ລັດຖະບານອົດສະຕຣາລີ ມອບອຸປະກອນການຮຽນທີ່ຈຳເປັນເພື່ອຊ່ວຍເຫຼືອໂຮງຮຽນປະຖົມສຶກສາທີ່ໄດ້ຮັບຜົນກະທົບຈາກໄພນໍ້າຖ້ວມຢູ່ແຂວງຫຼວງນໍ້າທາ

ຝົນຕົກໜັກ ແລະ ນໍ້າຖ້ວມກະທັນຫັນ ຈາກພາຍຸໄຕ້ຝຸ່ນຢາງິ ໃນເດືອນຕົ້ນເດືອນກັນຍາ 2024 ໄດ້ສ້າງຄວາມເສຍຫາຍຢ່າງໃຫຍ່ຫຼວງໃນເມືອງ ແລະ ແຂວງຫຼວງນໍ້າທາ ລວມທັງໂຮງຮຽນປະຖົມສຶກສາ. ນ້ຳຖ້ວມໄດ້ກະທົບອາຄານຮຽນ ແລະ ສື່ການຮຽນການສອນທີ່ສຳຄັນ ເຊັ່ນ ປຶ້ມແບບຮຽນ ແລະ ຄູ່ມືຄູ ໄດ້ຮັບຄວາມເສຍຫາຍໝົດ. ລັດຖະບານອົດສະຕຣາລີ ໄດ້ຕອບຮັບໃຫ້ການຊ່ວຍເຫຼືອທັນທີຕໍ່ກັບຄວາມຮຽກຮ້ອງຂອງກະຊວງສຶກສາທິການ ແລະ ກິລາ ຂອງ ສປປ ລາວ ເພື່ອສະໜັບສະໜູນການຟື້ນຟູ ແລະ ທົດແທນບັນດາປຶ້ມແບບຮຽນປະຖົມສຶກສາ ແລະ ຄູ່ມືຄູທີ່ສູນເສຍໄປ.

ໃນວັນທີ 16 ຕຸລາ 2024, ທ່ານນາງ ເບັນນິຕາ ຊໍາເມີວິວ, ຮອງເອກອັກຄະລັດຖະທູດອົດສະຕຣາລີຄົນໃໝ່ ແລະ ທ່ານ ປອ. ສຳລານ ພັນຄະວົງ, ຮອງລັດຖະມົນຕີກະຊວງສຶກສາ ແລະ ກິລາ ໄດ້ຮ່ວມພິທີມອບຮັບເຄື່ອງທີ່ສະໜັບສະໜູນໂດຍອົດສະຕຣາລີ ທີ່ໂຮງພິມກະຊວງສຶກສາທິການ ແລະ ກິລາ ເພື່ອມອບປື້ມຕຳລາຮຽນໃຫ້ແກ່ພະແນກສຶກສາທິການ ແລະ ກິລາ ແຂວງຫຼວງນໍ້າທາເພື່ອມອບຕໍ່ໃຫ້ໂຮງຮຽນ ທີ່ໄດ້ຮັບຜົນກະທົບຈາກໄພນໍ້າຖ້ວມຢູ່ແຂວງຫຼວງນໍ້າທາ.

ທ່ານ ປອ. ສຳລານ ພັນຄະວົງ ໄດ້ກ່າວວ່າ: “ກະຊວງສຶກສາທິການ ແລະ ກິລາ ແລະ ອົງການການປົກຄອງແຂວງ ໄດ້ເລັ່ງແກ້ໄຂຜົນກະທົບຫຼັງຈາກພະຍຸໄຕ້ຝຸ່ນຢາງິ, ອະນາໄມຂີ້ຕົມ ແລະ ສິ່ງເສດເຫຼືອ ແລະ ຮັບປະກັນຄວາມປອດໄພຂອງໂຮງຮຽນ ເພື່ອໃຫ້ນັກຮຽນສາມາດກັບມາຮຽນຄືນໄດ້. ແຕ່ໄພນ້ຳຖ້ວມໄດ້ເຮັດໃຫ້ປຶ້ມ ແລະ ເອກະສານເສຍຫາຍຢ່າງໜັກໜ່ວງ. ວຽກບຸລິມະສິດໃນປັດຈຸບັນແມ່ນການທົດແທນປຶ້ມແບບຮຽນເພື່ອໃຫ້ຫ້ອງຮຽນສາມາດກັບຄືນມາສືບຕໍ່ການຮຽນການສອນໄດ້ໄວທີ່ສຸດ. ຂ້າພະເຈົ້າຂໍຂອບໃຈລັດຖະບານອົດສະຕາລີທີ່ໄດ້ໃຫ້ການສະໜັບສະໜູນແກ່ຂະແໜງການສຶກສາຢ່າງບໍ່ຢຸດຢັ້ງບໍ່ວ່າໄລຍະປົກກະຕິກໍ່ຄືໃນໄລຍະວິກິດການຄັ້ງນີ້. ເຖິງວ່າຈະປະສົບກັບຄວາມຫຍຸ້ງຍາກທີ່ເກີດຈາກໄພທຳມະຊາດກໍ່ຕາມ, ແຕ່ການສຶກສາຈຳເປັນຕ້ອງໄດ້ດຳເນີນຕໍ່ໄປ”.

