English
ພວກເຮົາຈະສົ່ງເສີມ ແລະ ທົດລອງກິດຈະກຳໃໝ່ ແລະ ນະວັດຕະກຳໃໝ່ເພື່ອປັບປຸງການມີສ່ວນຮ່ວມ ແລະ ການເຂົ້າເຖິງການສຶກສາຊັ້ນປະຖົມສຶກສາແນວໃດ? ພວກເຮົາຈະເສີມສ້າງຄວາມເຂັ້ມແຂງໃຫ້ຂັ້ນແຂວງ, ຂັ້ນເມືອງ, ຂັ້ນໂຮງຮຽນ ແລະ ຊຸມຊົນໃຫ້ມີຄວາມສາມາດໃນການຄຸ້ມຄອງບໍລິຫານ, ປະສານງານ ແລະ ຈັດຕັ້ງປະຕິບັດກິດຈະກຳການສຶກສາຮູບແບບໃໝ່ເຫຼົ່ານີ້ແນວໃດ?
ນີ້ແມ່ນຍຸດທະສາດພາຍໃຕ້ກອງທຶນນະວັດຕະກຳໃໝ່ດ້ານການສຶກສາຂອງແຜນງານບີຄວາ BEQUAL Education Innovation Fund (BEIF) ທີ່ໄດ້ເລີ່ມຈັດຕັ້ງປະຕິບັດໃນປີ 2016 ໂດຍ ກະຊວງສຶກສາທິການ ແລະ ກິລາ (ສສກ) ໂດຍການສະໜັບສະໜູນຂອງລັດຖະບານອົດສະຕຣາລີ ແລະ ສະຫະພາບເອີຣົບ. ກອງທຶນນີ້ສ້າງຂຶ້ນມາເພື່ອຊຸກຍູ້ແນວຄວາມຄິດໃໝ່ໆ ແລະ ກິດຈະກຳທີ່ເປັນນະວັດຕະກຳໃໝ່ທີ່ສາມາດສົ່ງຜົນທາງດ້ານບວກທັງດ້ານຄຸນນະພາບ ແລະ ການເຂົ້າເຖິງການສຶກສາຊັ້ນປະຖົມສຶກສາສຳລັບເດັກນ້ອຍທີ່ຢູ່ໃນຊຸມຊົນຫ່າງໄກສອກຫຼີກ ໂດຍສະເພາະແມ່ນເດັກນ້ອຍຍິງ, ນັກຮຽນຊົນເຜົ່າ ແລະ ເດັກນ້ອຍພິການເຫຼົ່ານີ້ເປັນຕົ້ນ.
ພາຍຫຼັງທີ່ຮຽກຮ້ອງໃຫ້ມີການສົ່ງບົດສະເໜີໂຄງການແນວຄວາມຄິດໃໝ່ໆເຂົ້າມາ, 15 ໂຄງການແມ່ນນຳພາໂດຍພາກລັດ, ອົງການທີ່ບໍ່ຂຶ້ນກັບລັດຖະບານ (NGOs) ແລະ ພາກເອກະຊົນ ໄດ້ຊະນະການຄັດເລືອກ ແລະ ໄດ້ທຶນຊ່ວຍເຫຼືອລ້າເພື່ອເຮັດການທົດລອງແນວຄວາມຄິດທີ່ໄດ້ສະເໜີມາ ແລະ ພ້ອມຕິດຕາມຖ້າຫາກວ່າໂຄງການທີ່ສະເໜີມາຈັດຕັ້ງປະຕິບັດສຳເລັດ ແລະ ເໝາະສົມທີ່ຈະປັບ ແລະ ຂະຫຍາຍການຈັດຕັ້ງປະຕິບັດໃຫ້ຫຼາຍຂຶ້ນ. ຈຳນວນຂອງທຶນແມ່ນເລີ່ມຈາກ 185,000,000 ກີບ ຈົນເຖິງ 924,725,000 ກີບ (30,000 – 158,000 ໂດລາອົດສະຕຣາລີ) ແລະ ໄດ້ຈັດຕັ້ງປະຕິບັດໃນໄລຍະ 14 ຫາ 34 ເດືອນ.
ມື້ນີ້ ໄດ້ມີກອງປະຊຸມຖອດຖອນບົດຮຽນກອງທຶນນະວັດຕະກຳໃໝ່ດ້ານການສຶກສາຂອງແຜນງານບີຄວາ ໂດຍການເປັນປະທານຂອງ ທ່ານ ນາງ ຄຳປະເສີດ ກິຕິນະວົງ, ຮອງຫົວໜ້າກົມແຜນການ, ກະຊວງສຶກສາທິການ ແລະ ກິລາ ແລະ ເປັນປະທານຮ່ວມໂດຍ ທ່ານ ນາງ ເຄທີ ສະມິດ, ເລຂາເອກ, ສະຖານທູດອົດສະຕຣາລີ ໂດຍມີຜູ້ເຂົ້າຮ່ວມປະມານ 70 ທ່ານ ຈາກຜູ້ຊະນະໂຄງການ, ລວມທັງບັນດາກົມທີ່ກ່ຽວຂ້ອງໃນ ສສກ, ພະແນກສຶກສາທິການ ແລະ ກິລາ, ວິທະຍາໄລຄູ, ຫ້ອງການສຶກສາທິການ ແລະ ກິລາເມືອງ, ອົງການທີ່ບໍ່ຂຶ້ນກັບລັດຖະບານ ແລະ ຄູ່ຮ່ວມງານໃນຂະແໜງການສຶກສາອື່ນໆ.
