ກະຊວງສຶກສາທິການ ແລະ ກິລາ ແຫ່ງ ສປປ ລາວ ຮ່ວມກັບລັດຖະບານອົດສະຕຣາລີ ໄດ້ສ້າງຄວາມເຂັ້ມແຂງໃຫ້ແກ່ການສຶກສາຮຽນຮ່ວມ ໂດຍໄດ້ຈັດກອງປະຊຸມປຶກສາຫາລືການນຳໃຊ້ສື່ການຮຽນການສອນຝຶກເວົ້າພາສາລາວ

ສື່ການຮຽນການສອນຝຶກເວົ້າພາສາລາວແມ່ນແນວຄິດລິເລີ່ມ ແລະ ມີຄວາມສ້າງສັນຂອງກະຊວງສຶກສາທິການ ແລະ ກິລາ (ສສກ) ໂດຍໄດ້ຮັບການສະໜັບສະໜູນຈາກປະເທດອົດສະຕຣາລີ ຜ່ານແຜນງານການປັບປຸງຄຸນນະພາບ ແລະ ຂະຫຍາຍໂອກາດເຂົ້າຮຽນສຳລັບການສຶກສາຂັ້ນພື້ນຖານ ໃນ ສປປ ລາວ (ແຜນງານບີຄວາ). ຈຸດປະສົງຂອງສື່ການຮຽນການສອນຝຶກເວົ້າພາສາລາວ ແມ່ນເພື່ອຊ່ວຍໃຫ້ນັກຮຽນ ຂັ້ນ ປ.1 ຈາກຊຸມຊົນທີ່ບໍ່ເວົ້າພາສາລາວຢູ່ໃນຄອບຄົວ ໄດ້ພັດທະນາທັກສະການເວົ້າພາສາລາວ. ສື່ການຮຽນການສອນແມ່ນໄດ້ເລີ່ມຕົ້ນນຳໃຊ້ໃນທົ່ວປະເທດນັບແຕ່ ເດືອນກັນຍາ 2024, ບົດຮຽນຝຶກເວົ້າພາສາລາວໃນປັດຈຸບັນໄດ້ຖືກສອນຢູ່ໃນຫ້ອງຮຽນໃນທົ່ວປະເທດ. ບົດຮຽນແມ່ນເນັ້ນໃສ່ສົ່ງເສີມທັກສະການເວົ້າ ແລະ ການຟັງ ຜ່ານກິດຈະກຳ ແລະ ເກມທີ່ຖືເອົານັກຮຽນເປັນໃຈກາງ, ບົດຮຽນຝຶກເວົ້າພາສາລາວ ໄດ້ປູພື້ນຖານໃຫ້ນັກຮຽນທີ່ບໍ່ເວົ້າພາສາລາວຢູ່ໃນຄອບຄົວ ສາມາດຮຽນຫຼັກສູດຊັ້ນປະຖົມແຫ່ງຊາດໄດ້ ແລະ ສາມາດປັບປຸງຜົນການຮຽນຂອງຕົນໃນວິຊາອື່ນໆນຳ. 

