ລັດຖະບານປະເທດອົດສະຕຣາລີ ໂດຍຜ່ານແຜນງານບີຄວາ, ໄດ້ຕິດຕັ້ງລະບົບບັນທຶກສຽງທີ່ທັນສະໄໝໃໝ່ ຢູ່ໃນຫ້ອງສະຕູດິໂອສຽງ ຂອງກະຊວງສຶກສາທິການ ແລະ ກິລາ ແຫ່ງ ສປປ ລາວ

ໃນເດືອນມິຖຸນາ 2022 ທີ່ຜ່ານມາ, ຂະແໜງວິທະຍຸຂອງສູນໂຄສະນາຂ່າວສານການສຶກສາ ແລະ ກິລາ ພາຍ ໃຕ້ການຊີ້ນໍາຂອງສະຖາບັນຄົ້ນຄ້ວາວິທະຍາສາດການສຶກສາ (ສວສ) ຂອງ ກະຊວງສຶກສາທິການ ແລະ ກິລາ ໄດ້ຕິດຕັ້ງລະບົບບັນທຶກສຽງໃຫມ່ຢູ່ໃນຫ້ອງສະຕູດິໂອ ເຊິ່ງສະຫນອງໃຫ້ໂດຍ ລັດຖະບານອົດສະຕຣາລີໂດຍ ຜ່ານ ແຜນງານບີຄວາ. ນັກວິຊາການດ້ານສຽງ ແລະ ໂຄສົກລາຍການວິທະຍຸຂອງຂະແໜງວິທະຍຸຂອງສູນໂຄສະນາຂ່າວ ສານການສຶກສາ ແລະ ກິລາໄດ້ເຂົ້າຮ່ວມການຝືກຊ້ອມນຳໃຊ້ລະບົບທີ່ທັນສະໄຫມໃຫມ່ນີ້. ປະຈຸບັນ, ຂະແໜງວິທະຍຸ ແມ່ນໄດ້ມີສິ່ງອໍານວຍຄວາມສະດວກ ເຊິ່ງເປັນອຸປະກອນທີ່ມີຄຸນນະພາບເພື່ອສະຫນັບສະຫນູນວຽກງານຂອງພວກ ເຂົາໃຫ້ພັດທະນາຂຶ້ນໄປອີກລະດັບໜຶ່ງ.

“ດຽວນີ້, ທີມງານຂອງພວກເຮົາສາມາດນໍາໃຊ້ອຸປະກອນບັນທຶກສຽງ ທີ່ທັນສະໄໝ ແລະ ເປັນມືອາຊີບ ເພື່ອເຮັດໃຫ້ສຽງດຶງດູດໃຈຜູ້ຟັງຫຼາຍຂຶ້ນ. ພາກສ່ວນອື່ນໆຂອງ ສະຖາບັນຄົ້ນຄ້ວາວິທະຍາສາດການສຶກສາ ທີ່ຈະມາໃຊ້ສະຕູດິໂອຂອງພວກເຮົາ ກໍ່ຈະດີໃຈກັບການປັບປຸງໃນຄັ້ງນີ້ ເພາະວ່າການຜະລິດຂອງພວກເຮົາ ຈະມີຄຸນນະພາບສຽງທີ່ດີກວ່າ,” ອາຈານພາວະດີ, ຫົວໜ້າຂະແໜງວິທະຍຸ, ແລະ ໂຄສົກລາຍການວິທະຍຸການສຶກສາ ໄດ້ກ່າວ. ສະຕູດິໂອຂອງ IMC ໄດ້ຖືກສ້າງຕັ້ງຂຶ້ນປະມານ 40 ກວ່າປີແລ້ວ. ຜ່ານມາສະຕູດິໂອນີ້ ໄດ້ຜະລິດລາຍ ການວິທະຍຸສຶກສາໃໝ່ ອອກອາກາດສູ່ສັງຄົມໄດ້ຮັບຟັງ ເປັນກະບອກສຽງ ໃຫ້ແກ່ກະຊວງສຶກສາທິການ ແລະ ກິລາໃນການເຜີຍແຜ່ໂຄສະນາວຽກງານຂ່າວສານການສຶກສາຕ່າງໆ ແລະ ຍັງສາມາດຜະລິດຄຼິບສຽງທີ່ຫຼາກຫຼາຍ ເພື່ອສະໜັບສະໜູນການພັດທະນາການສຶກສາຂອງລາວ ເຊັ່ນ: ຄຼິບສຽງ ການນໍາໃຊ້ການຮຽນ ການສອນຫຼັກສູດ ປຶ້ມແບບຮຽນ ແລະ ປຶ້ມຄູ່ມືຄູ, ເພງການສຶກສາ ແລະ ລາຍງານຂ່າວອື່ນໆກ່ຽວ ກັບວຽກງານການສຶກສາ.