ກະຊວງສຶກສາທິການ ແລະ ກິລາ ແຫ່ງ ສປປ ລາວ ຮ່ວມກັບລັດຖະບານອົດສະຕຣາລີ ໄດ້ເລີ່ມຖ່າຍທຳວິດີໂອທຳອິດ ຂອງແຜນສ້າງວິດີໂອການສົ່ງເສີມການສຶກສາໃນທົ່ວປະເທດຄັ້ງໃໝ່

ໃນອາທິດທີ່ຜ່ານມາ, ກະຊວງສຶກສາທິການ ແລະ ກິລາ ແຫ່ງ ສປປ ລາວ ໂດຍໄດ້ຮັບການສະໜັບສະໜູນຈາກລັດຖະບານອົດສະຕຣາລີ ໂດຍຜ່ານແຜນງານບີຄວາ ໄດ້ເລີ່ມການຖ່າຍທຳບົດເລື່ອງທຳອິດຂອງແຜນໂຄສະນາການສຶກສາແຫ່ງຊາດຄັ້ງ ໃໝ່ ເພື່ອສົ່ງເສີມການສຶກສາໃນທົ່ວປະເທດລາວ. ສະຖາບັນຄົ້ນຄວ້າວິທະຍາສາດການສຶກສາ (ສວສ) ໂດຍການຊີ້ນຳຈາກກະຊວງສືຶກສາທິການ ແລະ ກິລາ ທີ່ນຳພາການຖ່າຍທຳ. ບົດເລື່ອງທຳອິດມີຊື່ວ່າ: “ສອງເສັ້ນທາງ”, ເປັນເລື່ອງລາວທີ່ປະທັບໃຈ ແລະ ເປັນເລື່ອງທຳອິດໃນບັນດາວິດີໂອທີ່ຈະຜະລິດ ເພື່ອສ້າງແຮງບັນດານໃຈໃຫ້ຮັກການຮຽນ ແລະ ຊຸກຍູ້ໃຫ້ໃນຮັກສືບຕໍ່ການຮຽນ.

ທ່ານ ອຸທິດ ທິບມະນີ, ຮອງຜູ້ອໍານວຍການ ສະຖາບັນຄົ້ນຄວ້າວິທະຍາສາດການສຶກສາ ໄດ້ກ່າວວ່າ: “ກະຊວງສຶກສາທິການ ແລະ ກິລາ ແຫ່ງ ສປປ ລາວ ໂດຍໄດ້ຮັບການສະໜັບສະໜູນຈາກລັດຖະບານອົດສະຕຣາລີ ເປັນຜູ້ນຳພາຂະບວນການສົ່ງເສີມການສຶກສາໃນທົ່ວປະເທດ, ໂດຍຜ່ານການເລົ່າເລື່ອງລາວທີ່ເປັນແຮງບັນດານໃຈ ແລະ ການມີສ່ວນຮ່ວມຂອງຊຸມຊົນດ້ວຍຄວາມສາມັກຄີ, ການໂຄສະນາດັ່ງກ່າວມີຈຸດປະສົງເພື່ອກະຕຸ້ນໃຫ້ນັກຮຽນສືບຕໍ່ການຮຽນ, ສ້າງຄວາມໝັ້ນໃຈໃຫ້ແກ່ພໍ່ແມ່ປະຊາຊົນ ໃຫ້ຮັບຮູ້ຄວາມສຳຄັນຂອງການສຶກສາ ແລະ ຊົມເຊີຍບົດບາດຂອງຄູໃນການສ້າງອານາຄົດປະເທດ”.