​ໃນ​ປີ​ທຳ​ອິດ​ຂອງ​ການສຳເລັດການຈັດຕັ້ງ​ປະຕິບັດບົດຮຽນຝຶກເວົ້າພາສາລາວໃນ​ທົ່ວ​ປະ​ເທດ, ບັນດາ​ພາກສ່ວນ​ທີ່​ກ່ຽວຂ້ອງ​ໄດ້​ກຳນົດ​ຄວາມ​ຈຳ​ເປັນ​ເພື່ອ​ສະທ້ອນຄືນເຖິງ​ບົດຮຽນ ​ແລະ​ ກຳນົດ​ທິດທາງໃນ​ຕໍ່​ໜ້າ. ສສກ ໂດຍໄດ້ຮັບການສະໜັບສະໜູນຈາກລັດຖະບານອົດສະຕຣາລີ ໄດ້ເປັນປະທານຈັດກອງປະຊຸມປຶກສາຫາລືລະຫວ່າງຜູ້ມີສ່ວນກ່ຽວຂ້ອງກັບສື່ການຮຽນການສອນດັ່ງກ່າວ ໃນ ສປປ ລາວ ໃນວັນທີ 16 ກໍລະກົດ 2025 ທີ່ຜ່ານມາ. ທ່ານ ອຸທິດ ທິບມະນີ, ຮອງຜູ້ອໍານວຍການ ສະຖາບັນຄົ້ນຄວ້າວິທະຍາສາດການສຶກສາ (ສວສ) ແລະ ທ່ານ ນາງ ເຄດ ກູດຟຣຸດ, ວ່າການແທນເລຂາເອກ, ສະຖານທູດອົດສະຕຣາລີ, ໄດ້ໃຫ້ກຽດກ່າວເປີດງານ. ງານດັ່ງກ່າວໄດ້ມີຜູ້ເຂົ້າຮ່ວມປະມານ 130 ທ່ານ ຈາກບັນດາກົມຂອງກະຊວງສຶກສາທິການ ແລະ ກີລາ, ພະແນກສຶກສາທິການ ແລະ ກິລາແຂວງ, ຫ້ອງການສຶກສາທິການ ແລະ ກິລາເມືອງ, ບັນດາຄູ່ຮ່ວມພັດທະນາ, ຜູ້ຕາງໜ້າຈາກທະນາຄານໂລກ, ອົງການ JICA, ອົງການ UNICEF ແລະ ອົງການຈັດຕັ້ງສາກົນທີ່ບໍ່ຂຶ້ນກັບລັດຖະບານກໍ່ໄດ້ເຂົ້າຮ່ວມ.

ທ່ານ ອຸທິດ ທິບມະນີ ໄດ້ກ່າວວ່າ: “ກອງປະຊຸມປຶກສາຫາລືການນຳໃຊ້ສື່ການຮຽນການສອນຝຶກເວົ້າພາສາລາວຄັ້ງ​ນີ້ ຖື​ເປັນ​ໂອກາດ​ອັນ​ສຳຄັນ​ທີ່​ຜູ້​ມີ​ສ່ວນ​ກ່ຽວຂ້ອງ​ຈະໄດ້​ແລກປ່ຽນ​ຄຳຄິດຄຳເຫັນ ​ແລະ ກຳນົດ​ທິດ​ທາງ​ໃນ​ອະນາຄົດ​ຂອງ​ສື່ການຮຽນການສອນຝຶກເວົ້າພາສາລາວ, ລວມທັງ​ການ​ຂະຫຍາຍ​ໃນຂັ້ນ​ຮຽນ​ອື່ນຕື່ມ. ພວກເຮົາກໍາລັງຈະໄດ້ເຫັນໝາກຜົນອັນແທ້ຈິງຂອງບົດຮຽນຝຶກເວົ້າພາສາລາວ. ເດັກນ້ອຍຈາກຊຸມຊົນຊົນເຜົ່າໄດ້ເຂົ້າຮ່ວມການຮຽນໃນຫ້ອງຮຽນຢ່າງໝັ້ນໃຈ ແລະ ກຽມຄວາມພ້ອມໃຫ້ແກ່ ການອ່ານ ແລະ ຂຽນພາສາລາວໄດ້ດີຂຶ້ນ. ກອງປະຊຸມ​ນີ້​ຈະຊ່ວຍ​ໃຫ້​ພວກ​ເຮົາ​ສາມາດ​ລະດົມຄວາມຄິດເພື່ອປັບປຸງບົດຮຽນ​ນີ້ໃຫ້ດີຂຶ້ນ​ໄດ້.” 

ທ່ານ ນາງ ເຄດ ກູດຟຣຸດ ໄດ້ກ່າວວ່າ: “ສື່ການຮຽນການສອນຝຶກເວົ້າພາສາລາວເປັນຕົວຢ່າງອັນດີ ທີ່ໄດ້ເຄີຍທົດລອງນຳໃຊ້ ແລະ ປະສົບຜົນສຳເລັດ ໄດ້ເປັນບ່ອນອີງໃຫ້ແກ່ລັດຖະບານລາວ ໃນການຂະຫຍາຍການເຂົ້າຮຽນຊັ້ນປະຖົມຂອງນັກຮຽນໃນທົ່ວປະເທດໃຫ້ຫຼາຍຂຶ້ນໄດ້ຢ່າງໝັ້ນໃຈ, ວິທີການສອນບົດຮຽນຝຶກເວົ້າພາສາລາວ ເປັນການຫັນປ່ຽນປະສົບການຮຽນຮູ້ຂອງເດັກນ້ອຍຫຼາຍພັນຄົນໃນຕົວເມືອງ, ຊົນນະບົດ, ເຂດຫ່າງໄກ ແລະ ລວມທັງຜູ້ທີ່ດ້ອຍໂອກາດ. ກອງປະຊຸມປຶກສາຫາລືຄັ້ງນີ້ ແມ່ນເພື່ອຊົມເຊີຍຕໍ່ຄວາມຄືບໜ້າ ແລະ ການປັບປຸງວິໄສທັດຂອງພວກເຮົາສຳລັບອະນາຄົດ.”

