດລອງເຄື່ອງມືປະເມີນຕົນເອງຂອງຄູແບບໃໝ່ ເພື່ອພັດທະນາຄຸນນະພາບການສອນ

ກອງປະຊຸມສະຫຼຸບລາຍງານສິ່ງຄົ້ນພົບຈາກການທົດລອງເຄື່ອງມືປະເມີນຕົນເອງຂອງຄູໄດ້ຈັດຂຶ້ນໃນວັນທີ 6 ພະຈິກ 2024 ໂດຍໃຫ້ກຽດເປັນປະທານຮ່ວມມີ ທ່ານ ຮອງສາສະດາຈານນາງ ວົງເດືອນ ໂອໃສ, ວ່າການແທນຫົວໜ້າກົມສ້າງຄູ ແລະ ທ່ານ ນາງ ວາເນັດຊ້າ ເຮັກກາທີ້, ເລຂາເອກ, ສະຖານທູດອົດສະຕຣາລີ ປະຈຳ ສປປ ລາວ, ໄດ້ເປັນປະທານຮ່ວມກັນເພື່ອເປີດກອງປະຊຸມສະຫຼຸບລາຍງານສິ່ງຄົ້ນພົບຈາກການທົດລອງເຄື່ອງມືປະເມີນຕົນເອງຂອງຄູ ແລະ ຂັ້ນຕອນປະຕິບັດໃນຕໍ່ໜ້າ. ຜູ້ເຂົ້າຮ່ວມກອງປະຊຸມຄັ້ງນີ້ປະກອບມີ ຄະນະນຳ ແລະ ຜູ້ຕາງໜ້າຈາກກົມສ້າງຄູ, ກົມສາມັນສຶກສາ, ກົມປະກັນຄຸນນະພາບການສຶກສາ ແລະ ກົມແຜນການ, ກະຊວງສຶກສາທິການ ແລະ ກິລາ. ຜູ້ຕາງໜ້າຈາກຫ້ອງການສຶກສາທິການ ແລະ ກິລາ ເມືອງຄູນ, ເມືອງນໍ້າທາ ແລະ ເມືອງອຸທຸມພອນ ພ້ອມດ້ວຍ ຜູ້ເຮັດວຽກສຶກສານິເທດພາຍໃນ ທີ່ໄດ້ເຂົ້າຮ່ວມການທົດລອງ ກໍ່ໄດ້ເຂົ້າຮ່ວມກອງປະຊຸມຜ່ານຊ່ອງທາງອອນລາຍ ເພື່ອຮ່ວມແລກປ່ຽນຄວາມຄິດເຫັນ.

ທ່ານ ຮອງສາສະດາຈານ ນາງ ວົງເດືອນ ໂອໃສ ໄດ້ກ່າວວ່າ: “ເຄື່ອງມືການປະເມີນຕົນເອງຂອງຄູ (TSA) ເປັນເຄື່ອງມືທີ່ສຳຄັນໃນການກໍານົດຈຸດເດັ່ນ ແລະ ສິ່ງທ້າທາຍຂອງຄູ ແລະ ເພື່ອຮັບປະກັນຄວາມ ສອດຄ່ອງ ກັບການພັດທະນາວິຊາຊີບຄູແບບຕໍ່ເນື່ອງ (CPD) ສຳລັບຄູສອນຊັ້ນປະຖົມສຶກສາໃຫ້ມີປະສິດທິພາບ. ເຄື່ອງມືປະເມີນຕົນເອງຂອງຄູ ໄດ້ຮັບການພັດທະນາຂຶ້ນຄຽງຄູ່ກັບມາດຕະຖານການສອນຊັ້ນປະຖົມສຶກສາ ໂດຍກົມສ້າງຄູ ດ້ວຍການຮ່ວມມືກັບບັນດາກົມ ແລະ ວິທະຍາໄລຄູຫຼາຍແຫ່ງ. ຂ້າພະເຈົ້າຂໍສະແດງຄວາມຂອບໃຈເປັນຢ່າງສູງມາຍັງລັດຖະບານອົດສະຕຣາລີ ທີ່ໃຫ້ການສະໜັບສະໜູນ ຢ່າງຕໍ່ເນື່ອງໃນດ້ານງົບປະມານ ແລະ ດ້ານວິຊາການໂດຍຜ່ານແຜນງານບີຄວາ”.