ທ່ານ ນາງ ວາເນັດຊາ ເຮັກກາທີ, ເລຂາທີເອກ ສະຖານທູດອົດສະຕຣາລີ ໄດ້ກ່າວວ່າ: “ຂະບວນການຕອບໂຕ້ວິກິດການດ້ານການສຶກສາໃນລາວ ທີ່ມີນັກຮຽນປະລະການຮຽນ ຍ້ອນວ່າເຂົາເຈົ້າບໍ່ເຫັນຄຸນຄ່າຂອງການສຶກສາ ວ່າຈະຮັບປະກັນໃຫ້ມີວຽກເຮັດງານທຳ ຫືຼ ຈະຊ່ວຍສ້າງອະນາຄົດຂອງເຂົາເຈົ້າ. ໂດຍມີບົດເລື່ອງ “ສອງເສັ້ນທາງ” ໄດ້ບອກເລົ່າເລື່ອງລາວທີ່ສະແດງການປຽບທຽບ ອານາຄົດຂອງໄວໜຸ່ມຜູ້ທີ່ເລືອກການສຶກສາແລ້ວສືບຕໍ່ຮຽນ ແລະ ຜູ້ທີ່ບໍ່ຮຽນຈົນຈົບ. ຍົກໃຫ້ເຫັນວ່າ ການສຶກສາໄດ້ຊ່ວຍໃຫ້ຄົນຜູ້ໜຶ່ງຮູ້ຈັກຄົ້ນຄິດ, ມີຄວາມຮູ້ໃນການພັດທະນາຕົນເອງ, ຮູ້ທັນໂລກ ແລະ ມີຄວາມສາມາດທີ່ຈະສ້າງໂອກາດໃຫ້ແກ່ຕົນເອງ. ພວກເຮົາມີຄວາມພາກພູມໃຈທີ່ໄດ້ຮ່ວມມືກັບກະຊວງສຶກສາທິການ ແລະ ກິລາໃນຂະບວນການສົ່ງເສີມການສຶກສາທີ່ມີຄວາມສຳຄັນຫຼາຍໃນຄັ້ງນີ້”.

ການ​ຖ່າຍ​ທຳ​ບົດເລື່ອງ​ທຳ​ອິດ​ແມ່ນ​ດຳ​ເນີນງານ ​​ໂດຍ​ສູນໂຄສະນາ​​ຂ່າວ​ສານການສຶກສາ ແລະ ກິລາ, ກະຊວງສຶກສາທິການ ແລະ ກິລາ ​ດ້ວຍຄວາມມຸ້ງມັນ ແລະ ເປັນ​ມື​ອາ​ຊີບ. ທີມງານມີຄວາມຕັ້ງໃຈ ແລະ ກະຕືລືລົ້ນທີ່ຈະນໍາເອົາຂໍ້ຄວາມທີ່ສໍາຄັນນີ້ຈັດຕັ້ງປະຕິບັດໂດຍອອກອາກາດຜ່ານວິດີໂອໃຫ້ໄດ້ຮັບຊົມໃນທົ່ວປະເທດ.

ເພື່ອເພີ່ມສຽງທີ່ເປັນເອກະລັກ ແລະ ເປັນແຮງບັນດານໃຈໃຫ້ກັບບົດເລື່ອງ, ທ່ານ ນາງ ປ່າເຢັ້ງຊາ ລໍ່, ນາງງາມຊົນເຜົ່າມົ້ງ ຄົນທຳອິດທີ່ໄດ້ເປັນຕົວແທນປະເທດລາວໃນການປະກວດ Miss Universe ແລະ ເປັນຜູ້ທີ່ຊ່ວຍໂຄສະນາກ່ຽວກັບການສຶກສາທີ່ມີຊື່ສຽງໂດ່ງດັງ, ໄດ້ອາສາເປັນຜູ້ບັນຍາຍໃນບົດເລື່ອງ “ສອງເສັ້ນທາງ”. ຄວາມເຊື່ອຢ່າງເລິກເຊິ່ງຂອງ ປ່າເຢັ້ງຊາ ຕໍ່ພະລັງຂອງການສຶກສາທີ່ສາມາດຫັນປ່ຽນຊີວິດ ແມ່ນເຫັນໄດ້ຊັດເຈນໃນຄວາມມຸ່ງຫມັ້ນຂອງລາວຕໍ່ການປະກອບສ່ວນໃນການສ້າງບົດເລື່ອງນີ້, ເຊິ່ງໄດ້ເພີ່ມຄວາມເປັນທຳມະຊາດ ແລະ ຄວາມອົບອຸ່ນໃຫ້ບົດເລື່ອງ.

