English
ອ່ານນຳກັນ
ການປະຕິບັດຫຼັກສູດວິຊາພາສາລາວຊັ້ນ ປ. 4 ສະບັບປັບປຸງໃໝ່ ທີ່ພັດທະນາໂດຍກະຊວງສຶກສາທິການ ແລະ ກິລາ ເຊິ່ງໄດ້ຮັບການສະໜັບສະໜູນຈາກລັດຖະບານອົດສະຕຣາລີ ຈະໄດ້ເລີ່ມນັບແຕ່ເດືອນກັນຍານີ້ເປັນຕົ້ນໄປ
ການຮູ້ຫນັງສືແມ່ນທັກສະຫນຶ່ງທີ່ສໍາຄັນທີ່ສຸດ ເມື່ອຄຳນຶງເຖິງການເຕີບໂຕຂອງບຸກຄົນ, ວັດທະນະທໍາ ແລະ ການພັດທະນາ. ມັນເປັນພື້ນຖານສໍາລັບການຮຽນຮູ້ທັງຫມົດຢູ່ໃນໂຮງຮຽນ ແລະ ໃນຊີວິດ. ທ່ານສາມາດລອງຈິນຕະນາການເຖິງຊີວິດໃນຍຸກສະໄໝທີ່ປາສະຈາກຄວາມສາມາດພື້ນຖານໃນການອ່ານ ຫຼື ຂຽນໄດ້ບໍ? ໃນຂອບເຂດທີ່ກວ້າງ, ອັດຕາການຮູ້ໜັງສືສູງໄດ້ປະກອບສ່ວນສົ່ງເສີມການເຕີບໂຕທາງເສດຖະກິດ ແລະ ການພັດທະນາຂອງປະເທດຊາດ.
ເນື່ອງໃນໂອກາດວັນຮູ້ຫນັງສືສາກົນ ວັນທີ 08 ເດືອນ ກັນຍາ, ລັດຖະບານອົດສະຕຣາລີ ແລະ ກະຊວງສຶກສາທິການ ແລະ ກິລາໄດ້ຮັບຮູ້ເຖິງຄວາມສໍາຄັນຂອງການຮູ້ຫນັງສືໃນທຸກຊຸມຊົນທ້ອງຖິ່ນ. ນັບແຕ່ປີ 2015 ເປັນຕົ້ນມາ, ກະຊວງສຶກສາທິການ ແລະ ກິລາ ແຫ່ງ ສປປ ລາວ ໄດ້ຮ່ວມມືກັບລັດຖະບານອົດສະຕຣາລີ, ໂດຍຜ່ານແຜນງານບີຄວາ, ສົ່ງເສີມການປັບປຸງຜົນການຮຽນໃຫ້ແກ່ເດັກຍິງ ແລະ ເດັກຊາຍ ໃນເກນອາຍຸເຂົ້າຮຽນຊັ້ນປະຖົມ ໂດຍສະເພາະເດັກທີ່ດ້ອຍໂອກາດ. ພ້ອມກັນນັ້ນ, ພວກເຂົາກໍ່ກຳລັງພັດທະນາຫຼັກສູດປະຖົມສະບັບປັບປຸງໃໝ່ ແລະ ຝຶກອົບຮົມຄູປະຖົມໃນການສອນແບບປະຕິບັດຕົວຈິງ, ໂດຍໄດ້ເນັ້ນໜັກໃສ່ການສ້າງທັກສະການຮູ້ໜັງສືຂອງເດັກ.
ຫຼັກສູດຊັ້ນປະຖົມສະບັບປັບປຸງໃໝ່ໄດ້ເລີ່ມນຳໃຊ້ຢ່າງຕໍ່ເນືອງເຂົ້າໃນໂຮງຮຽນໃນແຕ່ລະປີນັບແຕ່ປີ 2019 ເປັນຕົ້ນມາ. ວົງຈອນປະຈຳປີຂອງການພັດທະນາຫຼັກສູດ, ການຜະລິດ, ການແຈກຍາຍປຶ້ມແບບຮຽນ ແລະ ການຝຶກອົບຮົມຄູໃນທົ່ວປະເທດແມ່ນໄດ້ຮັບການຮັກສາໄວ້ຢ່າງປະສົບສຳເລັດຜົນ ເຖິງວ່າຈະມີສິ່ງທ້າທາຍຈາກວິກິດການ ໂຄວິດ 19 ກໍ່ຕາມ. ນັກຂຽນຫຼັກສູດ ສສກ ໄດ້ເຮັດວຽກຢ່າງໜັກ ເພື່ອຊອກຫາວິທີໃຫ້ວຽກງານສາມາດດຳເນີນມີຄວາມຄືບໜ້າ ໃນທາມກາງການລັອກດາວ ແລະ ການປະຕິບັດຫຼັກສູດຊັ້ນ ປ. 4 ໃໝ່ ແມ່ນຈະຢູ່ໃນແຜນທີ່ຈະເລີ່ມຕົ້ນເດືອນກັນຍານີ້.