ຜູ້ຊ່ຽວຊານດ້ານວິຊາການ ແລະ ຜູ້ຈັດຕັ້ງປະຕິບັດຂັ້ນທ້ອງຖິ່ນໄດ້ອະທິບາຍເຖິງອົງປະກອບຫຼັກຂອງວິທີການສອນບົດຮຽນຝຶກເວົ້າພາສາລາວ. ຄູສອນຂັ້ນ ປ.1 ທັງໝົດ ພ້ອມດ້ວຍຄູສອນຂັ້ນປະຖົມສຶກສາ ແລະ ຜູ້ເຮັດວຽກສຶກສານິເທດ ໄດ້ຮັບການຝຶກອົບຮົມເພື່ອສອນບົດຮຽນຝຶກເວົ້າພາສາລາວ. ສື່ການຮຽນການສອນສະເພາະແມ່ນໄດ້ສະໜອງໃຫ້ ຢ່າງແທດເໝາະກັບເວລາໃນການສອນຢ່າງໜ້ອຍສາມຊົ່ວໂມງຂອງການສອນວິຊາພາສາລາວເສີມຕໍ່ອາທິດ.

ທ່ານ ນາງ ເຄດ ກູດຟຣຸດ ໄດ້ກ່າວຕື່ມອີກວ່າ: “ໃນບາງໂຮງຮຽນ ຄູຍັງໃຊ້ສື່ການຮຽນການສອນຝຶກເວົ້າພາສາລາວເປັນສ່ວນໜຶ່ງຂອງການຊ່ວຍນັກຮຽນເວົ້າພາສາລາວ, ເພາະເຂົາເຈົ້າຮູ້ສຶກວ່າບົດຮຽນສາມາດຊ່ວຍໃຫ້ນັກຮຽນທຸກຄົນພັດທະນາທັກສະການສື່ສານພາສາລາວໄດ້. ສິ່ງນີ້ຊີ້ໃຫ້ເຫັນເຖິງໝາກຜົນຂອງການມີວິທີການສອນ ແລະ ກິດຈະກຳທີ່ຊ່ວຍສົ່ງເສີມການຮຽນ ພ້ອມທັງມີຄວາມມ່ວນຊື່ນ ສຳລັບນັກຮຽນຂັ້ນປະຖົມທີ່ເຂົ້າຮຽນໃໝ່ ເພື່ອສ່ົງເສີມການຮຽນຮູ້ຂັ້ນພື້ນຖານແກ່ເຂົາເຈົ້າ.”

ຜູ້ນຳສະເໜີໃນກອງປະຊຸມຍັງໄດ້ລາຍງານໃຫ້ຊາບກ່ຽວກັບ ຜົນການສຶກສາຄົ້ນຄວ້າການສຶກສາຮຽນຮ່ວມທີ່ນຳພາໂດຍ ແຜນງານບີຄວາ, ຂໍ້ມູນເກັບກັບຈາກການລົງຕິດຕາມ ແລະ ຍຸດທະສາດການຈັດຕັ້ງປະຕິບັດທີ່ໄດ້ນຳໃຊ້ໃນສົກຮຽນ 2024-2025. ການນໍາສະເໜີເຮັດໃຫ້ເຮົາໄດ້ຮູ້ກ່ຽວກັບ ບູລິມະສິດໃນການປັບປຸງ ແລະ ການຂະຫຍາຍສື່ການຮຽນການສອນຝຶກເວົ້າພາສາລາວ ໄປສູ່ຂັ້ນຮຽນອື່ນຕື່ມ.

