English
ນັບຕັ້ງແຕ່ປີ 2015, ກະຊວງສຶກສາທິການ ແລະ ກິລາ (ສສກ) ໄດ້ພັດທະນາຫຼັກສູດຊັ້ນປະຖົມສະບັບປັບປຸງໃໝ່ ຄຽງຄູ່ກັບສື່ການຮຽນການສອນສະບັບປັບປຸງໃໝ່ສຳລັບນັກຮຽນ ແລະ ຄູສອນ. ການຈັດຕັ້ງປະຕິບັດຫຼັກສູດສະບັບປັບປຸງໃໝ່ໄດ້ເລີ່ມນຳໃຊ້ໃນເດືອນກັນຍາ ສຳລັບຂັ້ນ ປ.1 ແລະ ການພັດທະນາຫຼັກສູດນີ້ຈະປັບປຸງໄປເທື່ອລະຂັ້ນຕໍ່ປີ
ໃນວັນທີ 16 – 18 ຕຸລາ, ກອງປະຊຸມຄະນະກຳມະການຮັບຮອງຫຼັກສູດ ແລະ ສື່ການຮຽນການສອນ (ກາຊິມ) ໂດຍການເປັນປະທານໂດຍຂອງທ່ານ ຮສ. ປອ. ພຸດ ສິມມາລາວົງ, ຮອງລັດຖະມົນຕີກະຊວງສຶກສາທິການ ແລະ ກິລາ, ເຊິ່ງກອງປະຊຸມຈະໄດ້ທົບທວນ ແລະ ພິຈາລະນາການຮັບຮອງປຶ້ມແບບຮຽນ ແລະ ຄູ່ມືຄູ ສຳລັບຂັ້ນ ປ.2 ສະບັບປັບປຸງໃໝ່ ເຊິ່ງຈະແຈກຢາຍໃຫ້ທຸກໂຮງຮຽນຊັ້ນປະຖົມທົ່ວປະເທດສຳລັບສົກຮຽນ 2020 – 2021 ນີ້.
ທ່ານ ຮສ. ປອ. ພຸດ ສິມມາລາວົງ ໄດ້ກ່າວວ່າ “ເພື່ອໃຫ້ເຍົາວະຊົນໄດ້ຮຽນຮູ້ຕາມຍຸກສະໄໝ ຫຼັກສູດກໍ່ຄວນປັບປຸງໄປຕາມຍຸກສະໄໝ ພ້ອມນັ້ນກໍ່ຄວນຄຳນຶງເຖິງຄວາມຫຼາກຫຼາຍທາງດ້ານຊົນເຜົ່າຂອງ ສປປ ລາວ ແລະ ຄວນຄຳນຶງເຖິງຄວາມແຕກຕ່າງຂອງຫຼາຍໆທ້ອງຖິ່ນ”. ພ້ອມນັ້ນ ທ່ານຍັງກ່າວຂອບໃຈມາຍັງໃຫ້ການສະໜັບສະໜູນໃນການປັບປຸງຫຼັກສູດຂັ້ນ ປ.1 ແລະ ຂັ້ນ ປ.2 ແລະ ຫວັງວ່າທາງຜູ້ໃຫ້ທຶນ ຈະສຶກສືບຕໍ່ໃຫ້ການສະໜັບສະໜູນໃນຂັ້ນຕໍ່ໆໄປ.
ສື່ການຮຽນການສອນສະບັບປັບປຸງໃໝ່ນີ້ ໄດ້ທົດລອງນຳໃຊ້ຢູ່ໂຮງຮຽນທົດລອງພາຍໃນປະເທດ ແລະ ໄດ້ປັບປຸງຄືນຕາມຄຳເຫັນຈາກການທົດລອງ ແລະ ກອງປະຊຸມປຶກສາຫາລືນຳຄູ ກ່ອນທີ່ຈະນຳສະເໜີໃນກອງປະຊຸມກາຊີມອາທິດນີ້. ໃນໄລຍະສາມມື້ຂອງກອງປະຊຸມຮັບຮອງ, ຫົວໜ້າທີມແຕ່ລະວິຊາຈາກທີມຂຽນຫຼັກສູດຈາກສະຖາບັນຄົ້ນຄວ້າວິທະຍາສາດການສຶກສາ (ສວສ) ຈະໄດ້ນຳສະເໜີວິຊາຂອງຕົນໃຫ້ທາງຄະນະກຳມະການກາຊິມ ແລະ ຕອບຄຳຖາມຈາກຄະນະກຳມະການກາຊິມ. ຄະນະກຳມະການກາຊິມຈະແນະນຳ ສວສ ສຳລັບການຮັບຮອງສຸດທ້າຍ.
