English
ເນື່ອງໃນໂອກາດວັນຄູ, ທ່ານ ຮອງລັດຖະມົນຕີກະຊວງສຶກສາທິການ ແລະ ກິລາ ພ້ອມດ້ວຍ ພະນະທ່ານ ຮອງເອກອັກຄະລັດຖະທູດອົດສະຕຣາລີ ປະຈຳ ສປປ ລາວ ໄດ້ມອບອຸປະກອນການຮຽນການສອນ ຂັ້ນ ປ.4 ໃຫ້ແກ່ຄູຢ່າງເປັນທາງການ
ເນື່ອງໃນໂອກາດວັນຄູ, ທ່ານ ປອ. ນາງ ສີສຸກ ວົງວິຈິດ ຮອງລັດຖະມົນຕີ ກະຊວງສຶກສາທິການ ແລະ ກິລາ ແລະ ພະນະທ່ານ ແດນ ເຮວເດິນ ຮອງເອກອັກຄະລັດຖະທູດອົດສະຕຣາລີ ປະຈຳ ສປປ ລາວ ໄດ້ຢ້ຽມຢາມໂຮງຮຽນປະຖົມແຫ່ງໜຶ່ງທີ່ນະຄອນຫຼວງວຽງຈັນ ເພື່ອຮ່ວມຊົມການສອນໃນຫ້ອງຮຽນຈິງທີ່ນຳໃຊ້ຫຼັກສູດຂັ້ນ ປ.4 ສະບັບປັບປຸງໃໝ່.
ຄະນະຜູ້ແທນໄດ້ໂອ້ລົມກັບຄູ ກ່ຽວກັບປະສົບການໃນການສອນແບບໃໝ່ ທີ່ເນັ້ນການປະຕິບັດຕົວຈິງ ແລະ ການສອນທີ່ຖືເອົານັກຮຽນເປັນໃຈກາງ ແລະ ໄດ້ມອບອຸປະກອນການຮຽນການສອນ ຂັ້ນ ປ.4 ໃຫ້ແກ່ຄູຢ່າງເປັນທາງການ.
ທ່ານ ປອ. ນາງ ສີສຸກ ວົງວິຈິດ ໄດ້ກ່າວວ່າ: “ຄຸນນະພາບການສອນເປັນກຸນແຈສຳຄັນໃນການປັບປຸງຜົນການຮຽນຂອງເດັກນ້ອຍທຸກຄົນ ໃນ ສປປ ລາວ. ເນື່ອງໃນໂອກາດວັນຄູນີ້, ຂ້າພະເຈົ້າຂໍສະແດງຄວາມຍິນດີນຳບັນດາຄູອາຈານທຸກທ່ານ ສຳລັບຜົນງານ ແລະ ການອຸທິດຕົນຂອງພວກທ່ານ, ແລະ ຂ້າພະເຈົ້າເອງກໍ່ຮູ້ສຶກເປັນກຽດທີ່ໄດ້ມອບອຸປະກອນການຮຽນການສອນ ຂັ້ນ ປ.4 ໃຫ້ແກ່ຄູໃນມື້ນີ້”.
ທ່ານ ແດນ ເຮວເດິນ ໄດ້ກ່າວວ່າ: “ຫຼັກສູດສະບັບປັບປຸງໃໝ່ໄດ້ນຳເອົາ ການສອນແບບໃໝ່ໂດຍເນັ້ນໜັກໃສ່ການຮຽນຮູ້ດ້ວຍການປະຕິບັດຕົວຈິງ. ມື້ນີ້, ຂ້າພະເຈົ້າໄດ້ເຫັນຄູມີສ່ວນຮ່ວມກັບນັກຮຽນໃນການເຮັດກິດຈະກໍາ, ການລົງມືປະຕິບັດຕົວຈິງ, ແລະ ການນຳໃຊ້ຄວາມຮູ້ເຂົ້າໃນການໃຊ້ຊີວິດຈິງຂອງພວກເຂົາ. ຂ້າພະເຈົ້າຂໍຊົມເຊີຍຄູທຸກທ່ານທີ່ມີບົດບາດສຳຄັນໃນການປັບປຸງຜົນການຮຽນຂອງນັກຮຽນ ເຊິ່ງເປັນພື້ນຖານອັນສຳຄັນໃນການພັດທະນາຊັບພະຍາກອນມະນຸດ ຢູ່ໃນ ສປປ ລາວ.”
