ເພື່ອສ້າງຂະບວນການສະເຫຼີມສະຫຼອງວັນຄູແຫ່ງຊາດຄົບຮອບ 30 ປີ, ກະຊວງສຶກສາທິການ ແລະ ກິລາ ຮ່ວມກັບລັດຖະບານອົດສະຕຣາລີ ໄດ້ເນັ້ນໜັກໃຫ້ເຫັນບົດບາດອັນສຳຄັນຂອງຄູໃນການປົກປ້ອງ ແລະ ຮັກສາຄວາມປອດໄພສຳລັບເດັກ

ເນື່ອງໃນໂອກາດວັນຄູແຫ່ງຊາດ, ກະຊວງສຶກສາທິການ ແລະ ກິລາ ສປປ ລາວ (ສສກ) ໂດຍໄດ້ຮັບການສະໜັບສະໜູນຈາກລັດຖະບານອົດສະຕຣາລີ ໂດຍຜ່ານແຜນງານປັບປຸງຄຸນນະພາບ ແລະ ຂະຫຍາຍໂອກາດການເຂົ້າເຖິງການສຶກສາຂັ້ນພື້ນຖານຢູ່ໃນ ສປປ ລາວ (ແຜນງານບີຄວາ) ໄດ້ເປີດກອງປະຊຸມຝຶກອົບຮົມວຽກງານການປົກປ້ອງ ແລະ ຮັກສາຄວາມປອດໄພສຳລັບເດັກໃນຂະແໜງການສຶກສາ ​. ທ່ານ ສົມສີ ສຸດທິວົງ, ຮອງຫົວໜ້າຫ້ອງການ, ຜູ້ປະຈໍາການ ຄະນະກໍາມາທິການເພື່ອຄວາມກ້າວໜ້າຂອງແມ່ຍິງ, ແມ່ ແລະ ເດັກ ກະຊວງສຶກສາທິການ ແລະ ກິລາ (ສສກ) ໄດ້ຮ່ວມເປີດກອງປະຊຸມຝຶກອົບຮົມຄັ້ງທຳອິດ ໃນວັນທີ 2 ຕຸລາ 2024 ທີ່ ວິທະຍາໄລຄູຄັງໄຂ, ແຂວງຊຽງຂວາງ. ກອງ​ປະຊຸມຝຶກອົບຮົມເພື່ອ​ຕິດຕາມ​ໃນຂັ້ນຕໍ່ໄປ ແມ່ນ​ຈະ​ຈັດ​ຂຶ້ນຕື່ມອີກ​ໃນ​ທ້າຍ​ເດືອນ​ນີ້ ຢູ່ທີ່​ວິທະຍາໄລຄູສະຫວັນ​ນະ​ເຂດ ​ແລະ ວິທະຍາໄລຄູຫຼວງ​ນ້ຳທາ. ຈຸດປະສົງຂອງການຝຶກອົບຮົມແມ່ນເພື່ອໃຫ້ຄວາມຮູ້ກ່ຽວກັບເອກະສານຄຳແນະນຳກກ່ຽວກັບການປົກປ້ອງ ແລະ ຮັກສາຄວາມປອດໄພສຳລັບເດັກ ສະບັບໃໝ່ ຂອງກະຊວງສຶກສາທິການ ແລະ ກິລາ ເຊິ່ງຈະເປັນຄຳແນະນຳໃນການຈັດຕັ້ງປະຕິບັດສຳລັບໃນຂະແໜງການສຶກສາ.

