ກະຊວງສຶກສາທິການ ແລະ ກິລາ ແລະ ອົດສະຕຣາລີ ສະໜັບສະໜູນຄູສອນຊັ້ນປະຖົມສຶກສາດ້ານວິທີການສິດສອນ

ກະຊວງສຶກສາທິການ ແລະ ກິລາ ສປປ ລາວ (ສສກ) ໂດຍໄດ້ຮັບການສະໜັບສະໜູນຈາກລັດຖະບານອົດສະຕຣາລີ ໂດຍຜ່ານແຜນງານປັບປຸງຄຸນນະພາບ ແລະ ຂະຫຍາຍໂອກາດເຂົ້າເຖິງສຳລັບການສຶກສາຂັ້ນພື້ນຖານ ໃນ ສປປ ລາວ (ແຜນງານບີຄວາ), ໄດ້ເປີດຊຸດຝຶກອົບຮົມໃນຫົວຂໍ້ “ຝຶກອົບຮົມວຽກສຶກສານິເທດພາຍໃນ” ເພື່ອໃຫ້ການສະໜັບສະໜູນຄູ ແລະ ຜູ້ອໍານວຍການໂຮງຮຽນໃນເດືອນ ສິງຫາ ນີ້. ກອງປະຊຸມດັ່ງກ່າວແມ່ນເປັນສ່ວນໜຶ່ງຂອງ ສສກ ໃນການລິເລີ່ມຜັນຂະຫຍາຍວຽກງານການພັດທະນາວິຊາຊີບຄູແບບຕໍ່ເນື່ອງໃຫ້ກວ້າງອອກໄປສູ່ທ້ອງຖິ່ນ ເພື່ອແບ່ງຂັ້ນຄຸ້ມຄອງໃນດ້ານການພັດທະນາວິຊາຊີບຄູແບບຕໍ່ເນື່ອງ.

ຜູ້ເຂົ້າຮ່ວມກອງປະຊຸມມີໜ້າທີ່ໃຫ້ການສະໜັບສະໜູນການສອນ/ການສຶກສານິເທດພາຍໃນ ໃຫ້ແກ່ຄູໃນ 7 ແຂວງເປົ້າໝາຍ (ບໍ່ແກ້ວ, ຫຼວງນ້ຳທາ, ຜົ້ງສາລີ, ຫົວພັນ, ຊຽງຂວາງ, ສະຫວັນນະເຂດ ແລະ ຄຳມ່ວນ).

ໃນໄລຍະເດືອນສິງຫານີ້, ພະນັກງານວິຊາການ 158 ທ່ານ ຈາກວິທະຍາໄລຄູ (ວຄ) ຫຼວງນ້ຳທາ, ຄັງໄຂ ແລະ ສະຫວັນນະເຂດ ໄດ້ດຳເນີນການຝຶກອົບຮົມໃຫ້ແກ່ຜູ້ເຮັດວຽກສຶກສານິເທດ ຈຳນວນ 1,121 ຄົນ. ທີມຜູ້ເຮັດວຽກສຶກສານິເທດພາຍໃນ ໄດ້ຮັບການສ້າງຕັ້ງຂຶ້ນໃນເດືອນ ມີນາ ປີ 2023. ພວກເຂົາເຈົ້າໃຫ້ການຊ່ວຍເຫຼືອດ້ານການສອນແກ່ຄູໃນໂຮງຮຽນຂອງຕົນເອງ ແລະ ໂຮງຮຽນໃກ້ຄຽງໃນລະຫວ່າງສົກຮຽນ. ພວກເຂົາເຈົ້າຊ່ວຍເຫຼືອຄູ ໂດຍການລົງຕິດຕາມຢ່າງເປັນປົກກະຕິ, ການໂທຫາທາງວິດີໂອ, ແລະ ສົ່ງຂໍ້ຄວາມຜ່ານກຸ່ມວັອດແອັບ. ພວກເຂົາເຈົ້າຍັງຊ່ວຍອໍານວຍຄວາມສະດວກໃນການຈັດຫຼາຍໆກິດຈະກໍາຂອງການພັດທະນາວິຊາຊີບຄູແບບຕໍ່ເນື່ອງ ລວມທັງການສັງເກດການສອນໃນຫ້ອງຮຽນ, ການສອນເປັນຄູ່ ແລະ ໃຫ້ແນະນຳໃນການເບິ່ງວິດີໂອສຳລັບການພັດທະນາຄູ.