ທ່ານ ນາງ ວາເນັດຊ້າ ເຮັກກາທີ້ ໄດ້ກ່າວວ່າ: “ຄູແມ່ນຈຸດສູນກາງຂອງການຮຽນຮູ້ຂອງນັກຮຽນ. ເປັນຜູ້ນໍາເອົາຫຼັກສູດຊັ້ນປະຖົມສຶກສາສະບັບປັບປຸງມາສອນຕົວຈິງໃນຫ້ອງຮຽນ. ດ້ວຍເຫດນີ້, ລັດຖະບານອົດສະຕຣາລີ ຈຶ່ງສຸມໃສ່ການພັດທະນາວິຊາຊີບຄູແບບຕໍ່ເນື່ອງໃນໄລຍະທີ 2 ຂອງແຜນງານບີຄວາ. ພວກເຮົາພູມໃຈທີ່ໄດ້ຮ່ວມມືກັບກະຊວງສຶກສາທິການ ແລະ ກິລາ ໃນການສ້າງສື່ການຝຶກອົບຮົມ ທີ່ຈໍາເປັນເພື່ອສະໜັບສະໜູນຄູຕະຫຼອດສົກຮຽນ. ຈຸດປະສົງລວມຂອງພວກເຮົາ ແມ່ນເພື່ອສ້າງຄວາມໝັ້ນໃຈ ແລະ ທັກສະໃຫ້ແກ່ຄູສອນ ໂດຍການສະໜອງໃຫ້ເຂົາເຈົ້າເຂົ້າເຖິງການສະໜັບສະໜູນທີ່ມີຄຸນນະພາບສູງ ເພື່ອພັດທະນາວິຊາຊີບຂອງເຂົາເຈົ້າຢ່າງເປັນປະຈຳ”.

ເຄື່ອງມືປະເມີນຕົນເອງຂອງຄູ ໄດ້ຖືກອອກແບບໃນປີ 2023 ໂດຍທີມງານວິຊາການດຽວກັນທີ່ຮັບຜິດຊອບໃນການປັບປຸງມາດຕະຖານການສອນຊັ້ນປະຖົມສຶກສາ. ຈຸດປະສົງການສ້າງເຄື່ອງມືແມ່ນເພື່ອທີ່ຈະຊ່ວຍໃຫ້ຄູສະທ້ອນຄືນເຖິງການປະຕິບັດຂອງເຂົາເຈົ້າຕໍ່ກັບມາດຕະຖານການສອນຊັ້ນປະຖົມສຶກສາ, ກໍານົດຄວາມຕ້ອງການດ້ານການຮຽນຮູ້ຂອງເຂົາເຈົ້າໄດ້ ແລະ ຫຼັງຈາກນັ້ນກໍອອກແບບ ແລະ ປະຕິບັດແຜນການພັດທະນາວິຊາຊີບຄູແບບຕໍ່ເນື່ອງ ເພື່ອຮຽນຮູ້ທັກສະ ແລະ ຄວາມຮູ້ໃໝ່ທີ່ຕອບສະໜອງຕາມຄວາມຕ້ອງການເຫຼົ່ານີ້ ແລ້ວ ທົບທວນຄືນສິ່ງທີ່ເຂົາເຈົ້າໄດ້ຮຽນຮູ້ພ້ອມທັງ ຜົນສະທ້ອນຂອງການຮຽນຮູ້ທີ່ມີຕໍ່ການຮຽນ ແລະ ການມີສ່ວນຮ່ວມຂອງນັກຮຽນ.

ເຄື່ອງມືປະເມີນຕົນເອງຂອງຄູ ໄດ້ຮັບການທົດລອງໃນລະຫວ່າງ ເດືອນມັງກອນ ຫາ ເດືອນ ພຶດສະພາ 2024 ໃນສາມເມືອງຄື: ເມືອງຄູນ, ເມືອງນໍ້າທາ ແລະ ເມືອງອຸທຸມພອນ. ນັກວິຊາການທີ່ເຂົ້າຮ່ວມການທົດລອງ ໄດ້ຄັດເລືອກຄູສອນຊັ້ນປະຖົມເພື່ອຮ່ວມການທົດສອບເຄື່ອງມືດັ່ງກ່າວ ໂດຍການຊ່ວຍເຫຼືອຂອງຜູ້ເຮັດວຽກສຶກສານິເທດພາຍໃນ ເພື່ອໃຫ້ຮູ້ວ່າການນຳໃຊ້ເຄື່ອງມືມີຄວາມຍາກງ່າຍຄືແນວໃດ ແລະ ເປັນປະໂຫຍດເພື່ອຊ່ວຍໃຫ້ຄວາມເຂົ້າໃຈ ແລະ ຕອບສະໜອງຄວາມຕ້ອງການດ້ານການຮຽນຮູ້ທີ່ປະເມີນໂດຍຕົນເອງໂດຍຜ່ານ ການພັດທະນາວິຊາຊີບຄູແບບຕໍ່ເນື່ອງ ຫຼື ບໍ.