ທ່ານ ສົມສີ ສຸດທິວົງ ໄດ້ກ່າວວ່າ: “ພິທີສະເຫຼີມສະຫຼອງວັນຄູເນື່ອງໃນໂອກາດວັນຄູແຫ່ງຊາດ ໄດ້ເນັ້ນໜັກເຖິງບົດບາດສຳຄັນຂອງຄູ ໃນການສ້າງອະນາຄົດຂອງໄວໜຸ່ມຂອງພວກເຮົາ. ປີນີ້, ຂ້າພະເຈົ້າຢາກຍົກໃຫ້ເຫັນເຖິງບົດບາດຂອງຄູສອນ ເພື່ອຮັບປະກັນການຮຽນຮູ້ຂອງນັກຮຽນ ແລະ ຊີວິດການເປັນຢູ່ທີ່ດີຂອງເຂົາເຈົ້າ. ສໍາລັບນັກຮຽນທີ່ຈະຮຽນຮູ້ ແລະ ເຕີບໂຕ, ເຂົາເຈົ້າຈໍາເປັນຕ້ອງມີຄວາມຮູ້ສຶກປອດໄພຢູ່ໃນໂຮງຮຽນ. ​ເຂົາ​ເຈົ້າ​ຈໍາ​ເປັນ​ຕ້ອງ​ມີ​ຄວາມ​ຮູ້​ສຶກວ່າ​ໄດ້​ຮັບ​ການ​ປົກ​ປ້ອງ ​ແລະ ​ຮູ້ກ່ຽວກັບສິດທິຂອງຕົນ​ຈາກ​ຄູ​ຂອງ​ເຂົາ​ເຈົ້າ​. ເຂົາເຈົ້າຈໍາເປັນຕ້ອງມີຄວາມຮູ້ສຶກເປັນວ່າຕົນເອງເປັນສ່ວນໜຶ່ງຂອງສັງຄົມໂຮງຮຽນ. ໃນວັນຄູແຫ່ງຊາດນີ້, ຂ້າພະເຈົ້າຮູ້ສຶກເປັນກຽດທີ່ໄດ້ກ່າວເປີດວາລະຝຶກອົບຮົມຄັ້ງທໍາອິດກ່ຽວກັບເອກະສານຄໍາແນະນໍາດ້ານການປົກປ້ອງເດັກຢ່າງເປັນທາງການສະບັບໃໝ່ຂອງ ສສກ ສຳລັບຂະແໜງການສຶກສາ”.

ຄູທັງໝົດ 150 ທ່ານຈາກ 3 ວິທະຍາໄລຄູເປົ້າໝາຍ ຈະເຂົ້າຮ່ວມກອງປະຊຸມຝຶກອົບຮົມເປັນເວລາ 3 ວັນ ເຊິ່ງນຳພາໂດຍພະແນກສົ່ງເສີມຄວາມກ້າວໜ້າຂອງແມ່ຍິງ, ແມ່ ແລະ ເດັກ, ກະຊວງສຶກສາທິການ ແລະ ກິລາ, ໂດຍໄດ້ຮັບການສະໜັບສະໜູນຈາກລັດຖະບານອົດສະຕຣາລີ. ຜູ້ເຂົ້າຮ່ວມແມ່ນຈະຮັບໜ້າທີ່ຝຶກອົບຮົມໃຫ້ແກ່ ຜູ້ເຮັດວຽກສຶກສານິເທດພາຍໃນ 7 ແຂວງເປົ້າ     ໝາຍ (ຜົ້ງສາລີ, ຫຼວງນ້ຳທາ, ບໍ່ແກ້ວ ຫົວພັນ, ຊຽງຂວາງ, ຄຳມ່ວນ ແລະ ສະຫວັນນະເຂດ). ຄວາມຮູ້ ແລະ ທັກສະທີ່ໄດ້ຮັບຈາກການຝຶກອົບຮົມຄັ້ງນີ້ ຈະຖືກຖ່າຍທອດຕໍ່ໃຫ້ແກ່ຄູສອນຊັ້ນປະຖົມສຶກສາທັງໝົດໃນ 30 ເມືອງເປົ້າໝາຍ ຜ່ານການລົງຕິດຕາມໃຫ້ການຊ່ວຍເຫຼືອຄູໃນໂຮງຮຽນໂດຍຜູ້ເຮັດວຽກສຶກສານິເທດພາຍໃນ.