ຈຸດເດັ່ນຂອງກອງປະຊຸມປຶກສາຫາລືໃນຄັ້ງນີ້ ແມ່ນການນຳສະເໜີວິດີໂອການສຳລັບພັດທະນາຄູ ຕອນທີ 25. ວິດີໂອນີ້ສ້າງໂດຍ ສວສ ເພື່ອສະໜັບສະໜູນການສອນບົດຮຽນຝຶກເວົ້າພາສາລາວ. ວິດີໂອໄດ້ສະແດງໃຫ້ເຫັນການສອນຕົວຈິງໃນຫ້ອງຮຽນ ແລະວິທີການປະຕິບັດ. ວິດີໂອປະກອບມີພາກສັງເກດ ເພື່ອແນະນຳໃຫ້ຄູຄິດເຖິງການປະຕິບັດຂອງຕົນເອງ ແລະ ວິທີການທີ່ເຂົາເຈົ້າຈະປັບປຸງການສອນຂອງຕົນເພື່ອຮັບປະກັນໃຫ້ນັກຮຽນເຂົ້າໃຈ ແລະ ພ້ອມກັນຮຽນຮູ້.

“ການສອນຫຼັກສູດສະບັບປັບປຸງໃໝ່ແມ່ນມີຄວາມທ້າທາຍສະເໝີສໍາລັບຄູ. ພວກເຮົາຈຳເປັນຕ້ອງໄດ້ຈະສືບຕໍ່ໃຫ້ຄໍາແນະນໍາທີ່ຊັດເຈນ ແລະ ສອດຄ່ອງ, ໃຫ້ການສະໜັບສະໜູນຄູ ໂດຍການສະແດງຕົວຢ່າງການສອນຕົວຈິງໃນຫ້ອງຮຽນ, ຄືກັບທີ່ສະແດງໃຫ້ເຫັນໃນວິດີໂອນີ້,”  ກ່າວໂດຍ ທ່ານ ອຸທິດທິບມະນີ, ທ່ານຍັງໄດ້ກ່າວຕື່ມອີກວ່າ: “ວິດີໂອຊ່ວຍສ້າງຄວາມເຂັ້ມແຂງໃຫ້ແກ່ຄູຂອງພວກເຮົາ ແລະ ສົ່ງເສີມການປະຕິບັດການສອນທີ່ມີຄຸນນະພາບ.”

ທ່ານ ​ນາງ ເຄດ ກູດຟຣຸດ ໄດ້​ກ່າວສະຫຼຸບໃນຕອນທ້າຍວ່າ: “ເປົ້າ​ໝາຍອັນດຽວກັນຂອງພວກເຮົາ ​ແມ່ນ​ເພື່ອໃຫ້​ເດັກ​ທຸກ​ຄົນ, ​​ບໍ່​ວ່າຈະມີ​ພື້ນຖານ​ພາສາ​ແບບໃດກໍ່ຕາມ, ຈະ​ມີ​ໂອກາດ​ປະສົບ​ຜົນສຳ​ເລັດ. ການຮ່ວມແຮງຮ່ວມໃຈ ​ແລະ ການ​ຮ່ວມ​ມື​ໃນ​ກອງປະຊຸມນີ້ ສະ​ແດງ​ໃຫ້​ເຫັນ​ວ່າ​ພວກ​ເຮົາ​ເດີນທາງມາ​ໃນ​ເສັ້ນທາງ​ທີ່​ຖືກຕ້ອງແລ້ວ.”

ກອງປະຊຸມປຶກສາຫາລືການນຳໃຊ້ສື່ການຮຽນການສອນຝຶກເວົ້າພາສາລາວ ເນັ້ນໜັກເຖິງຄວາມມຸ່ງໝັ້ນຂອງກະຊວງສຶກສາທິການ ແລະ ກິລາ ທີ່ຈະສົ່ງເສີມການສຶກສາຮຽນຮ່ວມ ແລະ ວາງພື້ນຖານໃຫ້ແກ່ການຂະຫຍາຍສື່ການຮຽນການສອນຝຶກເວົ້າພາສາລາວໃນຕໍ່ໜ້າ.