English
ນັບແຕ່ປີ 2015, ກະຊວງສຶກສາທິການ ແລະ ກິລາ (ສສກ), ພາຍໃຕ້ການສະໜັບສະໜູນຂອງລັດຖະບານອົດສະຕຣາລີ ແລະ ສະຫະພາບເອີຣົບ ໂດຍຜ່ານແຜນງານບີຄວາ ໄດ້ປັບປຸງຫຼັກສູດຊັ້ນປະຖົມສຶກສາ ແລະ ຫຼັກສູດສ້າງຄູປະຖົມສຶກສາ.
ຫຼັກສູດຊັ້ນປະຖົມສຶກສາແມ່ນນຳໃຊ້ໃນຫ້ອງຮຽນຊັ້ນປະຖົມສຶກສາທົ່ວປະເທດ ແລະ ຫຼັກສູດການສ້າງຄູປະຖົມແມ່ນນຳໃຊ້ໃນວິທະຍາໄລຄູ 8 ແຫ່ງ ເພື່ອສອນໃຫ້ນັກສຶກສາຄູ ຜູ້ທີ່ຈະກາຍເປັນຄູສອນຊັ້ນປະຖົມສຶກສາໃນອະນາຄົດ. ດັ່ງນັ້ນ, ຫຼັກສູດສ້າງຄູປະຖົມສຶກສາ ສຳລັບວິທະຍາໄລຄູຈຶ່ງມີຄວາມສອດຄ່ອງຫຼາຍ ກັບຫຼັກສູດຊັ້ນປະຖົມສຶກສາແຫ່ງຊາດສະບັບປັບປຸງໃໝ່, ເຊິ່ງສ້າງຂຶ້ນບົນພື້ນຖານການຮຽນການສອນທີ່ເນັ້ນການປະຕິບັດຕົວຈິງ. ຫຼັກສູດນີ້ແມ່ນເນັ້ນໃສ່ ການສອນພາສາລາວ, ການສອນພາສາລາວສຳລັບເດັກນ້ອຍຊົນເຜົ່າ ແລະ ການຮຽນຮ່ວມ. ຕໍ່ກັບຫຼັກສູດສ້າງຄູປະຖົມ, ສຳມະນາກອນຄູຈະຮັບການແນະນຳຂໍ້ມູນທີເຂັ້ມແຂງກ່ຽວກັບຫຼັກສູດຊັ້ນປະຖົມ ທີ່ພວກເຂົາຈະສິດສອນໃນອະນາຄົດ, ການໃຫ້ຄຳປຶກສາວິທີສອນແບບໃໝ່ ແລະ ເປັນໂອກາດໃນການຝຶກສອນນັກຮຽນໃນເວລາທີ່ພວກເຂົາລົງຝຶກຫັດວິຊາຊີບ.
ການຈັດຕັ້ງປະຕິບັດສອງຫຼັກສຸດນີ້ແມ່ນເລີ່ມແຕ່ເດືອນ ກັນຍາ 2019, ເຊິ່ງເລີ່ມຈາກໂຮງຮຽນຊັ້ນປະຖົມສຶກສາ ຂັ້ນ ປ.1 ໃນທົ່ວປະເທດ ແລະ ວິທະຍາໄລຄູປີທີ 1 ໃນແຕ່ລະແຫ່ງ (ວຄ).
ການປັບປຸງຫຼັກສູດສ້າງຄູຊັ້ນປະຖົມສຶກສາສະບັບປັບປຸງໃໝ່ແມ່ນນຳພາໂດຍ ກົມສ້າງຄູ (ສຄ) ແລະ ສູນພັດທະນາຄູ (ສພຄ). ທີມພັດທະນາຫຼັກສູດ 17 ລາຍວິຊາ ທີ່ມາຈາກ ກົມສ້າງຄູ, ສູນພັດທະນາຄູ, ຄະນະສຶກສາສາດ (ຄສສ) ມະຫາວິທະຍາໄລ 4 ແຫ່ງທົ່ວປະເທດ, ສະຖາບັນຄົ້ນຄວ້າວິທະຍາສາດການສຶກສາ (ສວສ), ວິທະຍາໄລຄູ ແລະ ວິທະຍາໄລພາລະສຶກສາ ແລະ ສິລະປະສຶກສາ ໄດ້ມີສ່ວນຮ່ວມໃນການຂຽນເນື້ອໃນເອກະສານຫຼັກສູດສ້າງຄູປະຖົມສະບັບປັບປຸງໃໝ່ນີ້. ເປົ້າໝາຍແມ່ນເພື່ອທົດລອງນຳໃຊ້ເນື້ອໃນເອກະສານຫຼັກສູດຄືນອີກ ຢູ່ວິທະຍາໄລຄູ ແລະ ປັບປຸງຄືນຕາມຄວາມຈຳເປັນ. ໃນຂະນະທີ່ ວິທະຍາໄລຄູ 8 ແຫ່ງໄດ້ເລີ່ມທົດລອງນຳໃຊ້ຫຼັກສູດສະບັບປັບປຸງໃໝ່ໃນປີທີ 1, ການຈັດຕັ້ງປະຕິບັດ ແລະ ການທົດລອງນຳໃຊ້ຫຼັກສູດສ້າງຄູສະບັບປັບປຸງໃໝ່ ໄດ້ມີການຕິດຕາມຢ່າງໃກ້ຊິດຢູ່ສອງສະຖານບັນວິທະຍາໄລຄູ ຄື: ວິທະຍາໄລຄູປາກເຊ ແລະ ວິທະຍາໄລຄູດົງຄຳຊ້າງ. ອາຈານທີ່ໄດ້ສອນທົດລອງຫຼັກສູດແມ່ນຈະໃຫ້ຄຳຄິດເຫັນກ່ຽວກັບເນື້ອໃນເອກະສານຫຼັກສູດສະບັບປັບປຸງໃໝ່ ເຊິ່ງຈະໄດ້ວິເຄາະ ແລະ ປັບປຸງຄືນໃນຈຸດທີ່ຄວນປັບປຸງ.