ທ່ານ ​ນາງ ວາເນັດຊ້າ ເຮັກກາທີ້ , ​ເລ​ຂາ​ເອກສະ​ຖານ​ທູດ​ອົດ​ສະ​ຕຣາ​ລີປະຈຳລາວ ໄດ້ມີຄຳເຫັນຕໍ່ການຈັດວາລະງານໃນຄັ້ງນີ້ວ່າ: “ການປົກປ້ອງ ແລະ ຮັກສາຄວາມປອດໄພສຳລັບເດັກ ແມ່ນວຽກງານບູລິມະສິດຮ່ວມກັນຂອງລັດຖະບານອົດສະຕຣາລີ ແລະ ລັດຖະບານ ສປປ ລາວ. ຄູມີບົດບາດສໍາຄັນໃນການປົກປ້ອງນັກຮຽນ. ການຮັບປະກັນໃຫ້ນັກຮຽນຮູ້ສຶກປອດໄພເມື່ອຢູ່ໃນໂຮງຮຽນ, ຊ່ວຍໃຫ້ເຂົາເຈົ້າມີຄວາມກ້າວໜ້າໃນເສັ້ນທາງການຮຽນ. ລັດຖະບານອົດ​ສະ​ຕາຣາລີ ​ຍິນ​ດີ​ສະ​ໜັບ​ສະ​ໜູນ​ກະ​ຊວງ​ສຶກ​ສາ​ທິ​ການ ແລະ ກິລາ ​ໃນ​ການຈັດ​ຝຶກ​ອົບ​ຮົມຄັ້ງ​ນີ້. ການຊ່ວຍເຫຼືອໃຫ້​ຄູ​ ​ແລະ ພະນັກງານຂະແໜງສຶກສາ ດ້ວຍການສະໜອງ​ເຄື່ອງ​ມື ​ແລະ ທັກ​ສະ​ທີ່​ຈຳ​ເປັນ​ ຈະ​ຮັບປະກັນ​ໃຫ້​ເຂົາ​ເຈົ້າ​ສາມາດ​ຊຸກຍູ້ ​ແລະ ປະຕິບັດ​ການ​ປົກ​ປ້ອງ​ ​ແລະ ຮັກສາຄວາມປອດໄພສຳລັບເດັກ​ຢູ່​ໃນ ​ແລະ ນອກ​ຫ້ອງ​ຮຽນ”.

ກອງປະຊຸມຝຶກອົບຮົມໄດ້ນຳໃຊ້ວິທີການຝຶກອົບຮົມ ໂດຍຖືເອົາຜູ້ເຂົ້າຮ່ວມເປັນໃຈກາງ ໂດຍມີວາລະກິດຈະກຳແບບໂຕ້ຕອບ ແລະ ວາລະປະກອບຄຳເຫັນຮ່ວມກັນ. ກິດຈະກຳແມ່ນເລີ່ມຕົ້ນດ້ວຍການລະດົມຄວາມຄິດກ່ຽວກັບຄວາມສໍາຄັນຂອງການປົກປ້ອງເດັກ. ຜູ້ເຂົ້າຮ່ວມໄດ້ສຶກສາກົດໝາຍວ່າດ້ວຍການປົກປ້ອງເດັກຂອງ ສປປ ລາວ, ກົດໝາຍວ່າດ້ວຍການສຶກສາ ແລະ ຍຸດທະສາດການສຶກສາຮຽນຮ່ວມຂອງ ສສກ ຮອດ 2030 ຜ່ານກິດຈະກຳຕ່າງໆ ເຊັ່ນ: ການຕອບຄຳຖາມ, ການສະແດງບົດບາດສົມມຸດ ແລະ ການຕອບຄຳຖາມ. ກິດຈະກໍາ ‘ຍ່າງແບບມີພະລັງ’ ຖືກນໍາໃຊ້ເພື່ອຊ່ວຍໃຫ້ຜູ້ເຂົ້າຮ່ວມຮັບຮູ້ເຖິງການເຄື່ອນໄຫວທີ່ມີຢູ່ໃນຊຸມຊົນ ແລະ ໃນໂຮງຮຽນ. ໃນວາລະສຸດທ້າຍຂອງກອງປະຊຸມ, ຜູ້ເຂົ້າຮ່ວມໄດ້ສະທ້ອນຄືນເຖິງວິທີ ທີ່ເຂົາເຈົ້າສາມາດນຳໃຊ້ຫຼັກການການປົກປ້ອງ ແລະ ຮັກສາຄວາມປອດໄພສຳລັບເດັກໃນເວລາປະຕິບັດໜ້າທີ່ ແລະ ການດໍາລົງວິດປະຈຳວັນຂອງເຂົາເຈົ້າ.