ຫຼັກສູດສະບັບປັບປຸງໃໝ່ໄດ້ອອກແບບມາເພື່ອສົ່ງເສີມຄວາມກ້າວໜ້າໃນການຮຽນຂອງນັກຮຽນ ໃນຫົວຂໍ້ສຳຄັນໃນແຕ່ລະວິຊາໄປຕາມແຕ່ລະຂັ້ນຮຽນ. ສື່ການຮຽນການສອນສະບັບປັບປຸງໃໝ່ຍັງອອກແບບມາເພື່ອສົ່ງເສີມການຮຽນທີ່ເນັ້ນການປະຕິບັດຕົວຈິງທີ່ນັກຮຽນຕ້ອງຄົ້ນຄິດ, ຝຶກຝົນ ແລະ ນຳໃຊ້ຄວາມຮູ້ໃໝ່ຈາກການຮຽນເຂົ້າໃນຊີວິດຈິງ. ສື່ການຮຽນ ຂັ້ນ ປ.2 ສະບັບປັບປຸງໃໝ່ ແມ່ນສ້າງຂຶ້ນເພື່ອໃຫ້ສອດຄ່ອງກັບສື່ການຮຽນ ຂັ້ນ ປ.1 ເຊິ່ງຂຽນ ແລະ ຂະຫຍາຍເນື້ອໃນ ແລະ ຫົວຂໍ້ທີ່ມີໃນສື່ການຮຽນຂອງຂັ້ນ ປ.1.
ສະຖານທູດອົດສະຕຣາລີ, ພ້ອມດ້ວຍທຶນສົມທົບຈາກສະຫະພາບເອີຣົບ ແລະ ລັດຖະບານສະຫະລັດອາເມລິກາ, ໄດ້ສະໜັບສະໜູນກະຊວງສຶກສາທິການ ແລະ ກິລາໃນການພັດທະນາ ແລະ ຈັດຕັ້ງປະຕິບັດຫຼັກສູດຊັ້ນປະຖົມສະບັບປັບປຸງໃໝ່ ແລະ ສະໜັບສະໜູນສື່ການຮຽນໂດຍຜ່ານແຜນງານບີຄວາ.
“ອົດສະຕຣາລີມີຄວາມດີໃຈເປັນຢ່າງຍິ່ງທີ່ໄດ້ຮ່ວມມືກັບສະຖາບັນຄົ້ນຄວ້າວິທະຍາສາດການສຶກສາ ກໍຄືກະຊວງສຶກສາທິການ ແລະ ກິລາ ເພື່ອສະໜັບສະໜູນການພັດທະນາຫຼັກສູດປະຖົມໃໝ່” ກ່າວໂດຍທ່ານນາງ ເຈນ ແຊັນເລີ, ຮອງເອກອັກຄະລັດຖະທູດອົດສະຕຣາລີ ໃນພິທີເປີດກອງປະຊຸມກາຊິມ. ທ່ານຍັງໄດ້ກ່າວອີກວ່າ “ຂ້າພະເຈົ້າເຊື່ອວ່າພວກເຮົາທຸກຄົນມີຄວາມຕື່ນເຕັ້ນທີ່ສື່ການຮຽນການສອນໃໝ່ອີກຂັ້ນໜຶ່ງກຳລັງຈະສຳເລັດ ແລະ ນຳໃຊ້ໂດຍນັກຮຽນຂັ້ນ ປ. 2 ທົ່ວປະເທດ. ຫຼັກສູດຊັ້ນປະຖົມໃໝ່ຕອບສະໜອງຕໍ່ການປ່ຽນແປງຢ່າງໄວລາຂອງສັດຕະວັດທີ 21 ແລະ ຈະຊ່ວຍປັບປຸງຜົນການຮຽນຂອງນັກຮຽນລາວ ເພື່ອໃຫ້ສາມາດແຂ່ງຂັນໄດ້ໃນພາກພື້ນອາຊຽນ”.
