ກະຊວງສຶກສາທິການ ແລະ ກິລາ, ລັດຖະບານອົດສະຕຣາລີ ແລະ ອົງການພັດທະນາສາກົນຂອງປະເທດສະຫະລັດອາເມລິກາ ໄດ້ເຊື້ອເຊີນພາກສ່ວນທີ່ກ່ຽວຂ້ອງໃນທົ່ວປະເທດ ເຂົ້າຮ່ວມກອງປະຊຸມເສວະນາເພື່ອກະກຽມການເລີ່ມຕົ້ນຈັດຕັ້ງປະຕິບົດຮຽນຝຶກເວົ້າພາສາລາວ ໃນສົກຮຽນ 2024-2025 ທົ່ວປະເທດ

ກະຊວງສຶກສາທິການ ແລະ ກິລາ ສປປ ລາວ ຮ່ວມກັບລັດຖະບານອົດສະຕຣາລີ, ໂດຍຜ່ານແຜນງານປັບປຸງຄຸນນະພາບ ແລະ ຂະຫຍາຍໂອກາດເຂົ້າເຖິງການສຶກສາຂັ້ນພື້ນຖານ ໃນ ສປປ ລາວ (ແຜນງານບິຄວາ) ໄດ້ຈັດ “ກອງປະຊຸມເສວະນາກ່ຽວກັບສື່ການຮຽນການສອນຝຶກເວົ້າພາສາລາວ (ຝວ)” ໃນວັນທີ 11/07/2024 ທີ່ຜ່ານມາ ໂດຍການເປັນປະທານຂອງ ທ່ານ ອຸທິດ ທິບມະນີ, ຮອງຜູ້ອໍານວຍການສະຖາບັນຄົ້ນຄວ້າວິທະຍາສາດການສຶກສາ (ສວສ) ແລະ ທ່ານ ນາງ ວາເນັດຊ້າ ເຮັກກາທີ້, ເລຂາເອກ, ສະຖານທູດອົດສະຕຣາລີ ປະຈຳ ສປປ ລາວ ເພື່ອສະເຫຼີມສະຫຼອງຄວາມສຳເລັດຂອງກະຊວງ ເພື່ອການສະໜັບສະໜູນ ນັກຮຽນທີ່ບໍ່ເວົ້າພາສາລາວເປັນພາສາຫຼັກໃນຄອບຄົວ ແລະ ວາງແຜນໃນຕໍ່ໜ້າເພື່ອຂະຫຍາຍວຽກງານດັ່ງກ່າວ.

ທ່ານ ອຸທິດ ທິບມະນີ ກ່າວວ່າ: “ໝາກຜົນທີ່ໜ້າປະທັບໃຈຂອງໄລຍະທົດລອງໄດ້ເຮັດໃຫ້ເຫັນຢ່າງຊັດເຈນວ່າ ບົດຮຽນຝຶກເວົ້າພາສາລາວ ຄວນຈະມີຢູ່ທຸກໂຮງຮຽນ ທີ່ມີນັກຮຽນຕ້ອງການການຊ່ວຍເຫຼືອດ້ານການຮຽນພາສາລາວເພີ່ມຕື່ມ ເພາະເຂົາເຈົ້າບໍ່ໄດ້ເວົ້າພາສາລາວເປັນພາສາຫຼັກໃນຄອບຄົວ”.