ທ່ານ ເກດ ​ພັນ​ລັກ, ຫົວໜ້າ​ກົມ​ສ້າງ​ຄູ ໄດ້ກ່າວ​ວ່າ: “ຄູ​​ມີ​ບົດບາດ​ສຳຄັນ​ໃນ​ການ​ຮຽນທີ່ປະສົບຜົນສຳເລັດ​ ​ແລະ ອະນາຄົດ​ຂອງ​ໄວ​ໜຸ່ມ. ຊຶ່ງເຂົາເຈົ້າເປັນຜູ້ນໍາເອົາຫຼັກສູດຊັ້ນປະຖົມສຶກສາສະບັບປັບປຸງໃໝ່ມານຳໃຊ້ໃນຫ້ອງຮຽນຕົວຈິງ. ​ເຖິງຢ່າງໃດກໍ່ຕາມ, ​ຄູຍັງ​ຕ້ອງການ​ການ​ສະ        ໜັບສະໜູນ​ຢ່າງ​ຕໍ່​ເນື່ອງ ​ເພື່ອ​ປັບຕົວໃຫ້ຄຸ້ນເຄີຍກັບການ​ຮຽນການສອນ​ຫຼັກສູດ​ຊັ້ນປະຖົມສຶກສາສະບັບ​ປັບປຸງ​ຢ່າງ​ຄົບ​ຖ້ວນ. ດ້ວຍເຫດນີ້, ໂດຍການສະໜັບສະໜູນຂອງລັດຖະບານອົດສະຕຣາລີ, ພວກເຮົາຈຶ່ງໄດ້ເນັ້ນໜັກໃສ່ການພັດທະນາວິຊາຊີບຄູໃນໄລຍະທີ 2 ຂອງແຜນງານບີຄວາ ແລະ ໄດ້ສ້າງລະບົບການສະໜັບສະໜູນຄູຕະຫຼອດສົກຮຽນ.”

ທ່ານ ​ນາງ ວາເນັດຊ້າ ເຮັກກາທີ້ , ​ເລ​ຂາ​ເອກ, ສະ​ຖານ​ທູດ​ອົດ​ສະ​ຕຣາ​ລີ ໄດ້ກ່າວວ່າ: “ຄຳໝັ້ນສັນຍາຂອງລັດຖະບານອົດສະຕຣາລີ ເພື່ອໃຫ້ການຊ່ວຍເຫຼືອຂະແໜງການສຶກສາໃນ ສປປ ລາວ ລວມມີ ການສ້າງຄວາມເຂັ້ມແຂງໃຫ້ແກ່ຄູ ດ້ວຍວິທີການການສອນ ແລະ ສື່ການຮຽນການສອນແບບໃໝ່ຜ່ານຫຼັກສູດສະບັບປັບປຸງ. ຄູແມ່ນໃຈກາງຂອງການຮຽນຮູ້ຂອງນັກຮຽນ. ເປົ້າໝາຍຂອງພວກເຮົາແມ່ນເພື່ອສ້າງຄວາມໝັ້ນໃຈ ແລະ ທັກສະຂອງຄູໂດຍການຊ່ວຍໃຫ້ເຂົາເຈົ້າເຂົ້າເຖິງການຊ່ວຍເຫຼືອທີ່ມີຄຸນນະພາບສູງ ແລະ ການພັດທະນາວິຊາຊີບຢ່າງເປັນປົກກະຕິ.”

ການຝຶກອົບຮົມຄັ້ງ​ນີ້​ ເປັນ​ຄັ້ງ​ທີ 4 ​ຂອງການຝຶກອົບຮົມແບບຕໍ່ເນື່ອງ, ເຊິ່ງໄດ້ຮັບການອອກແບບມາເພື່ອຜູ້ເຮັດວຽກສຶກສານິເທດພາຍໃນ. ຈຸດສໍາຄັນຂອງການຝຶກອົບຮົມແມ່ນການນໍາໃຊ້ຄູ່ມືຄູເພື່ອປັບບົດຮຽນສໍາລັບຫ້ອງຄວບ ແລະ ຄໍາແນະນໍາສຳລັບ ກິດຈະກໍາພິເສດສໍາລັບນັກຮຽນທີ່ເຮັດກິດຈະກຳແລ້ວໄວ.

ການຝຶກອົບຮົມ​ຍັງໄດ້ແນະນໍາຜູ້ເຂົ້າຮ່ວມ ໃຫ້ຮູ້ຈັກເຖິງ ການສອນເປັນຄູ່- ເຊິ່ງເປັນກິດຈະກຳໜຶ່ງຂອງການພັດທະນາວິຊາຊີບຄູແບບຕໍ່ເນື່ອງ ທີ່ຄູ ແລະ ຜູ້ເຮັດວຽກສຶກສານິເທດພາຍໃນ ໃຫ້ມີການຊຸກຍູ້ຊ່ວຍເຫຼືອຢູ່ເລື້ອຍໆ. ໃນລະຫວ່າງການຝຶກອົບຮົມ, ຜູ້ເຂົ້າຮ່ວມໄດ້ຄົ້ນຄິດເຖິງຜົນປະໂຫຍດຂອງການສອນເປັນຄູ່ ແລະ ວິທີການເຮັດວຽກກັບຄູກ່ຽວກັບການສອນຮ່ວມເປັນຄູ່. ພວກເຂົາເຈົ້າເບິ່ງວິດີໂອສຳລັບການພັດທະນາຄູທີ່ຜະລິດໃນເດືອນມິຖຸນາ ທີ່ຜ່ານມາ ເພື່ອເບິ່ງຕົວຢ່າງການສອນຕົວຈິງໃນຫ້ອງຮຽນ.

