ກະຊວງສຶກສາທິການ ແລະ ກິລາ ຮ່ວມກັບລັດຖະບານອົດສະຕຣາລີ ໄດ້ສົ່ງເສີມຄວາມສະເໝີພາບລະຫວ່າງຍິງ-ຊາຍ ໃນຫ້ອງຮຽນ

ກະຊວງສຶກສາທິການ ແລະ ກິລາ ສປປ ລາວ ຮ່ວມກັບລັດຖະບານອົດສະຕຣາລີ ໂດຍຜ່ານແຜນງານປັບປຸງຄຸນນະພາບ ແລະ ຂະຫຍາຍໂອກາດເຂົ້າເຖິງການສຶກສາຂັ້ນພື້ນຖານ ໃນ ສປປ ລາວ (ແຜນງານບີຄວາ) ແລະ ສະຖາບັນຄົ້ນຄວ້າວິທະຍາສາດການສຶກສາ ໄດ້ຈັດກອງປະຊຸມຝຶກອົບຮົມ “ການຂຽນບົດເລື່ອງຂອງວິດີໂອສົ່ງເສິມບົດບາດຍິງ-ຊາຍ” ເປັນເວລາ 4 ວັນ ນັບແຕ່ວັນທີ 18 ຫາ 21 ມິຖຸນາ 2024. ຈຸດປະສົງແມ່ນເພື່ອຜະລິດວີດີໂອ ເພື່ອປູກຈິດສຳນຶກ ແລະ ໃຫ້ຄຳແນະນຳແກ່ຄູກ່ຽວກັບວິທີຮັບປະກັນຄວາມສະເໝີພາບລະຫວ່າງຍິງ-ຊາຍໃນຫ້ອງຮຽນ. ກອງປະຊຸມຝຶກອົບຮົມຄັ້ງນີ້ ໄດ້ມີຜູ້ຕາງໜ້າຈາກ ສວສ, ພະແນກສົ່ງເສີມຄວາມກ້າວໜ້າຂອງແມ່ຍິງ, ແມ່ ແລະ ເດັກ, ແລະ ສະຖານທູດອົດສະຕຣາລີເຂົ້າຮ່ວມເພື່ອຮ່ວມກັນຂຽນບົດເລື່ອງວິດີໂອ.

ກະຊວງສຶກສາທິການ ແລະ ກິລາ ແລະ ລັດຖະບານອົດສະຕຣາລີ ມີການຮ່ວມມືຢ່າງແໜ້ນແຟ້ນໃນການສະໜັບສະໜູນຂະແໜງການສຶກສາ ລວມທັງການຜະລິດສື່ດິຈີຕໍທີ່ຫຼາກຫຼາຍ ເຊັ່ນ: ວິດີໂອ ແລະ ສື່ການຮຽນການສອນຕ່າງໆໃຫ້ແກ່ຄູ. ບັນດາສື່ດັ່ງກ່າວໄດ້ຖືກພັດທະນາໂດຍ ຂະແໜງສື່ເອເລັກໂຕຼນິກ ແລະ ການສຶກສາທາງໄກ ແລະ ທີມງານສູນໂຄສະນາຂ່າວສານການສຶກສາ ແລະ ກິລາ ຂອງ ສວສ. ກອງປະຊຸມການຝຶກອົບຮົມແມ່ນ ເພື່ອພັດທະນາຄວາມຮູ້ ແລະ ທັກສະກ່ຽວກັບການສົ່ງເສີມຄວາມສະເຫມີພາບລະຫວ່າງຍິງ-ຊາຍ ແລະ ຫຼີກເວັ້ນການມີຄວາມຄິດຍຶດຕິດດ້ານບົດບາດຍິງ-ຊາຍ ໃນເນື້ອຫາ ແລະ ຮູບພາບທີ່ສະແດງອອກໃນບັນດາສື່ການຮຽນການສອນແບບດິຈິຕອນ ແລະ ສື່ທີ່ອອກຂ່າວຕ່າງໆ. ກອງປະຊຸມຄັ້ງນີ້, ນັກສຳມະນາກອນຈະໄດ້ຮ່ວມກັນຂຽນວິດີໂອສົ່ງເສີມຄວາມສະເຫມີພາບລະຫວ່າງຍິງ-ຊາຍ ທີ່ເປັນຄັ້ງທໍາອິດສໍາລັບຄູ ຜະລິດໂດຍກະຊວງສຶກສາທິການ ແລະ ກິລາ.