ນັກຮຽນ ຂັ້ນ ປ.2 ທຸກຄົນຈະໄດ້ຮັບຊຸດປຶ້ມແບບຮຽນສະບັບປັບປຸງໃໝ່ເຊັ່ນວ່າ ວິຊາພາສາລາວ, ວິຊາວິທະຍາສາດ ແລະ ສິ່ງແວດລ້ອມ ແລະ ວິຊາຄຸນສົມບັດ. ປຶ້ມແບບຮຽນສະບັບປັບປຸງໃໝ່ມີສີສັນ ແລະ ຮູບພາບປະຈັກຕາເພື່ອຄວາມເຂົ້າໃຈ, ເພີ່ມຄວາມສົນໃຈ ແລະ ເພື່ອຊ່ວຍໃນການຈື່ຈຳຂອງນັກຮຽນ. ພ້ອມນັ້ນ, ຄູສອນ ຂັ້ນ ປ.2 ທຸກຄົນກໍ່ຈະໄດ້ຮັບຊຸດປຶ້ມແບບຮຽນ ແລະ ຄູ່ມືຄູສະບັບປັບປຸງໃໝ່ເຊັ່ນວ່າ ວິຊາພາສາລາວ, ວິຊາວິທະຍາສາດ ແລະ ສິ່ງແວດລ້ອມ, ວິຊາຄຸນສົມບັດ, ວິຊາຫັດຖະກຳ ແລະ ສິລະປະກຳ, ວິຊາພະລະສຶກສາ ແລະ ດົນຕີ. ປຶ້ມຄູ່ມືຄູສະບັບປັບປຸງໃໝ່ຈະມີລາຍລະອຽດຫຼາຍກວ່າ ແລະ ວິທີການນຳໃຊ້ສິ່ງທີ່ມີຢູ່ໃນທ້ອງຖິ່ນໃນການຈັດກິດຈະກຳສຳລັບນັກຮຽນ. ໃນຄູ່ມືຍັງປະກອບມີຍຸດທະສາດ ແລະ ກິດຈະກຳຕ່າງໆທີ່ສະໜັບສະໜູນຄູໃນການສອນນັກຮຽນທີ່ບໍ່ເວົ້າພາສາລາວເປັນພາສາທຳອິດ ແລະ ຄຳແນະນຳວິທີການນຳໃຊ້ສື່ການຮຽນການສອນສຳລັບຫ້ອງຮຽນຮ່ວມດ້ວຍ.
ນອກນັ້ນ, ຫ້ອງຮຽນ ປ.2 ທຸກຫ້ອງຈະໄດ້ຮັບຊຸດການຮຽນການສອນ ເຊິ່ງລວມມີ ຮູບພາບ, ປຶ້ມອ່ານທີ່ເໝາະສົມຕາມເກນອາຍຸເພື່ອສົ່ງເສີມບົດຮຽນການຮູ້ໜັງສືລາວ ແລະ ປຶ້ມອ່ານເສີມ ເພື່ອສົ່ງເສີມການພັດທະນາການຮູ້ໜັງສືສຳລັບຜູ້ອ່ານໄວໜຸ່ມນ້ອຍ. ເນື້ອໃນຂອງປຶ້ມແບບຮຽນ, ສື່ ແລະ ກິດຈະກຳຕ່າງໆແມ່ນອອກແບບໂດຍທີມຂຽນຫຼັກສູດເພື່ອຮັບປະກັນວ່າເນື້ອໃນນັ້ນແທດເໝາະກັບເດັກນ້ອຍທຸກຄົນ.
ພາຍຫຼັງການຮັບຮອງຂອງຄະນະກຳມະການກາຊິມ, ການຈັດພິມ ແລະ ການແຈກຢາຍສື່ການຮຽນການສອນໃຫ້ທຸກໆໂຮງຮຽນຊັ້ນປະຖົມທົ່ວປະເທດຈະເປັນໜ້າທີ່ຫຼັກຂອງ ສສກ. ເຊັ່ນກັນກັບການນຳສະເໜີຫຼັກສູດ ຂັ້ນ ປ.1 ສະບັບປັບປຸງໃໝ່, ຄູຂັ້ນ ປ.2 ແລະ ຄູສຶກສານິເທດທົ່ວປະເທດຈະໄດ້ຮັບການຝຶກອົບຮົມ ແລະ ສະໜັບສະໜູນ ເພື່ອນຳສະເໜີຫຼັກສູດສະບັບປັບປຸງໃໝ່ ແລະ ຜູ້ທີ່ລຶ້ງເຄີຍກັບການນຳໃຊ້ສື່ການຮຽນໃໝ່ນີ້.
ນັກຮຽນ ຂັ້ນ ປ.2 ຊັ້ນປະຖົມທຸກຄົນຈະໄດ້ເລີ່ມສົກຮຽນໃໝ່ພ້ອມກັບຫຼັກສູດ ແລະ ສື່ການຮຽນການສອນສະບັບປັບປຸງໃໝ່ໃນເດືອນກັນຍາ 2020 ນີ້.