ໂຄງການເວົ້າພາສາລາວເສີມສ້າງທັກສະພາສາລາວໃຫ້ແກ່ນັກຮຽນ ຂັ້ນ ປ.1 ເວົ້າພາສາອື່ນທີ່ບໍ່ແມ່ນພາສາລາວເປັນຫຼັກໃນຄອບຄົວ. ສສກ ໄດ້ເລີ່ມການທົດລອງບົດຮຽນດັ່ງກ່າວໃນປີ 2019, ໂດຍໄດ້ຮັບການສະໜັບສະໜູນຈາກລັດຖະບານອົດສະຕາລີໂດຍຜ່ານ ແຜນງານບີຄວາ. ໂດຍອີງໃສ່ຜົນສຳເລັດຂອງການທົດລອງດັ່ງກ່າວ, ບົດຮຽນຝຶກເວົ້າພາສາລາວ ໄດ້ຂະຫຍາຍອອກເປັນ 21 ເມືອງ ໃນປີ 2023-2024 ໂດຍໄດ້ຮັບການສະໜັບສະໜູນເພີ່ມເຕີມ ຈາກອົງການພັດທະນາສາກົນຂອງປະເທດສະຫະລັດອາເມລິກາ (USAID). ຜົນ​ຂອງ​ການ​ທົດ​ລອງ​ເຫັນວ່າໂດຍລວມແມ່ນໄດ້ຮັບໝາກ​ຜົນ​ດີຫຼາຍ, ເຊິ່ງໄດ້ນຳໄປ​ສູ່ການ​ອະນຸມັດໃຫ້​ກາຍເປັນບົດຮຽນ ທີ່ສາມາດສອນໄດ້ສຳລັບຂັ້ນ ປ.1 ໃນທົ່ວປະເທດ.

ທ່ານ ອຸທິດ ທິບມະນີ ໄດ້ກ່າວວ່າ “ພວກເຮົາຮູ້ສຶກຕື່ນເຕັ້ນທີ່ຈະໄດ້ເຮັດວຽກກັບລັດຖະບານອົດສະຕຣາລີ ແລະ ອົງການ USAID ເພື່ອຮັບປະກັນໃຫ້ຄູສອນຂັ້ນ ປ.1 ທຸກຄົນໄດ້ຮັບການຝຶກອົບຮົມໃນວິທີການສິດສອນບົດຮຽນຝຶກເວົ້າພາສາລາວ ແລະ ມີການເຂົ້າເຖິງແຫຼ່ງການຮຽນການສອນດັ່ງກ່າວ”.

ພິທີດັ່ງກ່າວ ໄດ້ມີຜູ້ເຂົ້າຮ່ວມເກືອບ 100 ທ່ານ ຈາກ ບັນດາກົມຂອງ ສສກ, ບັນດາພະແນກສຶກສາທິການ ແລະ ກິລາແຂວງ, ວິທະຍາໄລຄູ, ຜູ້ຕາງໜ້າຈາກອົງການ USAID, ອົງການ UNICEF, ທະນາຄານໂລກ, ອົງການ JICA ແລະ ຄູ່ຮ່ວມງານການພັດທະນາອື່ນໆ ທີ່ໄດ້ມາປະຊຸມຮ່ວມມກັນ ເພື່ອສະທ້ອນໃຫ້ເຫັນເຖິງຜົນສໍາເລັດຂອງການທົດລອງບົດຮຽນຝຶກເວົ້າພາສາລາວ.

ທ່ານ ​ນາງ ວາເນັດຊ້າ ເຮັກກາທີ້ , ​ເລ​ຂາ​ເອກ, ສະ​ຖານ​ທູດ​ອົດ​ສະ​ຕຣາ​ລີ, ກໍ​ໄດ້​ໃຫ້​ຄຳ​ເຫັນຕື່ມອີກວ່າ: “ຂ້າພະເຈົ້າຮູ້ສຶກເປັນກຽດທີ່ໄດ້ກ່າວເປີດກອງປະຊຸມເສວະນາໃນຄັ້ງນີ້, ໄດ້ມີບັນດາພາກສ່ວນທີ່ກ່ຽວຂ້ອງ ເພື່ອວາງແຜນຈັດຕັ້ງປະຕິບັດໃຫ້ບົດຮຽນຝຶກເວົ້າ ພາສາລາວໄດ້ເປັນບົດຮຽນໃນທົ່ວປະເທດ ເພື່ອສະໜັບສະໜູນການຮຽນຮູ້ພາສາທີ່ມີປະສິດທິພາບສໍາລັບເດັກນ້ອຍທີ່ບໍ່ໄດ້ເວົ້າພາສາລາວເປັນພາສາຫຼັກໃນຄອບຄົວ. ລັດຖະບານອົດສະຕຣາລີ ເຊື່ອໝັ້ນຢ່າງຍິ່ງວ່າ ການປັບປຸງຜົນການຮຽນຂອງເດັກຍິງ ແລະ ເດັກຊາຍ, ໂດຍສະເພາະຜູ້ທີ່ປະສົບກັບຄວາມດ້ອຍໂອກາດ ຈະມີຜົນດີໃນໄລຍະຍາວໃຫ້ແກ່ການພັດທະນາຂອງລາວ.”