ທ່ານ ນາງ ວາເນັດຊ້າ ເຮັກກາທີ້, ເລຂາເອກສະຖານທູດອົດສະຕຣາລີ ປະຈຳ ສປປ ລາວ ໄດ້ກ່າວວ່າ “ຄຳໝັ້ນສັນຍາຂອງລັດຖະບານອົດສະຕຣາລີ ຕໍ່ການສົ່ງເສີມຄວາມສະເໝີພາບລະຫວ່າງຍິງ-ຊາຍໃນລາວ ແມ່ນພາກສ່ວນໜຶ່ງທີ່ສຳຄັນໃນການສະໜັບສະໜູນການສຶກສາຂອງພວກເຮົາ ຜ່ານແຜນງານບີຄວາ, ຄໍາໝັ້ນສັນຍານີ້ລວມມີ ການສົ່ງເສີມການປະຕິບັດທີ່ຄຳນຶງເຖິງບົດບາດຍິງ-ຊາຍ ແລະ ຄວາມພິການ ໂດຍຜ່ານການປັບປຸງຫຼັກສູດຊັ້ນປະຖົມສຶກສາ ແລະ ສືບຕໍ່ການສະໜັບສະໜູນການພັດທະນາວິຊາຊີບຄູແບບຕໍ່ເນື່ອງ. ສິ່ງເຫຼົ່ານີ້ ຈະຮັບປະກັນຄວາມເຂົ້າໃຈການສຶກສາຮຽນຮ່ວມທີ່ໃຫ້ຜົນປະໂຫຍດແກ່ນັກຮຽນທຸກຄົນ, ໂດຍບໍ່ຈໍາແນກ ເພດ, ຊົນເຜົ່າ, ຫຼື ຄວາມສາມາດ. ຂ້າພະເຈົ້າດີໃຈທີ່ໄດ້ມາຮ່ວມງານໃນມື້ນີ້ ເພື່ອຮ່ວມກ່າວເປີດກອງປະຊຸມບົດຂຽນວິດີໂອສົ່ງເສີມບົດບາດຍິງ-ຊາຍ”.

ກອງປະຊຸມຝຶກອົບຮົມໄດ້ດຳເນີນໄປຢ່າງຕັ້ງໜ້າ ດ້ວຍມີຫຼາຍກິດຈະກຳຮ່ວມມືກັນ ເພື່ອຄົ້ນຄ້ວາແນວຄິດຄວາມສະເໝີພາບທາງເພດຢູ່ໂຮງຮຽນ. ຜູ້ເຂົ້າຮ່ວມໄດ້ສະທ້ອນໃຫ້ເຫັນເຖິງວິທີການທີ່ເດັກຍິງ ແລະ ເດັກຊາຍອາດຈະຖືກປະຕິບັດໃນຫ້ອງຮຽນທີ່ແຕກຕ່າງກັນ ໂດຍອີງຄວາມຄິດແບບຍຶດຕິດກ່ຽວກັບຄວາມມັກ, ຄວາມສາມາດ ແລະ ເປົ້າໝາຍໃນອະນາຄົດຂອງເຂົາເຈົ້າ. ຫຼັງຈາກນັ້ນ, ຜູ້ເຂົ້າຮ່ວມໄດ້ສ້າງແຜນວາດກິດຈະວັດປະຈໍາວັນປົກກະຕິໃນຊີວິດຂອງນັກຮຽນຍິງ ແລະ ນັກຮຽນຊາຍ ແລ້ວພິຈາລະນາວ່າ ກິດຈະວັດປະຈຳວັນທີ່ແຕກຕ່າງກັນຂອງພວກເຂົານັ້ນ ສາມາດສົ່ງຜົນກະທົບຕໍ່ຄວາມຕ້ອງການຮຽນຮູ້ ແລະ ການມີສ່ວນຮ່ວມຢູ່ໂຮງຮຽນຄືແນວໃດ. ພ້ອມທັງໄດ້ສົນທະນາກ່ຽວກັບ ການປະຕິບັດຕົວຈິງທີ່ຄູສາມາດປະຕິບັດ ເພື່ອຮັບປະກັນຄວາມຕ້ອງການການຮຽນຮູ້ຂອງເດັກຍິງ ແລະ ເດັກຊາຍ ໃຫ້ມີຄຸນຄ່າເທົ່າທຽມກັນໂດຍການສ້າງສະພາບແວດລ້ອມໃນຫ້ອງຮຽນທີ່ຕອບສະໜອງຄວາມຕ້ອງການສະເພາະຂອງເຂົາເຈົ້າ. ຂັ້ນສຸດທ້າຍ, ຜູ້ເຂົ້າຮ່ວມໄດ້ນຳໃຊ້ຄວາມຮູ້ໃໝ່ຂອງເຂົາເຈົ້າ ແລະ ດຶງເອົາແນວຄວາມຄິດທີ່ເຂົາເຈົ້າໄດ້ລະດົມສະໝອງເພື່ອຂຽນບົດຂອງວິດີໂອສົ່ງເສີມຄວາມສະເໝີພາບລະຫວ່າງຍິງ-ຊາຍທີ່ຈະນຳມາສ້າງໃນຂັ້ນຕໍ່ໄປ.