ທ່ານ ອຸທິດ ໄດ້ກ່າວສະຫຼຸບໃນຕອນທ້າຍວ່າ: “ການສຶກສາກ້າວໄປໄກກວ່າຄວາມສຳເລັດຂອງບຸກຄົນ, ເປັນພື້ນຖານໃຫ້ແກ່ການພັດທະນາປະເທດຊາດຂອງພວກເຮົາ, ເປັນສິ່ງທີ່ຊ່ວຍໃຫ້ໄວໜຸ່ມມີຄວາມຮູ້, ທັກສະ ແລະ ຄວາມໝັ້ນໃຈເພື່ອຜ່ານຜ່າສິ່ງທ້າທາຍ ແລະ ກ້າວສູ່ອະນາຄົດທີ່ສົດໃສ. ໂດຍຜ່ານວິດີໂອສົ່ງເສີມການສຶກສາ, ພວກເຮົາສາມາດສົ່ງຂໍ້ຄວາມເຖິງຄອບຄົວ ແລະ ຊຸ່ມຊົນ ເພື່ອຍົກໃຫ້ເຫັນເຖິງຄຸນຄ່າທີ່ແທ້ຈິງຂອງການຮຽນ. ເປົ້າໝາຍຂອງພວກເຮົາແມ່ນສ້າງແຮງບັນດານໃຈໃຫ້ແກ່ຜູ້ປົກຄອງ ແລະ ນັກຮຽນໃຫ້ເຫັນການສຶກສາເປັນການລົງທຶນທີ່ສຳຄັນໃນອະນາຄົດ ທີ່ສາມາດສ້າງຄວາມເຂັ້ມແຂງໃຫ້ແກ່ສັງຄົມຂອງພວກເຮົາ. ໂດຍການຮ່ວມມືກັນ, ພວກເຮົາຊ່ວຍກັນສ້າງຄວາມໝັ້ນສັນຍາໃໝ່ດ້ານການສຶກສາ ແລະ ສ້າງອະນາຄົດທີ່ຈະເລີນຮຸ່ງເຮືອງໃຫ້ແກ່ປະເທດລາວ”.

ການ​ຖ່າຍທຳຈະສືບຕໍ່ດຳເນີນຕໍ່ໄປ, ທີມ​ງານ​ຫວັງວ່າ​ຈະ​ໄດ້​ອອກອາກາດ​ບົດເລື່ອງ “ສອງ​ເສັ້ນທາງ” ​ແລະ ​ເລື່ອງ​ອື່ນໆ​ໃຫ້​ຜູ້​ຊົມ​ໃນ​ທົ່ວ​ປະ​ເທດ​ລາວໄດ້ຮັບຊົມໄວໆນີ້, ເພື່ອ​ເປັນ​ການ​ສ້າງ​ຄວາມ​ຫວັງ, ຄວາມ​ພາກພູມ​ໃຈ ​ແລະ ຄວາມ​ເຊື່ອໝັ້ນ​ຕໍ່​ການ​ສຶກສາ. ວິດີໂອສົ່ງເສີມການສຶກສາຈະໄດ້ອອກ​ອາກາດ​ທາງ​ໂທລະພາບ​ແຫ່ງ​ຊາດລາວ, ​ສື່​ສັງຄົມອອນລາຍ ​ແລະ ​ນຳ​ໃຊ້​ໃນ​ການ​ໂຄສະນາ​ການສຶກສາໃນຂັ້ນທ້ອງຖິ່ນໂດຍ​ສະມາຊິກ​ສະພາ​ແຫ່ງ​ຊາດ. ວິດີໂອຍັງຈະຖືກເຜີຍແຜ່ໃຫ້ຄູ, ທີ່ຜູ້ເຮັດວຽກສຶກສານິເທດ ແລະ ຜູ້ເຮັດວຽກໃນຂະແໜງການສຶກສາ ເພື່ອສະໜັບສະໜູນການໂຄສະນາການສຶກສາ ໂດຍສະເພາະຢູ່ໃນໂຮງຮຽນ ແລະ ໝູ່ບ້ານ.