ກອງປະຊຸມພັດທະນາ ແລະ ປັບປຸງຫຼັກສູດສ້າງຄູປະຖົມສຶກສາຊຶ່ງໄດ້ຈັດຂຶ້ນໃນອາທິດນີ້, ໂດຍການເປັນປະທານຂອງ ທ່ານ ບຸນໄຊ ຈັນສີນາ, ຜູ້ອໍານວຍການສູນພັດທະນາຄູ ເຊິ່ງກອງປະຊຸມດັ່ງກ່າວຈະມີທີມງານພັດທະນາຫຼັກສູດຫຼາຍກວ່າ 60 ທ່ານເຂົ້າຮ່ວມ. ທີມຂຽນຫຼັກສູດສຳລັບວິຊາທີ່ສອນໃນປີທີ 1 ພາກຮຽນທີ 1 ຈະທົບທວນຄືນເນື້ອໃນເອກະສານຫຼັກສູດ ໂດຍອີງໃສ່ການປະກອບຄຳຄິດເຫັນຂອງຄູທີ່ທົດລອງນຳໃຊ້ຫຼັກສູດ ເຊິ່ງພວກເຂົາຈະນຳປະສົບການສິດສອນລາຍວິຊາຕ່າງໆໃນພາກຮຽນ 1 ຕັ້ງແຕ່ເດືອນກັນຍາ 2019, ໂດຍສະເພາະໃນສອງສະຖາບັນຫຼັກ. ນັກຂຽນຫຼັກສູດຫຼາຍໆທ່ານ ແມ່ນຜູ້ສອນລາຍວິຊາຕ່າງໆຂອງຫຼັກສູດ, ເຂົາເຈົ້າຈະອີງໃສ່ປະສົບການການສອນຂອງເຂົາເຈົ້າໃນພາກຮຽນ 1 ເພື່ອແນະນຳການປັບປຸງໃນຂັ້ນຕໍ່ໄປ. ຕາມການປຶກສາຫາລືໃນກອງປະຊຸມ, ຫຼັງຈາກນັ້ນ ຈະໄດ້ມີກອງປະຊຸມ ທົບທວນ ແລະ ປັບປຸງເນື້ອໃນເອກະສານຂອງຫຼັກສູດສ້າງຄູປະຖົມ ທີ່ສອນໃນພາກຮຽນທີ 1 ຄືນໃນປີຕໍ່ໄປ.
ພ້ອມດຽວກັນນັ້ນ, ນັກຂຽນຫຼັກສູດຈະສຳເລັດການພັດທະນາເນື້ອໃນຂອງລາຍວິຊາທີ່ຈະສອນ ພາກຮຽນ 2 ຂອງປີທີ 1 ແລະ ສືບຕໍ່ພັດທະນາເນື້ອໃນເອກະສານຂອງຫຼັກສູດສຳລັບປີທີ 2. ຈະສືບຕໍ່ດ້ວຍກອງປະຊຸມ ປັບປຸງເນື້ອໃນຫຼັກສູດສຳລັບພາກຮຽນ 2, ເນື້ອໃນເອກະສານສຳລັບພາກຮຽນທີ່ສອງແມ່ນຈະຜະລິດ ແລະ ສົ່ງໃຫ້ ວິທະຍາໄລຄູ (ວຄ) ໃຫ້ທັນເວລາເພື່ອທົດລອງນຳໃຊ້ໃນພາກຮຽນ 2 ໃນເດືອນ ກຸມພາ 2020.
ຂະບວນການເພີ້ມເຕີມຂອງການພັດທະນາຫຼັກສູດຈະະສືບຕໍ່ຕະຫຼອດສົກຮຽນ ໂດຍຄຽງຄູ່ກັບການຈັດກອງປະຊຸມພັດທະນາ ແລະ ປັບປຸງຫຼັກສູດສ້າງຄູປະຖົມສຶກສາໃນທຸກໆ 3 ເດືອນ. ການກະກຽມຄູສອນທີ່ດີແມ່ນມີຄວາມສຳຄັນຕໍ່ການຮຽນຮູ້ຂອງນັກຮຽນ. ການປັບປຸງທັງສອງຫຼັກສູດແມ່ນໃຫ້ສອດຄ່ອງກັນ ຊຶ່ງເປັນບາດກ້າວສຳຄັນໃນການປັບປຸງຜົນສຳເລັດຂອງການສຶກສາເພື່ອເດັກນ້ອຍລາວທຸກຄົນ ແລະ ສ້າງໂອກາດສຳລັບອະນາຄົດຂອງເຂົາເຈົ້າ.
ກະລຸນາກົດບ່ອນນີ້ເພື່ອເບິ່ງບົດຂ່າວທີ່ໄດ້ອອກອາກາດທາງໂທລະພາບຊ່ອງ 1 – ລາຍການສຶກສາໃໝ່
https://www.facebook.com/IMCLaos/videos/3097990906883995/