ປະເທດລາວເປັນປະເທດທີ່ມີຄວາມຫຼາກຫຼາຍທາງດ້ານວັດທະນະທຳ ແລະ ພາສາຊົນເຜົ່າ, ມີຫຼາຍກວ່າ 50 ພາສາເວົ້າ. ເດັກນ້ອຍຫຼາຍຄົນເມື່ອເລີ່ມເຂົ້າຮຽນ ຍັງເວົ້າພາສາອື່ນເປັນຫຼັກທີ່ບໍ່ແມ່ນພາສາລາວ, ໂດຍສະເພາະໃນເຂດຊົນນະບົດ ແລະ ເຂດຫ່າງໄກ. ພາສາລາວແມ່ນພາສາຫຼັກທີ່ໃຊ້ໃນໂຮງຮຽນ, ຖ້າເດັກນ້ອຍຍັງບໍ່ທັນໄດ້ພັດທະນາທັກສະພື້ນຖານພາສາລາວໃນຊັ້ນປະຖົມ ພວກເຂົາຍັງຈະປະເຊີນກັບສິ່ງທ້າທາຍຕະຫຼອດເວລາການຮຽນຂອງເຂົາເຈົ້າ. ຜົນ​ການ​ປະ​ເມີນ​​ນັກ​ຮຽນ​ໃນ​ໄລ​ຍະ​ຜ່ານ​ມາ ສະ​ແດງ​ໃຫ້​ເຫັນ​ວ່າ ເດັກ​ນ້ອຍ​ຫຼາຍ​ຄົນ​ຈາກ​ຊຸມ​ຊົນ​ຊົນ​ເຜົ່າ​ທີ່​ບໍ່​ເວົ້າ​ພາ​ສາ​ລາວ​ເປັນ​ພາ​ສາ​ຫຼັກໃນຄອບຄົວ ແມ່ນ​ມີ​ສ່ວນຮ່ວມໜ້ອຍໃນການຮຽນ. ນອກຈາກນີ້, ການຄົ້ນຄວ້າຢ່າງຕໍ່ເນື່ອງສະແດງໃຫ້ເຫັນວ່າ ຄວາມສາມາດໃນການເວົ້າພາສາຕາມສື່ການຮຽນການສອນ (ພາສາລາວ) ແມ່ນເງື່ອນໄຂເບື້ອງຕົ້ນທີ່ຈຳເປັນ ເພື່ອໃຫ້່ເດັກນ້ອຍມີການພັດທະນາການຮູ້ໜັງສື (ການອ່ານ ແລະ ຂຽນພາສາລາວ).

ທ່ານ ນາງ ພອນສິລິ ອຸໄທວັນ, ຫົວໜ້າຂະແໜງຄົ້ນຄວ້າການສອນພາສາລາວສຳລັບຊົນເຜົ່າ, ສວສ ໄດ້ອະທິບາຍວ່າ: “ໃນໄລຍະທົດລອງ, ໄດ້ມີການສັງເກດການສອນໃນຫ້ອງຮຽນ 597 ຫ້ອງ, ມີຄູສອນ 1,424 ຄົນ ໄດ້ເຮັດການສະທ້ອນຄືນໃນແຕ່ລະອາທິດ ແລະ ນັກຮຽນໄດ້ຮ່ວມການທົດສອບຈຳນວນ 602 ຄົນ. ນັກຮຽນຈາກໂຮງຮຽນທີ່ຈັດຕັ້ງປະຕິບັດບົດຮຽນຝຶກເວົ້າພາສາລາວສາມຄັ້ງຕໍ່ອາທິດ ໄດ້ມີການປັບປຸງຄະແນນສອບເສັງຂອງເຂົາເຈົ້າເພີ່ມຂຶ້ນ 20%. ເມື່ອສໍາພາດ 94% ຂອງຄູສອນບອກວ່າ ບົດຮຽນຝຶກເວົ້າພາສາລາວ ຊ່ວຍໃຫ້ນັກຮຽນທີ່ເວົ້າພາສາລາວບໍ່ໄດ້ ສາມາດຮຽນພາສາລາວໄດ້ໄວກວ່າການໃຊ້ຫຼັກສູດຂັ້ນ ປ.1 ພຽງຢ່າງດຽວ ແລະ ຊ່ວຍໃຫ້ນັກຮຽນມີສ່ວນຮ່ວມໃນທຸກວິຊາຮຽນໄດ້ດີຂຶ້ນ”.