ທ່ານ ນາງ ເບັນນິຕາ ຊໍາເມີວິວ ໄດ້ກ່າວວ່າ “ຂ້າພະເຈົ້າຮູ້ສຶກເປັນກຽດຫຼາຍທີ່ໄດ້ມາຮ່ວມງານຢູ່ທີ່ນີ້ໃນມື້ນີ້ ໄດ້ເຫັນປຶ້ມຖືກຈັດພິມອອກ ແລະ ກະກຽມສົ່ງໄປແຂວງຫຼວງນ້ຳທາ ເພື່ອຮັບປະກັນໃຫ້ຄູສອນສາມາດສອນນັກຮຽນ ແລະ ນັກຮຽນສາມາດສືບຕໍ່ການຮຽນໄດ້, ເຖິງແມ່ນວ່າໃນທ່າມກາງວິກິດການກໍ່ຕາມ. ລັດຖະບານອົດສະຕຣາລີ ໄດ້ມີການຮ່ວມມືໄລຍະຍາວກັບລັດຖະບານ ສປປ ລາວ ເພື່ອຮັບປະກັນການສຶກສາປະຖົມສຶກສາທີ່ມີຄຸນນະພາບໃຫ້ສາມາດເຂົ້າເຖິງໄດ້ໂດຍນັກຮຽນທຸກຄົນ. ລັດຖະບານອົດສະຕຣາລີ ໄດ້ສະໜັບສະໜູນກະຊວງສຶກສາທິການ ແລະ ກິລາ ໃນການທົບທວນ, ຜະລິດ ແລະ ແຈກຢາຍສື່ການຮຽນສຳລັບທຸກຂັ້ນຮຽນຂອງປະຖົມສຶກສາ. ໃນມື້ນີ້, ລັດຖະບານອົດສະຕຣາລີ ຈະຮ່ວມມືກັບກະຊວງສຶກສາໃນຄວາມພະຍາຍາມຟື້ນຟູ ແລະ ໃຫ້ການສະໜັບສະໜູນພິເສດເພື່ອທົດແທນສື່ການຮຽນການສອນທີ່ເສຍຫາຍໃນເຂດທີ່ຖືກຜົນກະທົບ”.

ບົດລາຍງານຫຼ້າສຸດຂອງຄະນະຄຸ້ມຄອງໄພພິບັດກະຊວງສຶກສາທິການ ແລະ ກິລາ ໃຫ້ຮູ້ວ່າ: ຄວາມເສຍຫາຍຈາກພາຍຸໄຕ້ຝຸ່ນຢາງິ ໃນເດືອນກັນຍາ 2024 ໄດ້ສົ່ງຜົນກະທົບຕໍ່ຄູ ແລະ ນັກຮຽນໃນປະຖົມຈຳນວນ 1.800 ຄົນ ໃນ 17 ໂຮງຮຽນ ໃນເມືອງຫຼວງນ້ຳທາ, ເມືອງນາແລ ແລະ ເມືອງສິງ. ປຶ້ມແບບຮຽນ, ສື່ການຮຽນການສອນ, ໂຕະ, ຄອມພີວເຕີ ແລະ ເຄື່ອງທົດລອງ, ແລະ ຕູ້ນ້ຳດື່ມໄດ້ຮັບຄວາມເສຍຫາຍໜັກບໍ່ສາມາດສ້ອມແປງໄດ້.

ລັດຖະບານອົດສະຕຣາລີ ໄດ້ສະໜັບສະໜູນການຈັດຊື້ປຶ້ມແບບຮຽນ 7.740 ຫົວ ແລະ ປຶ້ມຄູ່ມືຄູ 1.530 ຫົວ ເປັນມູນຄ່າລວມ 330.632.400 ກີບ (ປະມານ 22.500 ໂດລາອົດສະຕຣາລີ). ສື່ການຮຽນການສອນດັ່ງກ່າວຈະຖືກສົ່ງໃຫ້ໂຮງຮຽນປະຖົມສຶກສາໃນເມືອງນ້ຳທາ, ນາແລ ແລະ ສິງ. ວິຊາທີ່ສະໜັບສະໜູນໂດຍລັດຖະບານອົດສະຕຣາລີ ປະກອບມີ: ວິຊາພາສາລາວ, ຄຸນສົມບັດ, ວິທະຍາສາດ ແລະ ສິ່ງແວດລ້ອມ, ພາສາອັງກິດ, ສັງຄົມສຶກສາ, ສິລະປະກຳ ແລະ ຫັດຖະກຳ, ສິລະປະດົນຕີ ແລະ ພະລະສຶກສາ ສຳລັບທຸກຂັ້ນຮຽນຂອງປະຖົມ.

ທ່ານ ນາງ ເບັນນິຕາ ຊໍາເມີວິວ ໄດ້ກ່າວຕື່ມວ່າ: “ເມື່ອຮູ້ຜົນກະທົບຈາກໄພນໍ້າຖ້ວມໃນແຂວງອື່ນໆ, ພວກເຮົາຈະຮ່ວມມືກັບກະຊວງສຶກສາທິການ ແລະ ກິລາ ເພື່ອວາງແຜນການທົດແທນສື່ການຮຽນການສອນທີ່ສູນເສຍໃນທົ່ວທຸກເຂດທີ່ໄດ້ຮັບຜົນກະທົບຈາກໄພນໍ້າຖ້ວມ”.