ກະຊວງສຶກສາທິການ ແລະ ກິລາ, ໂດຍໄດ້ຮັບການສະໜັບສະໜູນຈາກລັດຖະບານອົດສະຕຣາລີ ແລະ ອົງການ USAID ໃນການສ້າງທີມຄູຝຶກ ດ້ານບົດບາດຍິງ-ຊາຍ ຂອງບັນດາກົມຂອງກະຊວງສຶກສາທິການ ແລະ ກິລາ

ທ່ານ ນາງ ຂັນທະລີ ສິຣິພົງພັນ, ຮອງລັດຖະມົນຕີ ກະຊວງສຶກສາທິການ ແລະ ກິລາ ແລະ ທ່ານ ນາງ ວາແນັດຊ້າ ເຮກາຕີ້, ຮັກສາການຮອງເອກອັກຄະລັດຖະທູດອົດສະຕຣາລີ ປະຈຳ ສປປ ລາວ ໄດ້ເປັນປະທານຮ່ວມໃນພິທີສະເຫຼີມສະຫຼອງວັນສ້າງຕັ້ງອົງການຈັດຕັ້ງສະຫະພັນແມ່ຍິງລາວ ຄົບຮອບ 68 ປີ (20 ກໍລະກົດ 1955 – 20 ກໍລະກົດ 2023) ໃນວັນທີ 28 ກໍລະກົດ 2023. ພິທີສະເຫຼີມສະຫຼອງດັ່ງກ່າວ ໄດ້ຈັດຂຶ້ນໃນມື້ສຸດທ້າຍ ຂອງການຝຶກອົບຮົມໄລຍະ 5 ວັນ ເພື່ອສ້າງຂີດຄວາມສາມາດສໍາລັບທີມງານຄູຝຶກທີ່ສ້າງຂຶ້ນໃໝ່ກໍ່ຄື ທີມຄູຝຶກດ້ານບົດບາດຍິງ-ຊາຍ ຂອງບັນດາກົມຂອງກະຊວງສຶກສາທິການ ແລະ ກິລາ.

ທ່ານ ນາງ ຂັນທະລີ ໄດ້ກ່າວວ່າ “ຄູຝຶກດ້ານບົດບາດຍິງ-ຊາຍ ຂອງບັນດາກົມຂອງກະຊວງສຶກສາທິການ ແລະ ກິລາ ຈະມີບົດບາດສຳຄັນໃນການຍົກສູງຄວາມຮັບຮູ້ກ່ຽວກັບຄວາມສະເໝີພາບຍິງ-ຊາຍ ແລະ ການສຶກສາຮຽນຮ່ວມ. ພາລະບົດບາດຂອງທີມງານຄູຝຶກທີ່ສ້າງຂຶ້ນໃໝ່ນີ້ ແມ່ນຈະໄດ້ຜັນຂະຫຍາຍຜົນ ການຈັດການຝຶກອົບຮົມ, ສໍາມະນາ ແລະ ກອງປະຊຸມກ່ຽວກັບການສົ່ງເສີມຄວາມສະເໝີພາບລະຫວ່າງຍິງ-ຊາຍ, ການປ້ອງກັນ ແລະ ລຶບລ້າງຄວາມຮຸນແຮງຕໍ່ແມ່ຍິງ ແລະ ເດັກນ້ອຍ ພາຍໃນກົມກອງຂອງຕົນເອງ ແລະ ສະຖາບັນອື່ນໆນອກຈາກກະຊວງສຶກສາທິການ ແລະ ກິລາ.”

ທ່ານ ນາງ ວາແນັດຊ້າ ເຮກາຕີ້, ຮັກສາການຮອງເອກອັກຄະລັດຖະທູດອົດສະຕຣາລີ ປະຈຳ ສປປ ລາວ ໄດ້ກ່າວວ່າ “ລັດຖະບານອົດສະຕຣາລີ ໄດ້ໃຫ້ຄວາມສຳຄັນ ແລະ ກຳນົດວຽກງານສົ່ງເສີມບົດບາດຍິງ-ຊາຍ ແລະ ການສຶກສາຮຽນຮ່ວມ ເປັນຂົງເຂດບູລິມະສິດ ແລະ ພ້ອມໃຫ້ຄຳໝັ້ນສັນຍາທີ່ຈະແກ້ໄຂບັນຫາຄວາມບໍ່ສະເໝີພາບ ແລະ ຄວາມບໍ່ເປັນທຳ ໂດຍຜ່ານທຸກວຽກງານທີ່ສະໜັບສະໜູນໂດຍລັດຖະບານອົດສະຕຣາລີ. ລັດຖະບານອົດສະຕຣາລີ ມີຄວາມພູມໃຈເປັນຢ່າງຍິ່ງທີ່ໄດ້ເປັນຄູ່ຮ່ວມພັດທະນາກັບກະຊວງສຶກສາທິການ ແລະ ກິລາ ໂດຍຜ່ານແຜນງານບີຄວາ ເພື່ອສ້າງທີມງານຄູຝຶກ ແລະ ສ້າງຂີດຄວາມສາມາດໃຫ້ແກ່ທີມດັ່ງກ່າວ ເຊິ່ງຈະເປັນທີມຄູຝຶກຫຼັກ ດ້ານວຽກງານບົດບາດຍິງ-ຊາຍ ຂອງບັນດາກົມຂອງກະຊວງສຶກສາທິການ ແລະ ກິລາ. ຂ້າພະເຈົ້າຫວັງຢ່າງຍິ່ງວ່າ ທີມຄູຝຶກທີ່ສ້າງຂຶ້ນໃໝ່ນີ້ ຈະນຳໃຊ້ຄວາມຮູ້ຄວາມສາມາດທີ່ໄດ້ຝຶກອົບຮົມໃນຄັ້ງນີ້ໝູນໃຊ້ເຂົ້າໃນການປະຕິບັດຕົວຈິງ ແລະ ຖ່າຍຖອດຄວາມຮູ້ທີ່ໄດ້ຮຽນມາຈາກຂັ້ນສູນກາງລົງໄປສູ່ຂັ້ນທ້ອງຖິ່ນຢ່າງມີ ປະສິດທິຜົນ”.