ທ່ານ ຮອງສາສະດາຈານ ນາງ ວົງເດືອນ ໂອໃສ ໄດ້ກ່າວວ່າ: “ນັກວິຊາການທີ່ເຂົ້າຮ່ວມການທົດລອງ ໄດ້ໃຫ້ຮູ້ວ່າ ເຄື່ອງມືປະເມີນຕົນເອງຂອງຄູ ຊ່ວຍໃຫ້ຄູ ເນັ້ນໃສ່ພັດທະນາຈຸດທີ່ຕ້ອງການປັບປຸງການສອນ. ມັນໄດ້ຢືນຢັນວ່າ ຄູໄດ້ສັງເກດເຫັນການປ່ຽນແປງຂອງການມີສ່ວນຮ່ວມຂອງນັກຮຽນ ແລະ ການຮຽນຮູ້ຫຼັງຈາກສໍາເລັດກິດຈະກໍາ ການພັດທະນາວິຊາຊີບຄູແບບຕໍ່ເນື່ອງຂອງເຂົາເຈົ້າ. ສຳລັບກອງປະຊຸມຄັ້ງນີ້ ເພື່ອນຳສະເໜີໃຫ້ເຫັນບັນດາຂໍ້ມູນທີ່ເກັບກໍາໄດ້ໃນລະຫວ່າງການທົດລອງ ເຄື່ອງມືປະເມີນຕົນເອງຂອງຄູ ແລະ ສຶກສາບັນຂໍ້ຄົ້ນພົບທີ່ສໍາຄັນ. ຈຸດປະສົງຂອງພວກເຮົາແມ່ນເພື່ອ ປຶກສາຫາລື ແລະ ເພື່ອຄວາມເປັນເອກະພາບ ກ່ຽວກັບບາດກ້າວໃນຕໍ່ໜ້າ ເພື່ອການປະຕິບັດເຄື່ອງມືນີ້ຢ່າງກວ້າງຂວາງຂຶ້ນກວ່າເກົ່າ”.

ທ່ານ ນາງ ວາເນັດຊ້າ ເຮັກກາທີ້ ໄດ້ສະຫຼຸບໃນຕອນທ້າຍວ່າ: “ພວກເຮົາເຊື່ອວ່າການສະໜັບສະໜູນການສອນທີ່ມີຄຸນນະພາບສູງເປັນກຸນແຈໃນການປັບປຸງການຮຽນຮູ້ຂອງນັກຮຽນ ແລະ ຮັບປະກັນຄວາມຕ້ອງການທີ່ຫຼາກຫຼາຍຂອງນັກຮຽນທຸກຄົນ ແມ່ນຈະສາມາດຕອບສະໜອງໄດ້ຢ່າງສະເໝີພາບ ແລະ ເໝາະສົມສຳລັບນັກຮຽນທຸກຄົນ. ຜົນໄດ້ຮັບຂອງການທົດລອງແມ່ນຢູ່ໃນລະດັບດີ. ການປະຕິບັດການສະທ້ອນຄືນເປັນອົງປະກອບທີ່ສໍາຄັນຂອງ ການພັດທະນາວິຊາຊີບຄູແບບຕໍ່ເນື່ອງ ເຊິ່ງເຮັດໃຫ້ຄູສາມາດຮັບຮູ້ຄວາມເຊື່ອ ແລະ ສົມມຸດຕິຖານຂອງເຂົາເຈົ້າກ່ຽວກັບການຮຽນການສອນ. ຂ້າພະເຈົ້າເຊື່ອວ່າເຄື່ອງມືນີ້ຈະຊ່ວຍປັບປຸງທັກສະການສອນຂອງຄູສອນໃນຊັ້ນປະຖົມສຶກສາໄດ້ ແລະ ຂ້າພະເຈົ້າຫວັງວ່າເຄື່ອງມືປະເມີນຕົນເອງຂອງຄູ ຈະຂະຫຍາຍການນຳໃຊ້ໄປຍັງ 30 ເມືອງເປົ້າໝາຍ”.

ແຜນງານບີຄວາແມ່ນນຳພາໂດຍ ກະຊວງສຶກສາທິການ ແລະ ກິລາ ໂດຍໄດ້ຮັບການສະໜັບສະໜູນຈາກ ລັດຖະບານອົດສະຕຣາລີ ແລະ ອົງການພັດທະນາສາກົນປະເທດສະຫະລັດອາເມຣິກາ (USAID). ແຜນງານໄດ້ສຸມໃສ່ການເສີມຂະຫຍາຍຜົນການຮຽນຂອງໄວໜຸ່ມໃນປະເທດ ໂດຍສະເພາະແມ່ນຜູ້ທີ່ຕ້ອງການຄວາມຊ່ວຍເຫຼືອ ແລະ ຜູ້ທີ່ດ້ອຍໂອກາດ. ແຜນງານບີຄວາ ຍັງໄດ້ເອົາໃຈໃສ່ຮັບປະກັນຄວາມສະເໝີພາບລະຫວ່າງຍິງ-ຊາຍ ແລະ ສົ່ງເສີມການສຶກສາຮຽນຮ່ວມເຂົ້າໃນທຸກໆກິດຈະກໍາ.