ນັບແຕ່ປີ 2015 ເປັນຕົ້ນມາ, ລັດຖະບານອົດສະຕຣາລີ ໄດ້ໃຫ້ການສະໜັບສະໜູນກະຊວງສຶກສາທິການ ແລະ ກິລາ ແຫ່ງ ສປປ ລາວ, ໂດຍຜ່ານແຜນງານບີຄວາ, ໂດຍມີການພັດທະນາ ແລະ ການຈັດຕັ້ງປະຕິບັດຫຼັກສູດປະຖົມໃໝ່ໃນທົ່ວປະເທດ, ພ້ອມດ້ວຍການສະໜອງອຸປະກອນການຮຽນການສອນໃໝ່ ແລະ ແຜນການຝຶກອົບຮົມຄົບຊຸດສຳລັບຄູ. ເລີ່ມແຕ່ປີ 2019 ເປັນຕົ້ນມາ, ຫຼັກສູດຊັ້ນປະຖົມສຶກສາສະບັບປັບປຸງໃໝ່ ຂັ້ນ ປ.1 ໄດ້ຖືກເລີ່ມຕົ້ນນຳໃຊ້ໃນໂຮງຮຽນ ແລະ ສືບຕໍ່ແຕ່ລະຂັ້ນຮຽນໃນແຕ່ລະປີ. ຮອບວຽນປະຈຳປີຂອງການພັດທະນາຫຼັກສູດ, ການຜະລິດ, ການແຈກຢາຍ ແລະ ການປະຖົມນິເທດຄູໃນທົ່ວປະເທດແມ່ນຍັງຄົງດຳເນີນຕໍ່ໄປຢ່າງສຳເລັດຜົນ ເຖິງວ່າຈະມີສິ່ງທ້າທາຍຈາກວິກິດການແຜ່ລະບາດຂອງພະຍາດໂຄວິດ-19 ກໍ່ຕາມ.
ປຶ້ມແບບຮຽນຂັ້ນ ປ.4 ຈໍານວນ 546,000 ຫົວ ເຊິ່ງປະກອບມີ 3 ວິຊາ ທີ່ສະໜັບສະໜູນໂດຍລັດຖະບານອົດສະຕຣາລີ (ເຊັ່ນ: ວິຊາ ພາສາລາວ, ວິຊາ ພາສາອັງກິດ ແລະ ວິຊາ ວິທະຍາສາດ ແລະ ສິ່ງແວດລ້ອມ), ປື້ມຄູ່ມືຄູ ຈຳນວນ 42,600 ຫົວ, ແຜ່ນຮູບພາບຫຼາຍເຫດການ ຈຳນວນ 28,400 ແຜ່ນ ແລະ ຊຸດອຸປະກອນການສອນສຳລັບຄູ ຈຳນວນ 14,300 ຊຸດ ໄດ້ຖືກແຈກຢາຍໃຫ້ແກ່ບັນດາໂຮງຮຽນປະຖົມ 7,671 ແຫ່ງໃນທົ່ວປະເທດໄດ້ທັນເວລາເພື່ອເລີ່ມນຳໃຊ້ເມື່ອເປີດສົກຮຽນໃໝ່ໃນເດືອນກັນຍານີ້. ບັນດາສື່ການຮຽນການສອນໃໝ່ທັງໝົດນີ້ ໄດ້ຖືກອອກແບບຢ່າງລະອຽດ ເພື່ອສົ່ງເສີມການຮຽນຮູ້ໃນຮູບແບບການປະຕິບັດຕົວຈິງ ແລະ ຮັບປະກັນວ່າຫຼັກສູດມີຄວາມເໝາະສົມ ແລະ ແທດເໝາະກັບເດັກນ້ອຍທຸກຄົນ.
ນອກຈາກນີ້, ທີມຄູຝຶກຫຼັກແຫຼ່ງ ແລະ ຄູຝຶກຂັ້ນແຂວງຈຳນວນ 663 ຄົນ ໄດ້ຈັດກອງປະຊຸມຝຶກອົບຮົມທັງໝົດ 361 ຄັ້ງ ຄັ້ງລະສີ່ວັນ ໃຫ້ແກ່ຄູຂັ້ນ ປ.4 ທັງໝົດ 8,614 ຄົນ ແລະ ຄູສຶກສານິເທດ ຈຳນວນ 354 ຄົນ. ການຝຶກອົບຮົມດັ່ງກ່າວແມ່ນເພື່ອໃຫ້ພວກເຂົາຮູ້ທັກສະທີ່ຈຳເປັນໃນການສອນຫຼັກສູດໃໝ່. ບັນດາຄູຍັງໄດ້ຮັບການແນະນຳກ່ຽວກັບການສອນຫ້ອງຄວບ ພ້ອມທັງຍຸດທະສາດໃນການສອນທີ່ມີຄວາມສະເໝີພາບທາງດ້ານບົດບາດຍິງ-ຊາຍ ແລະ ການສອນທີ່ເໝາະສົມສຳລັບເດັກນ້ອຍທຸກຄົນ.