ແຜນງານບີຄວາ ຈະເປັນແຫຼ່ງຊັບພະຍາກອນຫຼັກຂອງ ກະຊວງສຶກສາທິການ ແລະ ກິລາ ແລະ ສວສ ໃນການນຳພາຈັດຕັ້ງປະຕິບັດໃນທົ່ວປະເທດ. ແຜນງານບີຄວາ ແມ່ນນຳພາໂດຍລັດຖະບານລາວ ເຊິ່ງໄດ້ຮັບການສະໜັບສະໜູນຈາກລັດຖະບານອົດສະຕຣາລີ ແລະ ອົງການ USAID. ແຜນງານ​​ໄດ້​ສຸມ​ໃສ່​ເສີມ​ຂະ​ຫຍາຍ​ຜົນການ​ຮຽນ​ຂອງ​ຊາວ​ໜຸ່ມທົ່ວ​ປະ​ເທດ​, ໂດຍ​ສະ​ເພາະ​ແມ່ນ​ຜູ້ທີ່ຕ້ອງການການຊ່ວຍເຫຼືອ ແລະ ຜູ້​ດ້ອຍ​ໂອ​ກາດ. ແຜນງານບີຄວາ ແມ່ນເນັ້ນໜັກໃສ່ການຮັບປະກັນຄວາມສະເໝີພາບລະຫວ່າງຍິງຊາຍ ແລະ ສົ່ງເສີມການສຶກສາຮຽນຮ່ວມໃນທຸກໆກິດຈະກໍາ.

ໃນລະຫວ່າງກອງປະຊຸມ, ສວສ ໄດ້ເຜີຍແຜ່ຄໍາແນະນໍາຢ່າງເປັນທາງການສໍາລັບການຈັດຕັ້ງປະຕິບັດ ບົດຮຽນຝຶກເວົ້າພາສາລາວ ທີ່ ຈະມີຜົນສັກສິດໃນສົກຮຽນຕໍ່ໄປ. ບົດຮຽນຝຶກເວົ້າພາສາລາວ ແມ່ນບົດຮຽນເສີມ, ແຕ່ຈະສອນປະກອບກັບບົດຮຽນພາສາລາວໃນຫຼັກສູດຂັ້ນ ປ.1. ບົດຮຽນຈະຊ່ວຍການພັດທະນາທັກສະການເວົ້າ ໂດຍຜ່ານການຝຶກຊ້ອມ ການເວົ້າ ແລະ ການຟັງ. ປຶ້ມແບບຮຽນ ແລະ ຄູ່ມືຄູ ມີສີສັນສວຍງາມ, ພ້ອມທັງມີສື່ການຮຽນການສອນ (ບັດຄຳສັບ, ບັດຮູບພາບ ແລະ ຊຸດບັດເກມບິງໂກ້) ຈະຖືກແຈກຢາຍໃຫ້ທົ່ວທຸກໂຮງຮຽນທີ່ມີນັກຮຽນບໍ່ເວົ້າພາສາລາວເປັນພາສາຫຼັກໃນຄອບຄົວ.