ທ່ານ ອຸດົມ ສິງດາລາ, ຮອງຜູ້ອຳນວຍການສູນໂຄສະນາຂ່າວສານການສຶກສາ ແລະ ກິລາ, ສະຖາບັນຄົ້ນຄວ້າວິທະຍາສາດການສຶກສາ ໄດ້ກ່າວຕື່ມອີກວ່າ “ໃນຂະແໜງການສຶກສາ, ຄູສອນມີບົດບາດສຳຄັນໃນການສ້າງສະພາບແວດລ້ອມທີ່ປອດໄພ ແລະ ຄຳນຶ່ງເຖິງບົດບາດຍິງ-ຊາຍໃຫ້ແກ່ນັກຮຽນຂອງເຂົາເຈົ້າ. ເປົ້າໝາຍຂອງພວກເຮົາໃນວີດີໂອນີ້ແມ່ນເພື່ອປູກຈິດສຳນຶກເຖິງຄວາມສຳຄັນຂອງບົດບາດຂອງຄູ ໃນການຮັບປະກັນຄວາມສະເໝີພາບລະຫວ່າງຍິງ-ຊາຍ ແລະ ໃຫ້ຄູຮູ້ຍຸດທະສາດຕົວຈິງເພື່ອຮັບປະກັນໃຫ້ເດັກຍິງ ແລະ ເດັກຊາຍ ມີສ່ວນຮ່ວມໃນການຮຽນຮູ້ເທົ່າທຽມກັນ. ກຸ່ມຜູ້ຊົມເປົ້າໝາຍຂອງພວກເຮົາແມ່ນຄູສອນຊັ້ນປະຖົມສຶກສາ ແລະ ຜູ້ອຳນວຍການໂຮງຮຽນ, ວິດີໂອດັ່ງກ່າວຍັງຈະຊ່ວຍສ້າງຄວາມຮັບຮູ້ກ່ຽວກັບຄວາມສະເໝີພາບລະຫວ່າງຍິງ-ຊາຍ ໃນຂະແໜງການສຶກສາໃຫ້ກວ້າງຂຶ້ນ. ພວກເຮົາຈະນໍາໃຊ້ຊ່ອງໂທລະພາບສຶກສາ ແລະ ກິລາ ຊ່ອງ Lao ETV ແລະ ແພຼັດຟອມ ຄັງປັນຍາລາວ, ຊ່ອງທາງ YouTube ວິດີໂອສຳລັບການພັດທະນາຄູອ ແລະ ສື່ສັງຄົມອອນລາຍຂອງພວກເຮົາ ເພື່ອຮັບປະກັນການໂຄສະນາວິດີໂອນີ້ໃຫ້ເຂົ້າເຖິງຜູ້ຊົມເປົ້າໝາຍ.”

ແຜນງານບີຄວາ ເປັນແຜນງານທີ່ນຳພາໂດຍລັດຖະບານລາວ ໂດຍການສະໜັບສະໜູນຈາກ ລັດຖະບານອົດສະຕຣາລີ ແລະ ອົງການພັດທະນາສາກົນຂອງປະເທດສະຫະລັດອາເມລິກາ (USAID). ໂຄງການດັ່ງກ່າວໄດ້ສຸມໃສ່ເສີມຂະຫຍາຍຜົນການສຶກສາຂອງຊາວໜຸ່ມຂອງປະເທດຊາດ, ໂດຍສະເພາະແມ່ນຜູ້ທີ່ຕ້ອງການຄວາມຊ່ວຍເຫຼືອ ແລະ ຜູ້ທີ່ດ້ອຍໂອກາດ. ແຜນງານບີຄວາ ແມ່ນສຸມໃສ່ການຮັບປະກັນຄວາມສະເໝີພາບລະຫວ່າງຍິງ-ຊາຍ ແລະ ສົ່ງເສີມການສຶກສາຮຽນຮ່ວມໃນທຸກກິດຈະກໍາ.