ຊົ່ວໂມງອ່ານເລື່ອງນິທານ
ຮຽນຂຽນ
ມາຮອດປັດຈຸບັນ, ສສກ, ໂດຍໄດ້ຮັບການສະໜັບສະໜູນຈາກປະເທດອົດສະຕຣາລີ, ໄດ້ພັດທະນາ ແລະ ແຈກຢາຍປຶ້ມແບບຮຽນວິຊາພາສາລາວຊັ້ນ ປ. 1, 2, 3 ແລະ 4 ສະບັບປັບປຸງໃໝ່ ໃຫ້ແກ່ນັກຮຽນຈຳນວນ 490.937 ຄົນ (ຍິງ 48%) ແລະ ຄູສອນ ແລະ ຜູ້ອຳນວຍການທີ່ສອນນຳ ຈຳນວນ 27.267 ຄົນ (ຍິງ 51%). ຄູສອນຊັ້ນ ປ. 1 ແລະ 2 ຍັງໄດ້ຮັບຊຸດປຶ້ມອ່ານເສີມ ແລະ ປຶ້ມນິທານ. ພ້ອມດ້ວຍແນວຄວາມຄິດຈຳນວນໜຶ່ງສຳລັບກິດຈະກຳທີ່ໜ້າສົນໃຈເພື່ອປະກອບເຂົ້າໃນນິທານ. ຄູບາງຄົນບໍ່ທັນຄຸ້ນເຄີຍກັບການອ່ານປຶ້ມໃຫ້ເດັກນ້ອຍຢູ່ໃນຫ້ອງຮຽນ ແຕ່ກະຕືລືລົ້ນທີ່ຈະຮຽນຮູ້ການໃຊ້ປຶ້ມນິທານເພື່ອປັບປຸງການປະຕິບັດການສອນຂອງພວກເຂົາ. ປຶ້ມນິທານມີຄວາມສຳຄັນຕໍ່ເດັກນ້ອຍ ແລະ ຄູສອນ. ມັນບໍ່ພຽງແຕ່ເຮັດໃຫ້ເດັກຮູ້ສຶກມ່ວນ, ແຕ່ຍັງກະຕຸ້ນຈິນຕະນາການ ແລະ ການພັດທະນາດ້ານພາສາຂອງພວກເຂົາ, ເພີ່ມຄວາມຮູ້ຂອງພວກເຂົາ, ແລະ ໃຫ້ຄໍາແນະນໍາດ້ານສິນທໍາ. ປຶ້ມນິທານຍັງສາມາດສົ່ງເສີມຄວາມຄິດຂອງເດັກນ້ອຍກ່ຽວກັບວິທີການຈັດການກັບບັນຫາທີ່ພວກເຂົາກໍາລັງປະເຊີນ.
ການຮຽນອ່ານຂອງຂັ້ນ ປ.1
ຮຽນອ່ານຕົວອັກສອນດ້ວຍບັດຕົວອັກສອນ
ຫຼັກສູດພາສາລາວຊັ້ນ ປ.4 ຈະສືບຕໍ່ສະໜັບສະໜູນນັກຮຽນໃຫ້ພັດທະນາທັກສະພາສາລາວໃນດ້ານການຟັງ, ເວົ້າ, ອ່ານ ແລະ ຂຽນ ໂດຍຜ່ານວິທີການຮຽນແບບປະຕິບັດຕົວຈິງ. ບົດຮຽນໄດ້ຖືກຈັດລຽງຕາມຫົວຂໍ້ທີ່ເປັນແນວທາງດຽວກັນທີ່ກ່ຽວຂ້ອງ ແລະ ການຮຽນຮູ້ແບບມີສ່ວນຮ່ວມຂອງນັກຮຽນ. ຫົວຂໍ້ໜຶ່ງແມ່ນຈະມີສອງບົດຮຽນ ເພື່ອໃຫ້ນັກຮຽນມີໂອກາດໃນການລົງເລິກດ້ານຄວາມຄິດຂອງພວກເຂົາ ແລະ ສ້າງພາສາທີ່ກ່ຽວຂ້ອງກັບຫົວຂໍ້ນັ້ນ. ຄໍາຖາມຊີ້ນໍາໃນແຕ່ລະບົດຮຽນແມ່ນຈະຊ່ວຍເນັ້ນໜັກໃນຫົວຂໍ້ ແລະ ຊຸກຍູ້ໃຫ້ນັກຮຽນມີການພັດທະນາ ແລະ ສະແດງຄວາມຄິດຂອງຕົນເອງ.
ໂດຍຜ່ານແຜນງານບີຄວາ, ລັດຖະບານອົດສະຕຣາລີ ພູມໃຈທີ່ໄດ້ສະໜັບສະໜູນກະຊວງສຶກສາທິການ ແລະ ກິລາ ແຫ່ງ ສປປ ລາວ ເພື່ອປັບປຸງການຮູ້ໜັງສື ໄປສູ່ອະນາຄົດທີ່ສົດໃສກວ່າເກົ່າຂອງເດັກຍິງ ແລະ ເດັກຊາຍທຸກຄົນ.