ພາຍໃນກອງປະຊຸມ ຍັງໄດ້ຈັດໃຫ້ມີການປຶກສາຫາລືກັນຂອງຄະນະກຳມະການໃນ 4 ຫົວຂໍ້ເຊັ່ນວ່າ ຫົວຂໍ້ເລື່ອງວິທີການສອນ, ການສອນຫ້ອງຄວບ, ການບໍລິຫານຄຸ້ມຄອງໂຮງຮຽນ ແລະ ການເຂົ້າເຖິງ ແລະ ການມີສ່ວນຮ່ວມດ້ານການສຶກສາ. ຈຸດປະສົງຂອງກອງປະຊຸມນີ້ແມ່ນເພື່ອຮັບຟັງຜູ້ຈັດຕັ້ງປະຕິບັດໂຄງການກ່ຽວກັບສິ່ງທີ່ເຮັດໄດ້ດີ ແລະ ບັນຫາຄົງຄ້າງ, ບັນຫາໃດທີ່ໄດ້ຮັບການແກ້ໄຂ, ນະວັດຕະກຳໄດ້ຖືກນຳມາໃຊ້ແນວໃດ ແລະ ແຮງຈູງໃຈໃນການປ່ຽນແປງ.
ຜູ້ເຂົ້າຮ່ວມກອງປະຊຸມຍັງໄດ້ຮັບເຊີນເພື່ອຢ້ຽມຊົມການວາງສະແດງ 15 ໂຄງການທີ່ນຳສະເໜີນະວັດຕະກຳໃໝ່ທີ່ຫຼາກຫຼາຍເຊັ່ນວ່າ: ການເຊື່ອມໂຍງຫຼັກສູດວິຊາເລກກັບວຽກງານກະສິກຳ, ການພັດທະນາເຕັກນິກການຮຽນທີ່ເນັ້ນການປະຕິບັດຕົວຈິງສຳລັບວິຊາພາສາລາວ, ການສ້າງສື່ການຮຽນ ແລະ ການສອນທີ່ໜ້າສົນໃຈໂດຍວັດຖຸທີ່ມີໃນທ້ອງຖິ່ນ, ການຈັດຕັ້ງປະຕິບັດວິທີການສອນແບບໃໝ່ສຳລັບຫ້ອງຄວບ, ການນຳໃຊ້ການສຶກສາການສອນ “Lesson study” ແລະ ການຮຽນແບບເພື່ອນຊ່ວຍເພື່ອເພື່ອສືບຕໍ່ພັດທະນາອາຊີບ, ການແນະນຳຄູກ່ຽວກັບວິທີການປະຕິບັດການສຶກສາຮຽນຮ່ວມແບບໃໝ່ ແລະ ການນຳໃຊ້ການຮຽນຜ່ານກະຕູນບັນເທິງສຶກສາເພື່ອເພີ້ມການໄປໂຮງຮຽນ ແລະ ອື່ນໆ.
ນອກນັ້ນ ຜູ້ເຂົ້າຮ່ວມຍັງໄດ້ມີໂອກາດປຶກສາຫາລືກ່ຽວກັບການຈັດຕັ້ງປະຕິບັດ, ຜົນໄດ້ຮັບ, ຄວາມຍືນຍົງ ແລະ ປະສິດຕິພາບດ້ານງົບປະມານຂອງແຕ່ລະໂຄງການ ເພື່ອຮຽນຮູ້ຈາກການທົດລອງ ແລະ ການວາງສະແດງກ່ຽວກັບນະວັດຕະກຳໃໝ່ໂຕໃດທີ່ມີສ່ວນຕໍ່ຜົນການຮຽນຮູ້ທີ່ດີຂຶ້ນ ແລະ ສາມາດປະຕິບັດຊ້ຳໄດ້. ບາງໂຄງການທົດລອງແມ່ນໄດ້ຂະຫຍາຍອອກໄປແລ້ວ ຄືກັນກັບໂຄງການການຮຽນຜ່ານກະຕູນບັນເທິງສຶກສາ ເຊິ່ງໄດ້ນຳໃຊ້ເພື່ອສະໜັບສະໜູນການຈັດຕັ້ງປະຕິບັດຫຼັກສູດຊັ້ນປະຖົມສຶກສາ ຂັ້ນ ປ.1 ສະບັບປັບປຸງໃໝ່ ທີ່ມີຊື່ວ່າ “ລາຍການຮຽນຮູ້ຮ່ວມກັນ” ທີ່ອອກອາກາດທາງໂທລະພາບແຫ່ງຊາດລາວ ຕັ້ງແຕ່ເດືອນສິງຫາ 2019.
ຫວັງຢ່າງຍິ່ງວ່າ, ຜູ້ເຂົ້າຮ່ວມຈະໄດ້ແຮງບັນດານໃຈຈາກກອງປະຊຸມມື້ນີ້ ຈາກນະວັດຕະກຳໃໝ່ທີ່ປະສົບຄວາມສຳເລັດທີ່ສຸດ ແລະ ຄວາມສຳເລັດຂະໜາດນ້ອຍ ເຊິ່ງສາມາດຂະຫຍາຍ ແລະ ສົ່ງຜົນດ້ານບວກໃຫ້ກັບໂຮງຮຽນ ແລະ ເດັກນ້ອຍໃຫ້ຫຼາຍຂຶ້ນ.