ຄູຝຶກທ່ານໜຶ່ງທີ່ເຂົ້າຮ່ວມໄດ້ກ່າວວ່າ “ຜູ້ເຂົ້າຮ່ວມມີຄວາມມ່ວນຊື່ນໃນການສ້າງ ກະດານເລື່ອງ (storyboard) ເພື່ອສະແດງໃຫ້ເຫັນວ່າ ເວລາທີ່ຜູ້ເຮັດວຽກສຶກສານິເທດພາຍໃນໃຫ້ການ ສະໜັບສະໜູນຄູໂດຍຜ່ານການສອນເປັນຄູ່. ພວກເຂົາເຈົ້າເຮັດວຽກເປັນກຸ່ມເພື່ອຈິນຕະນາການ ເລື່ອງລາວທີ່ເປັນການເຮັດວຽກຂອງຕົນເອງ ແລະ ເຫັນວ່າເປັນກິດຈະກຳດີທິ່ໄດ້ເຫັນຄວາມກະຕືລືລົ້ນ ແລະ ຫຼາກຫຼາຍແນວຄວາມຄິດຂອງທຸກຄົນ. ພວກເຂົາເຈົ້າຍັງໄດ້ຝຶກຊ້ອມການສະແດງບົດບາດສົມມຸດເປັນຄູສອນ ຫຼື ນັກຮຽນ. ກິດຈະກຳນີ້ ແມ່ນເຮັດໃຫ້ພວກເຮົາທຸກຄົນມີຄວາມຫ້າວຫັນໃນການຝຶກອົບຮົມ!”

ທ່ານ ເກດ ພັນລັກ ໄດ້ກ່າວວ່າ: “ສຳລັບສົກຮຽນ 2024-2025 ນີ້, ຜູ້ເຮັດວຽກສຶກສານິເທດພາຍໃນ ຈະໃຫ້ການສະໜັບສະໜຸນຄູແຕ່ລະເຂດທີ່ພວກເຂົາເຈົ້າຮັບຜິດຊອບ ແລະ ຈະຈັດການຝຶກອົບຮົບດ້ານການສອນເປັນຄູ່ 1 ຄັ້ງຕໍ່ພາກຮຽນ. ວິທະຍາໄລຄູ ແລະ ຫ້ອງການສຶກສາທິການ ແລະ ກິລາເມືອງ ຈະສະໜັບສະໜູນ ຜູ້ເຮັດວຽກສຶກສານິເທດພາຍໃນ ໃນການເຮັດໜ້າທີ່ຂອງເຂົາເຈົ້າໂດຍສຸມໃສ່ໂຮງຮຽນທີ່ຍັງປະຕິບັດບໍ່ທັນໄດ້ດີ.”

ທ່ານ ​ນາງ ວາເນັດຊ້າ ເຮັກກາທີ້ ໄດ້ກ່າວວ່າ: “ໂດຍຜ່ານລະບົບຜູ້ເຮັດວຽກສຶກສານິເທດພາຍໃນ, ກະຊວງສຶກສາທິການ ແລະ ກິລາຮ່ວມກັບ ລັດຖານບານອົດສະຕຣາລີ ໄດ້ສະໜັບສະໜູນນຄູສອນຊັ້ນປະຖົມສຶກສາຫຼາຍກວ່າ 8,000 ຄົນໃນເຂດຫ່າງໄກ, ສົ່ງເສີມການຮ່ວມມື, ດ້ານນະວັດຕະກໍາທັນສະໄໝ, ແລະ ການປັບປຸງການການສອນໃນຫ້ອງຮຽນ. ຄູຢູ່ໃນເຂດຫ່າງໄກຫຼາຍແຫ່ງ ໃນປັດຈຸບັນ ສາມາດເຂົ້າເຖິງການຊ່ວຍເຫຼືອດ້ານການພັດທະນາວິຊາຊີບຢ່າງເທົ່າທຽມກັນ, ຍ້ອນວິທີການອັນເປັນພື້ນຖານອັນໃໝ່ນີ້.”