ທ່ານ ອຸທິດ ທິບມະນີ ໄດ້ກ່າວຕື່ມວ່າ “ບົດຮຽນຝຶກເວົ້າພາສາລາວ ແມ່ນບົດຮຽນທີ່ມີເປົ້າໝາຍ ເພື່ອຊ່ວຍຕອບສະໜອງຄວາມຕ້ອງການຂອງນັກຮຽນຂັ້ນ ປ.1 ທີ່ບໍ່ໄດ້ເວົ້າພາສາລາວໃນເວລາເລີ່ມເຂົ້າຮຽນ. ດັ່ງນັ້ນ, ຄູສອນຂັ້ນ ປ.1, ຜູ້ອໍານວຍການແລະ ຫ້ອງການສຶກສາທິການ ແລະ ກິລາເມືອງ ຈະຕ້ອງໄດ້ເລືອກວ່າ ໂຮງຮຽນໃດແດ່ຈະປະຕິບັດບົດຮຽນຝຶກເວົ້າພາສາລາວ ໂດຍອີງໃສ່ຄວາມຕ້ອງການຂອງນັກຮຽນຂອງພວກເຂົາເຈົ້າ. ການປັບເນື້ອໃນຕາມຄວາມເໝາະສົມແມ່ນສໍາຄັນ ເພື່ອຊ່ວຍໃນການປະຕິບັດ ແລະ ສາມາດຕອບສະໜອງຄວາມຕ້ອງການສະເພາະຂອງນັກຮຽນ. ຂ້າ​ພະ​ເຈົ້າ​ຫວັງ​ວ່າ ດ້ວຍ​ການຈັດກອງປະຊຸມເສວະນາ​ຄັ້ງ​ນີ້, ຜູ້​ມີ​ສ່ວນ​ຮ່ວມ​ທີ່​ສຳ​ຄັນ​ແຕ່​ລະທ່ານ ຈະ​ເຂົ້າ​ໃຈ​ບົດ​ບາດ ແລະ ໜ້າ​ທີ່​ຮັບ​ຜິດ​ຊອບ​ຂອງ​ຕົນ​ເພື່ອ​ຮັບ​ປະ​ກັນ​ການຈັດຕັ້ງ​ປະ​ຕິ​ບັດບົດຮຽນຝຶກເວົ້າພາສາລາ ຢ່າງ​ມີ​ປະ​ສິດ​ທິ​ຜົນ​ໃນ​ທົ່ວ​ປະ​ເທດ​ໃນ​ສົກ​ຮຽນ​ຈະ​ມາ​ເຖິງນີ້”.

ທ່ານ ນາງ  ວາເນັດຊ້າ ເຮັກກາທີ້ ໄດ້ສະຫຼຸບວ່າ “ຂ້າພະເຈົ້າຂໍຊົມເຊີຍຕໍ່ຄວາມມຸ່ງໝັ້ນ ແລະ ການນຳພາອັນສຳຄັນຈາກ ສວສ ແລະ ສສກ ທີ່ໄດ້ແນະນຳການສະໜັບສະໜູນດ້ານຄຸນນະພາບໃຫ້ແກ່ນັກຮຽນທີ່ເລີ່ມເຂົ້າໂຮງຮຽນແຕ່ຍັງບໍ່ທັນສາມາດເວົ້າພາສາລາວໄດ້. ລັດຖະບານອົດ​ສະ​ຕຣາ​ລີ ​ຍິນ​ດີ​ທີ່​ຈະ​ສະ​ໜັບ​ສະ​ໜູນ​ຄວາມ​ພະ​ຍາ​ຍາມ​ເຫຼົ່າ​ນີ້. ພວກເຮົາເຊື່ອວ່າ ບົດຮຽນຝຶກເວົ້າພາສາລາວ ຈະໄດ້ຮັບໝາກຜົນອັນໃຫຍ່ຫຼວງ ໂດຍການເສີມສ້າງທັກສະການຮູ້ໜັງສືພາສາລາວຂອງນັກຮຽນ ທີ່ເຂົ້າໂຮງຮຽນປະຖົມໂດຍທີ່ເວົ້າພາສາລາວບໍ່ທັນໄດ້ຄ່ອງແຄ້ວເທື່ອ. ພ້ອມ​ກັນ​ນັ້ນ, ລັດຖະບານອົດ​ສະ​ຕຣາ​ລີ ​ແລະ ລັດ​ຖະ​ບານ​ລາວ ກໍຍັງຈະເໜັ້ນໜັກໃສ່ການຮ່ວມມື ເພື່ອສົ່ງເສີມ​ການ​ສຶກ​ສາຮຽນຮ່ວມ​ຢູ່​ໃນ​ລາວ”.