“ລັດຖະບານລາວ ແລະ ລັດຖະບານອົດສະຕຣາລີ ໄດ້ມີອຸດົມການອັນດຽວກັນໃນການໃຫ້ໂອກາດແກ່ເດັກນ້ອຍທຸກຄົນ, ໂດຍສະເພາະຜູ້ທີ່ປະສົບກັບຄວາມດ້ອຍໂອກາດໃຫ້ໄດ້ມີໂອກາດເຂົ້າເຖິງການສຶກສາທີ່ດີ. ເຖິງວ່າໃນໄລຍະວິກິດການແຜ່ລະບາດຂອງໂຄວິດ-19 ແລະ ມີການຈຳກັດການເດີນທາງ ເຖິງ 2 ຄັ້ງກໍ່ຕາມ, ວຽກງານຂອງກະຊວງສຶກສາທິການ ແລະ ກິລາ ໂດຍໄດ້ຮັບການສະໜັບສະໜູນ ຈາກລັດຖະບານອົດສະຕຣາລີ ສາມາດດຳເນີນການພັດທະນາ ແລະ ການຈັດຕັ້ງປະຕິບັດຫຼັກສູດຊັ້ນປະຖົມສຶກສາສະບັບປັບປຸງໃໝ່ໄດ້ຢ່າງຕໍ່ເນື່ອງ ແລະ ມື້ນີ້ຂ້າພະເຈົ້າຮູ້ສຶກດີໃຈເປັນຢ່າງຍິ່ງທີ່ໄດ້ມາຢ້ຽມຢາມການເລີ່ມຕົ້ນນຳໃຊ້ຫຼັກສູດດັ່ງກ່າວສຳລັບ ຂັ້ນ ປ.4 ໃນຫ້ອງຮຽນຕົວຈິງ”. ທ່ານ ປອ. ນາງ ສີສຸກ ວົງວິຈິດ ໄດ້ກ່າວເພີ່ມຕື່ມ.
ທ່ານ ແດນ ເຮວເດິນ ໄດ້ກ່າວໃນຕອນທ້າຍວ່າ “ຂ້າພະເຈົ້າຫວັງວ່າຈະສືບຕໍ່ການຮ່ວມມືລະຫວ່າງກະຊວງສຶກສາທິການ ແລະ ກິລາ ແລະ ລັດຖະບານອົດສະຕຣາລີ ໂດຍຜ່ານແຜນງານບີຄວາ ໄລຍະ 2 ທີ່ເນັ້ນໜັກໃສ່ການພັດທະນາວິຊາຊີບຄູ ແລະ ການເຊື່ອມສານຂອງຫຼັກການການສຶກສາທີ່ເໝາະສົມສຳລັບເດັກນ້ອຍທຸກຄົນ.”
ລັດຖະບານອົດສະຕຣາລີຫາກໍ່ຂະຫຍາຍການສະໜັບສະໜູນໃຫ້ກະຊວງສຶກສາທິການ ແລະ ກິລາ ຜ່ານແຜນງານ ບີຄວາ ໄລຍະທີ 2 ດ້ວຍມູນຄ່າ 28 ລ້ານໂດລາອົດສະຕຣາລີ ເປັນໄລຍະເວລາ 4 ປີ (2022-2026), ເຊິ່ງມີຈຸດປະສົງຕົ້ນຕໍແມ່ນເພື່ອສຳເລັດການຈັດຕັ້ງປະຕິບັດຫຼັກສູດຊັ້ນປະຖົມສຶກສາສະບັບປັບປຸງໃໝ່ ແລະ ສ້າງຄວາມເຂັ້ມແຂງໃຫ້ແກ່ຄຸນນະພາບການສອນ. ປັດຈຸບັນແມ່ນກຳລັງພັດທະນາຫຼັກສູດຂັ້ນ ປ.5 ສະບັບປັບປຸງໃໝ່ ແລະ ຈະໄດ້ນຳໃຊ້ເຂົ້າໃນການຮຽນການສອນໃນທຸກໂຮງຮຽນປະຖົມສຶກສາໃນສົກຮຽນທີ່ຈະມາເຖິງນີ້. ຄຽງຄູ່ກັນນັ້ນ, ການສຶກສາ ແລະ ການພັດທະນາວິຊາຊີບຄູກໍ່ຈະໄດ້ຮັບການສະໜັບສະໜູນຫຼາຍຂຶ້ນ.